ឯកឧត្តម ឃឹម ប៊ុនសុង អភិបាលខេត្តសៀមរាប មានប្រសាសន៍ថា ដើម្បីឲ្យដំណើរការព្រះរាជពិធីបុណ្យអុំទូកនៅខេត្តសៀមរាបក្នុងឆ្នាំនេះ ដែលនឹងប្រព្រឹត្តទៅនៅថ្ងៃទី២១ និងថ្ងៃទី២២ ខែវិច្ឆិកា ខាងមុខនេះ ប្រព្រឹត្តទៅដោយរលូន និង មានភាពប្រសើរជាងឆ្នាំមុននោះ សូមឲ្យអនុគណៈកម្មការ ព្រមទាំងមន្ទីរ អង្គភាព និងស្ថាប័នពាក់ពន្ឋ័ទាំងអស់ ត្រូវយកចិត្តទុកដាក់លើបញ្ហារៀបចំសណ្តាប់ធ្នាប់សាធារណៈ សន្តិសុខ សុវត្ថិភាព និង លើកកម្ពស់បញ្ហាអនាម័យ ពិសេស កងកម្លាំងសមត្ថកិច្ចទាំងអស់ ត្រូវរួមសហការគ្នា ទំនាក់ទំនងជាមួយសមត្ថកិច្ចខេត្តជិតខាងផងដែរ ដើម្បីស្រាវជ្រាវ តាមដានប្រមូល ក្តាប់និងច្បាមមុខសញ្ញាជាមុន នូវសមាសភាពចោរឆក់ ចោរលួច និងជនខិលខូច ជនឱកាសនិយមដែលចាំតែឆ្លៀតឱកាស ដើម្បីបង្កភាពរំខានក្នុងពិធីបុណ្យ ក្នុងគិលបំណងលើកិច្ចការពារសុខសុវត្ថិភាព ដល់ភ្ញៀវជាតិ និងអន្តរជាតិដែលចូលរួមសប្បាយក្នុងពិធីបុណ្យអុំទូកនេះ ។
ឯកឧត្តម ឃឹម ប៊ុនសុង មានប្រសាសន៍ទៀតថា ជាមួយគ្នានេះដែរ ទាំងអនុគណៈកម្មការ និង អាជ្ញាធរក្រុងសៀមរាប ត្រូវធ្វើការរៀបចំឲ្យមានសណ្តាប់ធ្នាប់រៀបរយ តាមដងផ្លូវសាធារណៈកុំឲ្យមានការលក់ដូររញ៉េរញ៉ៃ និង ចតយានយន្តគ្រប់ប្រភេទតាមបែបអាណាធិបតេយ្យដែលបង្កឲ្យមានភាពកកស្ទះចរាចរណ៍ បង្កឲ្យប៉ះពាល់បរិស្ថានអនាម័យក្រុង ពិសេស ត្រូវសហការគ្នាពិនិត្យមើលទីតាំងក្បែរព្រះវិហារព្រះអង្គចេកេព្រះអង្គចម ចំពោះការដាក់លក់ ការចត គ្មានសណ្តាប់ធ្នាប់ដែលធ្វើឲ្យខូចនូវរបៀបរៀបរយសាធារណៈ ព្រមទាំងប៉ះពាល់ដល់ភ្ញៀវទេសចរណ៍ជាតិ អន្តរជាតិធ្វើដំណើរ ឆ្លងកាត់ទីនោះ ។
ឯកឧត្តម ឃឹម ប៊ុនសុង មានប្រសាសន៍យ៉ាងនេះ នៅក្នុងកិច្ចប្រជុំរបស់គណៈកម្មការខេត្តរៀបចំពិធីបុណ្យអុំទូក នៅសាលាខេត្តសៀមរាប កាលពីថ្ងៃទី១៦ ខែតុលា ឆ្នាំ២០១៨ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ពិធីបុណ្យអុំទូកនៅខេត្តសៀមរាប
