ឯកឧត្ដម នេត្រ ភក្ដ្រា រដ្ឋលេខាធិការ និង អ្នកនាំពាក្យក្រសួងបរិស្ថាន បានមានប្រសាសន៍នៅព្រឹកថ្ងៃទី០៧ ខែតុលា ឆ្នាំ២០១៩នេះថា នៅក្នុងកិច្ចប្រជុំបរិស្ថានអាស៊ានលើកទី១៥នេះ ថ្នាក់ឧត្ដមមន្ដ្រី នឹងជជែកពិភាក្សា និងចែករំលែកបទពិសោធន៍ រវាងប្រទេសមួយទៅប្រទេសមួយទៀត ទៅលើការគ្រប់គ្រងសាលាមេត្រីបរិស្ថាន ដើម្បីធ្វើយ៉ាងណាឲ្យសមាជិកអាស៊ាន មានការគ្រប់គ្រងសាលាមេត្រីបរិស្ថានឲ្យបានល្អនៅក្នុងសាលា ហើយសាលាដែលទទួលស្គាល់ជាសាលាមេត្រីបរិស្ថាន ត្រូវបានទទួលស្គាល់គោលការណ៍៤សំខាន់ គឺទី១. គណៈគ្រប់គ្រងសាលាត្រូវមានការគ្រប់គ្រងអនាម័យបរិស្ថានល្អ , ទី២. ការបញ្ជ្រាបការនូវចំណេះអំពីអប់រំបរិស្ថានដល់ការសិក្សានៃសិស្សានុសិស្ស , ទី៣. ការបង្កើតស្លាកសញ្ញាផ្សេងៗពីបរិស្ថានដល់សិស្ស នៅក្នុងសាលា និងទី៤.ការភ្ជាប់រវាងសាលា និងសហគមន៍មូលដ្ឋាន ដើម្បីឲ្យពួកគាត់ចូលរួមពីចំណេះដឹងបរិស្ថានល្អ។
ឯកឧត្ដម នេត្រ ភក្ដ្រា មានប្រសាសន៍បន្ថែមថា សាលាមេត្រីភាពបរិស្ថាន មានសារៈសំខាន់ យ៉ាងខ្លាំងទាំងសិស្ស និងប្រជាពលរដ្ឋ នៅក្នុងតំបន់ប្រទេសអាស៊ាន ព្រោះថា សាលារៀនជាថ្នាលបណ្ដុះបណ្ដាលធនធានមនុស្សឲ្យស្រឡាញ់និងគោរពបរិស្ថាន ដែលចាប់ផ្ដើមចេញតាំងពីកុមារភាព ពោលធ្វើយ៉ាងណាឲ្យសិស្សានុសិស្សចេះការពារបរិស្ថាន ដូចជាមិនប្រើប្រាស់ថង់ផ្លាស់ទិក និងចេះញែកសំរាមរឹង និងសំរាមរាវជាដើម ហើយសាលារៀនដែលបានអនុវត្ដល្អជាសាលាមេត្រីភាពបរិស្ថាន នៅក្នុងប្រទេសកម្ពុជា មានសាលាវិទ្យាល័យពួក ស្ថិតនៅស្រុកពួក ខេត្ដសៀមរាប។
ឯកឧត្ដម នេត្រ ភក្ដ្រា មានប្រសាសន៍បន្ថែមទៀតថា នៅថ្ងៃទី០៨ ខែតុលា ឆ្នាំ២០១៩ស្អែកនេះ ក្នុងខណៈដែលឧត្ដមមន្ដ្រីអាស៊ានចូលរួមកិច្ចប្រជុំជាង១០០នាក់នោះ នឹងធ្វើទស្សនៈកិច្ចនៅសាលាមេត្រីភាពបរិស្ថានដែលបានអនុវត្ដន៍ល្អនៅវិទ្យាល័យពួក ដើម្បីឲ្យថ្នាក់ឧត្ដមមន្ដ្រីមើលឃើញថា ការរៀបចំបរិស្ថានល្អនៃសាលានោះ មានភាពខុសគ្នារវាងសាលាមេត្រីភាព នៅក្នុងប្រទេសកម្ពុជា និងនៅក្នុងតំបន់អាស៊ាន ហើយកិច្ចប្រជុំនេះ នឹងមានផ្ដល់ពានរង្វាន់ដល់សាលាមេត្រីបរិស្ថាននិងយុវជនឆ្នើមអាស៊ាន ដែលដើរតួនាទីសំខាន់ក្នុងការចូលរួមក្នុងវិស័យបរិស្ថាល្អផងដែរ ។
សូមបញ្ជាក់ថា ព្រះរាជាណាចក្រកម្ពុជាធ្វើជាម្ចាស់ផ្ទះរៀបចំកិច្ចប្រជុំលើកទី១៥ រដ្ឋមន្ត្រីបរិស្ថានអាស៊ាន និងកិច្ចប្រជុំពាក់ព័ន្ធឆ្នាំ២០១៩ ចាប់ពីថ្ងៃទី៧-១០ខែតុលា ឆ្នាំ២០១៩ នៅលើទឹកដីនៃខេត្តសៀមរាបអង្គរ និង ប្រកាសជាផ្លូវការ ថ្ងៃទី០៨ ខែតុលា ឆ្នាំ២០១៩ ដោយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ តំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានសមាសភាពចូលរួមពីរដ្ឋមន្ត្រីបរិស្ថានអាស៊ាន ឧត្តមមន្ត្រី និងគណៈប្រតិភូទាំង១០ប្រទេសអគ្គលេខាធិការអាស៊ាន រដ្ឋមន្ត្រីបរិស្ថានមកពីប្រទេសចិន ជប៉ុន កូរ៉េ រុស្សី អាមេរិក ឥណ្ឌា អូស្ត្រាលី និងនូវែលហ្សេឡង់ ៕
អត្ថបទ និង រូបថត : លោក បូ សាវី
កែសម្រួលអត្ថបទ : លោក លីវ សាន្ត
