ឯកឧត្តម ភីធើ កាស្ស៊ីមៀ Peter Kazimir ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ នៃសាធារណរដ្ឋស្លូវាក នៅក្នុងដំណើរអញ្ជើញមកបំពេញទស្សនកិច្ចជាផ្លូវការនៅខេត្តសៀមរាប ឯកឧត្តមបានបង្ហាញអំពីគោលជំហរទូលំទូលាយ នៃការធ្វើឲ្យប្រសើរឡើងថែមទៀត នូវកិច្ចសហប្រតិបត្តិការរវាងប្រទេសពីរ!
តាមយន្តហោះពិសេសហោះត្រង់មកកាន់កម្ពុជា នៅថ្ងៃទី១៤ ខែកញ្ញា ឆ្នាំ២០១៨ គណៈប្រតិភូជាន់ខ្ពស់ នៃសាធារណរដ្ឋស្លូវ៉ាក ដែលដឹកនាំដោយ ឯកឧត្តម Peter Kazimir ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ នៃសាធារណរដ្ឋស្លូវ៉ាក គឺជាសក្ខីភាព ឆ្លុះបញ្ចាំងឲ្យឃើញអំពីចំណងមិត្តភាព សាមគ្គីភាព និងកិច្ចសហប្រតិបត្តិការ កាន់តែរឹងមាំ រវាងរដ្ឋាភិបាលនិងប្រជាជន នៃ ប្រទេសទាំងពីរ។
ក្នុងឱកាសរៀបចំបដិសណ្ឋារកិច្ច នៅឯអាកាសយានដ្ឋានអន្តរជាតិសៀមរាប ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប មានប្រសាសន៍ឲ្យដឹងថា ឯកឧត្តម Peter Kazimir ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ នៃសាធារណរដ្ឋស្លូវាក និងប្រតិភូរួមដំណើរ នឹងបំពេញទស្សនកិច្ចជាផ្លូវការ រយៈពេល២ថ្ងៃ នៅលើទឹកដីអង្គរ-សៀមរាប។
ក្នុងឱកាសនោះ
ក្នុងជំនួបបដិសណ្ឋារកិច្ចនាឱកាសនោះ ប្រតិភូកម្ពុជា គេក៏ឃើញមានវត្តមាន ឯកឧត្តម ហែម វណ្ណឌី អនុរដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ ឯកឧត្តមឃឹម ប៊ុនសុង អភិបាល អភិបាលខេត្តសៀមរាប ឯកឧត្តម អ៊ឹង ហឿន ប្រធានក្រុមប្រឹក្សាខេត្តស្តីទី និងវត្តមាន ឯកឧត្តមសមាជិក សមាជិកាក្រុមប្រឹក្សាខេត្ត និងមន្ត្រីអ្នកមុខអ្នកការមក ថ្នាក់ដឹកនាំ មន្ទីរ អង្គភាពក្នុងខេត្តជាច្រើនផងដែរ។
ក្នុងដំណើទស្សនកិច្ចនេះ ប្រតិភូជាន់ខ្ពស់ នៃសាធារណរដ្ឋស្លូវាក នឹងទៅទស្សនាតំបន់ទេសចរណ៍វប្បធម៌ ប្រវត្តិសាស្ត្រ និង ធម្មជាតិ នៃខេត្តសៀមរាប ក្នុងនោះរួមមានគោលដៅសំខាន់ៗចំនួនពីរ គឺ ប្រាសាទអង្គវត្ត នារសៀលថ្ងៃអាទិត្យទី១៤ ខែតុលា និង ព្រឹកថ្ងៃច័ន្ទទី១៥ ទស្សនាតំបន់ទេសចរណ៍ធម្មជាតិ ជីវចម្រុះបឹងទន្លេសាប ។
តាមការកត់សម្គាល់ជាប្រវត្តិសាស្ត្រ រវាងព្រះរាជាណាចក្រកម្ពុជា និង សាធារណរដ្ឋស្លូវ៉ាក ប្រទេសទាំងពីរបានភ្ជាប់កិច្ចទំនាក់ទំនងការទូតជាមួយគ្នាជាលើកដំបូង កាលពីអំឡុងឆ្នាំ១៩៩៧ ក្រោមការដឹកនាំដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
បន្ទាប់មកនៅឆ្នាំ២០០៦ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានយាងទៅបំពេញព្រះរាជកិច្ចផ្លូវរដ្ឋ នៅសាធារណរដ្ឋស្លូវ៉ាក និងជាការឆ្លើយតបនឹងចំណងការទូតដ៏ស្មោះស្ម័គ្ររបស់ព្រះរាជាណាចក្រកម្ពុជា នៅខែកញ្ញា ឆ្នាំ ២០១០កន្លងទៅ ឯកឧត្តម អ៊ីវ៉ាន ហ្កាស្ប៉ារ៉ូវ៉ិច (Ivan Gasparovic) ប្រធានាធិបតី នៃសាធារណរដ្ឋស្លូវ៉ាក និងប្រតិភូជាន់ខ្ពស់ បានអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជាវិញផងដែរ ។
យ៉ាងណាក៏ដោយ បើទោះជាប្រទេសទាំងពីរ នៅពុំទាន់មានស្ថានទូតនៅក្នុងប្រទេសរៀងៗខ្លួន ក៏ប៉ុន្តែប្រទេសទាំងពីរ បានបំពេញកិច្ចការជាច្រើន ក្នុងន័យបង្កើនចំណងមិត្តភាព សាមគ្គីភាពទ្វេភាគី ជាពិសេសគឺការពង្រីកនូវកិច្ចសហប្រតិបត្តិការរ កាន់តែរឹងមាំជាបន្តបន្ទាប់ ៕
អត្តបទ៖ងិន គឹមឡេង
កែសម្រួល៖សេង ផល្លី
