នៅព្រឹកថ្ងៃទី០៣ ខែតុលា ឆ្នាំ២០១៩ លោក អៀង ពិសិដ្ឋ ត្រូវបានប្រកាសចូលកាន់មុខតំណែងជាអភិបាលស្រុកស្វាយលើថ្មី ជាផ្លូវការហើយ នៅសាលាស្រុកស្វាយលើ ខេត្តសៀមរាប ដោយជំនួស លោក ស៊ិក ប៊ុនស៊ិន អតីតអភិបាលស្រុក ដែលត្រូវបានចូលនិវត្ត។
មានវត្តមានជាអធិបតីក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានបញ្ជាក់ថា តាមច្បាប់ក្រឹត្យក្រមរបស់មន្ត្រីរាជការគ្រប់រូប ជាគណៈអភិបាលខេត្ត ក្រុង ស្រុក ដែលបានបម្រើការងារគ្រប់ អាណត្តិរបស់ខ្លួន ឬ ក៏បានគ្រប់អាយុបំពេញការងារ គឺត្រូវចូលនិវត្តន៍ មិនថាថ្នាក់ដឹកនាំ មន្ត្រី បុគ្គលិកឡើយ។ ហើយ ការប្រកាសចូលកាន់តំណែងជាអភិបាលស្រុកនេះ ក៏មានការជឿជាក់យ៉ាងច្បាស់ពីរាជរដ្ឋាភិបាល ក្រសួងមហាផ្ទៃ និង អាជ្ញាធរខេត្តចំពោះមន្ត្រីរាជការ ថ្នាក់ដឹកនាំនៅរដ្ឋបាលថ្នាក់ក្រោមជាតិ ក៏ដូចជាការលើកទឹកចិត្ត ឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ។
ជាមួយគ្នានេះ ឯកឧត្តមអភិបាលខេត្ត បានក្រើនរំលឹកដល់អភិបាលស្រុកស្វាយលើ ដែលត្រូវបានតែងតាំងថ្មី ត្រូវខិតខំបំពេញការងារ ដោយស្មារតីយកចិត្តទុកដាក់ ប្រឹងប្រែងឲ្យអស់ពីកម្លាំងកាយចិត្ត ប្រាជ្ញាស្មារតី និងមានការទទួលខុសត្រូវខ្ពស់ ដើម្បីបំពេញតម្រូវការរបស់ប្រជាពលរដ្ឋ និងត្រូវគោរពតាមរដ្ឋធម្មនុញ្ញ ច្បាប់ និង លិខិតបទដ្ឋានគតិយុត្តជាធរមាន របស់រាជរដ្ឋាភិបាលកម្ពុជា។ ក្នុងនោះដែរ ស្រុកស្វាយលើ ត្រូវពង្រីកវិស័យទេសចរណ៍នៅក្នុងសហគមន៍ ដោយមានការរួមសហការជាមួយមន្ទីរជំនាញ ស្ថាប័នពាក់ព័ន្ធ ដើម្បីជាផលប្រយោជន៍ជូនដល់ប្រជាពលរដ្ឋក្នុងមូលដ្ឋាននេះទាំងមូល។ មួយវិញទៀត គណៈអភិបាលស្រុក ត្រូវមានសាមគ្គីភាពផ្ទៃក្នុង ជាមួយមន្ត្រីរាជការ លើការដឹកនាំ គ្រប់គ្រង ការិយាល័យ និង អង្គភាពក្នុងស្រុកឲ្យបានល្អ និង បង្កើនការពង្រឹងនូវរបៀបរបបការងាររដ្ឋបាល នៅក្នុងសាលាស្រុក ព្រមទាំងមានការទំនាក់ទំនងឲ្យបានល្អជាមួយបណ្តា ស្ថាប័ន អង្គភាព លើការងារសន្តិសុខ សណ្តាប់ធ្នាប់ សុវត្ថិភាពដល់ភ្ញៀវទេសចរណ៍ និង ប្រជាជន៕
សូមជម្រាបថា ក្នុងឱកាសនោះ ក៏មានការប្រកាសចូលកាន់មុខតំណែងថ្មី របស់អភិបាលរងស្រុក ១រូប នាយករដ្ឋបាលសាលាស្រុក ១រូបផងដែរ។
គួរបញ្ជាក់ផងដែរថា ស្រុកស្វាយលើ មានតំបន់ទេសចរណ៍សំខាន់ៗ ដូចជា ប្រាសាទបេងមាលា ភ្នំគូលែន អេកូទេសចរណ៍ ទឹកធ្លាក់លើភ្នំគូលែន រួមនិងប្រាសាទបុរាណតូចធំជាច្រើនទៀត។
អត្ថបទ និង រូបថត ៖ លោក ខេង ឧត្តម និង ប៊ូ សាវី
កែសម្រួលអត្ថបទ ៖ លោក សេង ផល្លី
