នៅព្រឹកថ្ងៃទី០៣ ខែតុលា ឆ្នាំ២០១៩នេះ នៅសាលាស្រុកស្វាយលើ អភិបាលខេត្តសៀមរាប ឯកឧត្ដម ទៀ សីហា ណែនាំដល់ អភិបាលស្រុកទើបតែតាំងថ្មី សមត្ថកិច្ចជំនាញ និងមន្ដ្រីជំនាញរដ្ឋបាលព្រៃឈើ ក្នុងស្រុកស្វាយលើ ត្រូវចូលរួមទប់ស្កាត់ការរុករានកាន់កាប់ដីព្រៃរបស់រដ្ឋខុសច្បាប់ និង កម្ទេចចោល នូវមធ្យោបាយប្រព្រឹត្តិបទល្មើសព្រៃឈើ។
ឆ្លៀតក្នុងឱកាស ពិធីប្រកាសចូលកាន់មុខតំណែងថ្មី របស់អភិបាលស្រុក អភិបាលស្រុករង និងនាយករដ្ឋបាល នៅសាលាស្រុកស្វាយលើ ខេត្តសៀមរាប ឯកឧត្ដម ទៀ សីហា បានលើកយកបញ្ហាបទល្មើសព្រៃឈើ ជាបញ្ហាប្រឈមខ្លាំង របស់ស្រុកស្វាយលើ ដែលជាផ្លូវឆ្លងកាត់ដឹកជញ្ជូនបទល្មើសព្រៃឈើ និងមានព្រំប្រទល់ជាប់នឹងខេត្តព្រះវិហារ។ ក្នុងនោះ ឯកឧត្ដម ទៀ សីហា បានមានប្រសាសន៍ថា នៅតាមបណ្ដាខេត្ដផ្សេងៗ គេបានអនុវត្ដទប់ស្កាត់បទល្មើសព្រៃឈើរួចហើយ ដោយចាប់បានបទល្មើសព្រៃឈើ សមត្ថកិច្ចបានកំទេចចោលនូវមធ្យោបាយចោល ប៉ុន្ដែសម្រាប់ខេត្ដសៀមរាប មិនទាន់បទល្មើានសព្រៃឈើដែលត្រូវអនុវត្ដបែបនេះនៅឡើយទេ ។
ឯកឧត្ដម ទៀ សីហា បាន បញ្ជាក់ថា ការការពារថែរក្សាព្រៃឈើឲ្យបានគង់វង្ស វាបានជួយដល់ជីវភាពប្រជាពលរដ្ឋក្នុងមូលដ្ឋាន តាមរយៈការបង្កើតតំបន់ទេសចរណ៍ធម្មជាតិ ហើយក៏បានចូលរួមជួយលើកកម្ពស់វិស័យទេសចរណ៍ក្នុងខេត្តប្រវត្តិសាស្ត្រមួយនេះ ឲ្យកាន់តែសំបូរបែបផងដែរ
ព័ត៌មានជាតិ ថ្មីៗ
ជាមួយគ្នានោះដែរ ឯកឧត្ដមអភិបាលខេត្ត ក៏បានលើកពីបញ្ហាកាប់ទន្ទ្រានដីព្រៃរបស់រដ្ឋ របស់ប្រជាពលរដ្ឋចំណូលថ្មី លោកអភិបាលស្រុកថ្មី ត្រូវចាត់វិធានការតាមផ្លូវច្បាប់ ហើយបើមានជម្លោះដីធ្លី ត្រូវដោះស្រាយជូនប្រជាពលរដ្ឋភ្លាមៗនៅមូលដ្ឋាន។ ដោយឡែក ក្នុងករណី ដោះស្រាយមិនចេញត្រូវបញ្ជូន ដល់សាលាខេត្ដ ដែលមានគណៈកម្មការចាំដោះស្រាយ។
បើយោងតាមរបាយការណ៍ អាជ្ញាធរស្រុកស្វាយលើ បានសហការចុះល្បាត និង បង្ក្រាបបទល្មើសធនធានធម្មជាតិសរុប២០១៥ លើក និងបិទខិតប័ណផ្សព្វផ្សាយចំនួន ១៩១២ សន្លឹក ដកហូតវត្ថុតាង មានរណាយន្ត ត្រាក់ទ័រភ្ជួរដី អេស្កាវាទ័រ គោយន្តកន្ត្រៃ និងដីព្រៃ ព្រមទាំងធ្វើកិច្ចសន្យាបញ្ឈប់ និងបញ្ជូនទៅស្ថាប័នមានសមត្ថកិច្ចតាមនីតិវិធីច្បាប់។ព្រមទាំងបានសហការការពារដីព្រៃរបស់រដ្ឋជាប្រចាំនិងដាំកូនឈើលើតំបន់ដីដែលរិចរិលនៅក្នុងព្រៃសហគមន៍និងតំបន់ការពារបានចំនួន៤លើកផងដែរ៕
អត្ថបទ និង រូបថត ៖ លោក ប៊ូ សាវី
កែសម្រួលអត្ថបទ ៖ លោក សេង ផល្លី
