ថ្ងៃទី០៣ ខែតុលា ឆ្នាំ២០១៩នេះ សមាគមក្រុមប្រឹក្សាថ្នាក់មូលដ្ឋានខេត្តសៀមរាប បានបើកមហាសន្និបាតអាណត្តិទី៣ របស់ខ្លួន នៅសាលប្រជុំសាលាខេត្តសៀមរាប ដើម្បីពិនិត្យកែសម្រួល និងអនុម័តសេចក្តីព្រាងលក្ខន្តិកៈ បទបញ្ជាផ្ទៃក្នុងរបស់សមាគម និងដំណើរការបោះឆ្នោតជ្រើសរើសអង្គអភិបាលកិច្ច របស់សមាគមសម្រាប់អាណត្តិទី៣ មានជាអាទិ៍ ប្រធាន-អនុប្រធាន សមាជិកក្រុមប្រឹក្សា និងសមាជិកគណៈកម្មាធិការប្រតិបត្តិសមាគម។
ថ្លែងក្នុងឱកាសបើកមហាសន្និបាតអាណត្តិទី៣នេះ ឯកឧត្តម សយ កុសល ប្រធានសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន បញ្ជាក់ថា ៖ សមាគមមួយនេះ មានតួនាទី-ភារកិច្ច ខុសពីសមាគមផ្សេងៗទៀត ដែលគ្រាន់តែជាមនុស្សមួយក្រុម ឬមនុស្សម្នាក់ មានឆន្ទៈរួចហើយសុំច្បាប់ចុះបញ្ជី និងធ្វើសកម្មភាពដោយឆន្ទៈនិងក្រោមច្បាប់តែប៉ុណ្ណោះ ។ ចំណែកឯ សមាគមក្រុមប្រឹក្សាក្រុង-ស្រុក ឃុំ-សង្កាត់ ឬហៅថា សមាគមក្រុមប្រឹក្សាថ្នាក់មូលដ្ឋាន មិនធ្វើសកម្មភាពតាមឆន្ទៈរបស់ខ្លួននោះទេ តែត្រូវបានធ្វើសកម្មភាព គាំទ្រទៅលើយន្តការកែទម្រង់វិមជ្ឈការ និងវិសហមជ្ឈការ ។
មានប្រសាសន៍ ក្នុងឱកាសនោះដែរ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប បានលើកឡើងថា មហាសន្និបាត របស់សមាគមក្រុមប្រឹក្សាថ្នាក់មូលដ្ឋានខេត្តសៀមរាបនេះ បានចូលរួមលើកកម្ពស់សមត្ថភាព និងការពារផលប្រយោជន៍ស្របច្បាប់ របស់ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាឃុំ ក្រុមប្រឹក្សាសង្កាត់ និងសមាជិក ក្រុមប្រឹក្សាក្រុង-ស្រុក ឃុំ-សង្កាត់នៅក្នុងខេត្តសៀមរាប បន្ទាប់ពីសមាគមមួយនេះ ត្រូវបានបង្កើតឡើងអស់រយៈពេលជាង ៥ឆ្នាំ តាមរយៈមហាសន្និបាតលើកទី២ បង្កើតសមាគម កាលពីថ្ងៃទី២១-២២ ខែមេសា ឆ្នាំ២០១៤កន្លងទៅនេះ។
ព័ត៌មានជាតិ ថ្មីៗ
ឯកឧត្តម អ៊ឹង ហឿន បានបន្ថែមថា នៅក្នុងអាណត្តិទី៥ នៃរដ្ឋសភា រាជរដ្ឋាភិបាលកម្ពុជាបាន បន្តផ្តល់អាទិភាពដល់ការអនុវត្តកំណែទម្រង់នេះ កាន់តែស៊ីជម្រៅដោយផ្តោតលើកិច្ចការសំខាន់ៗចំនួន ៥ រួមមាន៖ ទី១)-ពង្រឹងការគ្រប់គ្រងកិច្ចដំណើរការកំណែទម្រង់ ទី២)-ពង្រឹងគណនេយ្យភាពតាមបែបប្រជាធិបតេយ្យ ទី៣)-ពង្រឹងការគ្រប់គ្រង និងអភិវឌ្ឍធនធានមនុស្ស ទី៤)-ពង្រឹងការផ្តល់សេវាសាធារណៈ និងផ្ទេរមុខងាររបស់រដ្ឋបាលថ្នាក់ក្រោមជាតិ និងទី៥)-ពង្រឹងវិមជ្ឈការហិរញ្ញវត្ថុ។ កិច្ចការកំណែទម្រង់ទាំងអស់នេះ វាបានបង្កើតឡើងនូវវប្បធម៌ប្រជាធិតេយ្យនៅមូលដ្ឋាន ដោយមានការចូលរួមពីប្រជាពលរដ្ឋ ការលើកកម្ពស់គុណភាពសេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន ដែលឆ្លើយតបនឹងតម្រូវការ ជាក់ស្តែងរបស់ប្រជាពលរដ្ឋ សំដៅលើកស្ទួយគុណភាព នៃជីវិតរបស់ប្រជាពលរដ្ឋ និងចូលរួមកាត់បន្ថយភាពក្រីក្ររបស់ប្រជាពលរដ្ឋប្រកដោយប្រសិទ្ធភាព។
គួរបញ្ជាក់ថា សមាគមក្រុមប្រឹក្សាថ្នាក់មូលដ្ឋានខេត្តសៀមរាប ជាសមាគមឯករាជ្យ ត្រូវបានចុះបញ្ជីជាសមាគមនៅក្រសួងមហាផ្ទៃកាលពីថ្ងៃទី៥ខែសីហាឆ្នាំ២០១៤ ស្របតាមមាត្រា៤២នៃរដ្ឋធម្មនុញ្ញ។
សូមជម្រាបផងដែរថា មហាសន្និបាតនេះប្រព្រឹត្តិទៅរយៈពេលមួយថ្ងៃកន្លះ ចាប់ពីថ្ងៃទី៣ ដល់ទី៤ ខែតុលា ឆ្នាំ២០១៩ ដែលមានចូលរួមសរុប ចំនួន៣៤៧រូប មកពីមន្ទីរ អង្គភាព ស្ថាប័នពាក់ព័ន្ឋនានា អង្គការដៃគូ និងមានសមាសភាពចូលរួមជាប្រតិភូពេញសិទ្ឋមកពីក្រុងស្រុក ឃុំ សង្កាត់ទូទាំងខេត្តសៀមរាប។
អត្ថបទ និង រូបថត ៖ លោក យូ វង្ស និងលោក ងិន គឹមឡេង
កែសម្រួលអត្ថបទ ៖ លោក សេង ផល្លី
