នៅព្រឹកថ្ងៃទី ១៧ ខែ១០ ឆ្នាំ២០១៨ព្រឹកមិញនេះ ប្រជាពលរដ្ឋងាយរងគ្រោះចំននួន៤០០គ្រួសារ មកពី៣ឃុំ ក្នុងស្រុកប្រាសាទបាគង រួមមានឃុំបល្ល័ង្ក , ឃុំអំពិល និង ឃុំកន្ទ្រាំង ស្មើនឹង២០ភូមិ ដែលមានមុខរបរជាកសិករ បានជួបនូវកង្វះខាតនូវស្បៀងអាហារប្រចាំថ្ងៃ បានទទួលអំណោយមនុស្សធម៌ ពីសមាគម វី ឆារីថេបល ហ្វោនដេសិន តាមរយៈសាខាកាកបាទក្រហកម្ពុជាខេត្តសៀមរាប ដែលក្នុងមួយគ្រួសារទទួលបានអង្ករចំនួន២៥ គីឡូក្រាម , មី១កេស , ទឹកត្រី១យួរ , ត្រីខ១យួរ និងថវិកាមួយចំនួន។
ឯកឧត្ដមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហកម្ពុជាខេត្តសៀមរាប មានប្រសាសន៍ថា កាកបាទក្រហមកម្ពុជា គឺជាស្ថាប័នមនុស្សធម៌ធំជាងគេនៅក្នុងប្រទេស ក្រោមការដឹកនាំរបស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជាប្រធាន ហើយបាននឹងកំពុងប្រតិបត្តិការជួយសង្គ្រោះ និងជួយសម្រាលទុក្ខលំបាកដល់ប្រជាពល រដ្ឋរងគ្រោះ និងងាយរងគ្រោះ ដោយគណៈអភិបាល ក្រុមប្រតិបត្តិ អ្នកស្ម័គ្រចិត្ត ចាប់តាំងពីថ្នាក់ជាតិរហូតដល់សហគមន៍មូលដ្ឋាន ដោយមានការសហការពីអាជ្ញាធរសាធារណណៈ គ្រប់លំដាប់ថ្នាក់ ដៃគូសហប្រតិបត្តិការ ស្ថាប័នពាក់ព័ន្ធ សប្បុរសជនជាតិ និងអន្តរជាតិ ។
ឯកឧត្ដមបណ្ឌិត ឃឹម ប៊ុនសុង មានប្រសាសន៍ទៀតថា កាកបាទក្រហមកម្ពុជា ក៏ដូចជាអាជ្ញាធរសាធារណៈគ្រប់លំដាប់ថ្នាក់ ក៏មិនទុកឲ្យប្រជាពលរដ្ឋណាម្នាក់ចោលឱ្យស្លាប់ដោយអត់អាហារឡើយ ដូចដែលបានលើកឡើងថា កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិទុកនរណាម្នាក់ចោល និង ទីណាមានទុក្ខលំបាក ទីនោះមានកាកបាទក្រហមកម្ពុជា ដូច្នេះហើយអាជ្ញាធរនៅគ្រប់លំដាប់ថ្នាក់ សំខាន់កាកបាទក្រហមកម្ពុជា បានយកចិត្តទុកដាក់ខ្ពស់ ចំពោះបងប្អូនប្រជាពលរដ្ឋដែលរងគ្រោះ និងងាយរងគ្រោះ ជាពិសេសគ្រួសារទីទ័លក្រ ចាស់ជរាគ្មានទីពឹង ជនពិការ ស្ត្រី ម៉េម៉ាយ អ្នករស់នៅជាមួយមេរោគអេដស៍ និងកុមារកំព្រា ។
ក្នុងឱកាសនោះដែរ ឯកឧត្តមបណ្ឌិត ឃឹម ប៊ុនសុង បានសម្តែងនូវការអរគុណចំពោះបងប្អូនសប្បុរសជន នៃសមាគម វី ឆាយរីថេបល ហ្វោនដេសិន ដែលមានសន្ដានចិត្តមនុស្សធម៌ ក្នុងការចូលរួមជាមួយសកម្មភាពមនុស្សធម៌ កាកបាទក្រហមកម្ពុជា ជាក់ស្តែងក្នុងការចុះមកផ្ទាល់ដល់មូលដ្ឋាន ទោះបីការធ្វើដំណើរឆ្ងាយមានការលំបាកយ៉ាងណាក៏ដោយ ក្នុងទឹកចិត្តមនុស្សធម៌ចំពោះប្រជាជនកម្ពុជា ៕
អត្ថបទ ៖ លោក អ៊ិន សីហរិទ្ធ
រូបថត ៖ សហការី
កែសម្រួលអត្ថបទ ៖ លីវ សាន្ត
