ទូរទស្សន៍ BBC ចេញផ្សាយនៅថ្ងៃចន្ទ ទី៧ ខែតុលានេះបានឲ្យដឹងថា ប៉ូលីសនៃទីក្រុង Kansas សហរដ្ឋអាមេរិក បានចាប់ផ្តើមបេសកកម្មតាមចាប់ខ្លួនជនង្ស័យចំនួន ២នាក់ ដែលស្ថិតនៅក្នុងហេតុការណ៍ បាញ់ប្រហារគ្នាស្លាប់មនុស្ស ៤នាក់ និងរបួស ៥នាក់កាលពីយប់ថ្ងៃអាទិត្យ។
ហេតុការណ៍នេះ បានកើតឡើងនៅក្នុងបារមួយកន្លែង មានឈ្មោះថា Tequila KC នៅវេលាម៉ោងប្រមាណជា ១និង៣០នាទីទៀបភ្លឺ។ ទោះបីជាកំណត់បានមុខសញ្ញាដែលជាខ្មាន់កាំភ្លើង២រូបតាមរយៈកាម៉េរាសុវត្ថិភាព ប៉ុន្តែប៉ូលីសមិនបានធ្វើការប្រកាសអត្តសញ្ញាណរបស់គេនៅឡើយ។
តាមការអះអាងរបស់បុគ្គលិកជាអ្នកក្រឡុកស្រាម្នាក់ បានបញ្ជាក់ថា ហេតុការណ៍បាញ់ប្រហារនេះ កើតឡើងដោយសារតែខ្លួន បានបដិសេធមិនព្រមផ្តល់ សេវាកម្មភេសជ្ជៈដល់បុរស ជាជនសង្ស័យដែលធ្លាប់បង្ក បញ្ហាម្តងហើយនៅទីនេះកាលពីខែមុន។ មួយម៉ោងក្រោយមកបុរស ជាជនសង្ស័យបាននាំគ្នាមកម្នាក់ទៀត ជាមួយនឹងកាំភ្លើងខ្លីផង បើកការបាញ់ប្រហារតែម្តង ខណៈដែលបារកំពុងមានវត្តមាន របស់ភ្ញៀវប្រហែលជា ៤០នាក់៕
ប្រភព៖ដើមអំពិល
ប្រែសម្រួល: ស៊ុន លី
