ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានបញ្ជាក់ថា បញ្ហានៃការជម្លៀសប្រជាពលរដ្ឋនៅមុខព្រះអង្គធំ និង ទឹកធ្លាក់លើខ្នងភ្នំគូលែន ឲ្យទៅនៅទីតាំងថ្មីនោះ អាជ្ញាធរខេត្ត បានរៀបចំគណៈកម្មការចម្រុះ ក្នុងការគ្រប់គ្របប្រជាពលរដ្ឋដែលរស់នៅទីនោះ ដើម្បីអាជ្ញាធរយើងធ្វើការកំណត់ឲ្យពួកគាត់មកបោះទីតាំងលំនៅដ្ឋានថ្មី ក្នុងការបញ្ជៀសនូវផលប៉ះពាល់ និង បំពុលបរិស្ថាននៅតំបន់រមណីយដ្ឋានធម្មជាតិ ដែលជាទីកន្លែងទីសក្ការៈបូជា របស់បងប្អូនប្រជាពុទ្ធបរិស័ទ និង ភ្ញៀវទេសចរណ៍ទៀតផង ។
ឯកឧត្តមបណ្ឌិត ឃឹម ប៊ុនសុង មានប្រសាសន៍យ៉ាងដូច្នេះ ក្នុងឱកាសជួបពិភាក្សាការងារបរិស្ថានជាមួយប្រតិភូក្រសួងបរិស្ថាន ដឹកនាំដោយឯកឧត្តម សៅ សុភាព រដ្ឋលេខាធិការក្រសួងបរិស្ថាន នៅសាលាខេត្តសៀមរាប កាលពីព្រឹក ថ្ងៃទី១១ ខែតុលា ឆ្នាំ២០១៨ម្សិលមិញនេះ ។
ក្នុងឱកាសជួបពិភាក្សានោះ ឯកឧត្តម សៅ សុភាព បានលើកឡើងពីគោលបំណងដែលបានផ្តោតជាសំខាន់លើបញ្ហានៃការថែរក្សាបរិស្ថាន ពិសេសការគ្រប់គ្រងសំរាម និងការរៀបចំសណ្តាប់ធ្នាប់នៅភ្នំគូលែន រួមជាមួយនឹងការទប់ស្កាត់នៃការកាប់ទន្ទ្រានរានព្រៃយកដីនៅតំបន់ឧទ្យាននៅលើភ្នំគូលែន ដែលធ្វើឲ្យមានការបាត់បង់ធនធានធម្មជាតិនៃរមណីយដ្ឋានធម្មជាតិប្រវត្តិសាស្ត្រ ស្របពេលដែលបច្ចុប្បន្ននេះ ការសាងសង់លំនៅដ្ឋានបាននឹងកំពុងមានការកើនឡើង ព្រមទាំងកសាងសំណង់រឹងមាំទៀតផង ខណៈពេលដែលខេត្តសៀមរាប មានតំបន់គោលដៅចំនួន៧កន្លែង ក្នុងកិច្ចការពារអភិរក្សរបស់បរិស្ថាន និង អំពីសារធាតុរបស់សហគមន៍ និង ជីវៈចម្រុះ រួមមាន ៖ ១. តំបន់ភ្នំគូលែន , ២. តំបន់អង្គរវត្ត , ៣. តំបន់តំបន់ឧទ្យានជាតិគូលែនព្រហ្មទេព , ៤. តំបន់បឹងទន្លេសាប , ៥. តំបន់ស្ទឹងសៀមរាប , ៦. តំបន់ក្រុងសៀមរាប និង ៧. តំបន់មួយចំនួនផ្សេងទៀតក្នុងខេត្តសៀមរាប រួមទាំងការងាររបស់គណៈកម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ ហៅកាត់ថា អាយស៊ីស៊ី-អង្គរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
