នៅព្រឹកថ្ងៃទី ៤ ខែ តុលា ឆ្នាំ ២០១៩ ឯកឧត្តម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន បានអញ្ជើញទៅគោរពវិញ្ញាណក្ខន្ធសព លោកឧត្តមសេនីយ៏ត្រី ធូ ចំរ៉ុង ហៅនាយ សាន ម៉ៅ ដែលត្រូវបានក្រុមគ្រួសារតម្កល់ ធ្វើបុណ្យតាមប្រពៃណីព្រះពុទ្ធសាសនា នៅទីអារាមវត្ត ព្រែកប្រា សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
គួរបញ្ជាក់ថា តារាកំប្លែងជើងចាស់ ដ៏មានប្រជាប្រិយភាព នាយសាន ម៉ៅ បានទទួលមរណភាព នៅថ្ងៃទី០២ ខែតុលា ឆ្នាំ២០១៩ វេលាម៉ោង ០៦ល្ងាច នៅឯ មន្ទីរពេទ្យ ប្រទេសថៃ ក្នុងជន្មាយុ ៦០ ឆ្នាំ ដោយជរាពាធ ។
នៅក្នុងឱកាសដ៏ក្រៀមក្រំនោះ ឯកឧត្តម រដ្ឋមន្ត្រី ខៀវ កាញារីទ្ធ បានសម្ដែង នូវការចូលរួមមរណៈទុក្ខ និងបង្ហាញពីអារម្មណ៏សោកស្ដាយ និង ក្រៀមក្រំជាទីបំផុត។ ការបាត់បង់រូបលោក ធូ ចំរ៉ុង គឺជាការបាត់នូវស្វាមី បិតា ជីតា ជាទី ស្រឡាញ់ និងជាការបាត់បង់នាយទាហានមួយរូប ពោរពេញទៅដោយ មនសិការ ស្នេហាជាតិ ដែលក្នុងមួយជីវិតរបស់លោក បានធ្វើ ពលិកម្មគ្រប់បែបយ៉ាង ក្នុងបុព្វហេតុ ជាតិ សាសនា ព្រះមហាក្សត្រ ជាពិសេស ក្នុង បុព្វហេតុ ការពារជាតិ មាតុភូមិ និងប្រជាជនកម្ពុជាកន្លងមក ប្រកបដោយភក្តីភាព ។
សូមជម្រាបថា សពរបស់ លោក ធូ សំរ៉ុង ហៅនាយ សាន ម៉ៅ នឹងត្រូវធ្វើពិធីបុណ្យបូជា នៅថ្ងៃសៅរ៏ទី ៥ ខែ តុលា ឆ្នាំ ២០១៩ នាបរិវេណវត្ត ព្រែកប្រា សង្កាត់ ព្រែកថ្មី ខណ្ឌ ច្បារអំពៅ រាជធានីភ្នំពេញ។
អត្ថបទ និង រូបភាព ៖ក្រសួងព័ត៌មាន
កែសម្រួលអត្ថបទ ៖ លោក សេង ផល្លី
