សមត្ថកិច្ចបានឲ្យដឹងថា កាលពីវេលាម៉ោងប្រមាណ៧យប់ ថ្ងៃទី០៤ ខែតុលា ឆ្នាំ២០១៨នេះ មានករណីគ្រោះថ្នាក់ចរាចរណ៍មួយបានកើតឡើង នៅត្រង់ចំណុចលើផ្លូវជាតិលេខ៦៨ ត្រង់ចន្លោះបង្គោលគីឡូម៉ែត្រលេខ ២៧ – ២៨ ស្ថិតក្នុងភូមិខ្វែក ឃុំមោង ស្រុកស្រីស្នំ ខេត្តសៀមរាប រវាងគោយន្តកន្ត្រៃយ៍ និង ម៉ូតូធំមិនស្គាល់ម៉ាក របស់ជនជាតិថៃ ដែលបើកបរស្របទិសគ្នាពីជើងទៅត្បូង បណ្ដាលឲ្យមនុស្ស២នាក់ បានទទួលរងរបួសធ្ងន់និងស្រាល ។
សមត្ថកិច្ចបានឲ្យដឹងទៀតថា ករណីនេះគឺ ពេលមកដល់ចំណុចកើតហេតុ ម៉ូតូធំរបស់ជនជាតិថៃ បានបុកគោយន្តកន្ត្រៃយ៍ពីក្រោយ ចំកង់ខាងក្រោយ ខាងឆ្វេងអ្នកបើកបរគោយន្តកន្ត្រៃយ៍ ម៉ាក Kubota ដែលបើកបរដោយឈ្មោះ តាយ ដា ភេទប្រុស អាយុ២៩ឆ្នាំ មុខរបរធ្វើស្រែ នៅភូមិព្រះភ្នំ ឃុំស្រែខ្វាវ ស្រុកអង្គរជុំ ខេត្តសៀមរាប មិនមានរបួសទេ រីឯអ្នកបើកបរម៉ូតូធំ មានឈ្មោះ សូផុន សាឡាក់ខាំ ( So Phon salakkham ) ភេទប្រុស អាយុ៤៨ឆ្នាំ ជាជនជាតិថៃ រស់នៅខេត្តអ៊ុកប៊ុនរាជធានី (Ubon Rat chathani) ប្រទេសថៃ បានទទួលរងរបួសធ្ងន់ និង អ្នករួមដំណើរជាមួយ ឈ្មោះ សុទ្ធិដា វិឈាន (Sut Thida Wichian ) ភេទស្រី អាយុ២៤ឆ្នាំ ជនជាតិថៃ រស់នៅទីក្រុងបាងកក ប្រទេសថៃបានទទួលរបួសស្រាល ។
យោងទៅតាមប្រសាសន៍របស់លោកអធិការនគរបាលស្រុកស្រីស្នំ បានឲ្យដឹងថា ចំពោះជនជាតិថៃទាំង០២នាក់ ដែលទទួលរងរបួសនោះ បានបញ្ជូនទៅព្យាបាលនៅប្រទេសថៃវិញ ដោយឡែកចំពោះ គោយន្តកន្ត្រៃយ៍ និងម៉ូតូធំ ០១គ្រឿង ដែលមិនអាចបើកបរកើត ត្រូវកម្លាំងសមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកស្រីស្នំ ដើម្បីរង់ចាំការដោះស្រាយតាមផ្លូវច្បាប់ ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
