នៅរសៀលថ្ងៃទី០៧ ខែតុលា ឆ្នាំ២០១៩នេះ នេះកម្ពុជាបានធ្វើជាម្ចាស់ផ្ទះក្នុងការរៀបចំសិក្ខាសាលាបណ្ដុះបណ្ដាលចំនួនពីរ និងកិច្ចប្រជុំចំនួនមួយ គឺសិក្ខាសាលាបណ្ដុះបណ្ដាលក្រុមអ្នកជំនាញប្រឹក្សាយោបល់សម្រាប់ប្រទេសតំបន់អាស៊ី-ប៉ាស៊ីហ្វិក និងតំបន់អ៊ឺរ៉ុបខាងកើត ស្ដីពីការគ្រប់គ្រងទិន្នន័យសម្រាប់ការធ្វើសារពើភ័ណ្ឌឧស្ម័នផ្ទះកញ្ចក់ជាតិ សិក្ខាសាលាបណ្ដុះបណ្ដាលសម្រាប់អ្នកជំនាញពិនិត្យរបាយការណ៍សារពើភ័ណ្ឌឧស្ម័នផ្ទះកញ្ចក់ និង កិច្ចប្រជុំក្រុមអ្នកជំនាញប្រឹក្សាយោបល់លើការងារប្រែប្រួលអាកាសធាតុ នៅខេត្ដសៀមរាប ដែលរៀបចំឡើងដោយនាយកដ្ឋានប្រែប្រួលអាកាសធាតុ នៃអគ្គលេ ខធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព ក្រោមកិច្ចសហប្រតិបត្តិការ និងឧបត្ថម្ភដោយលេខាធិការដ្ឋានអនុសញ្ញាក្របខ័ណ្ឌសហប្រជាជាតិ ស្ដីពីការប្រែប្រួលអាកាសធាតុ ។
ឯកឧត្តម ទិន ពន្លក អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព បានមានប្រសាសន៍ថា សិក្ខាសាលា និងកិច្ចប្រជុំនេះ គឺជាវេទិកាដ៏សំខាន់សម្រាប់កិច្ចពិភាក្សាពីបញ្ហាប្រែប្រួលអាកាសធាតុ និងបរិស្ថាននៅក្នុងតំបន់អាស៊ី-ប៉ាស៊ីហ្វិក និងតំបន់អ៊ឺរ៉ុបខាងកើត ដូចយើងទាំងអស់គ្នាបានដឹងហើយថា ការប្រែប្រួលអាកាសធាតុ គឺកើតមានពិតប្រាកដ និងបានបង្កនូវផលប៉ះពាល់យ៉ាងខ្លាំងដល់ការអភិវឌ្ឍសេដ្ឋកិច្ច សង្គម និងបរិស្ថាន ក្នុងនោះសកម្មភាពមនុស្ស បានបញ្ចេញនូវឧស្ម័នផ្ទះកញ្ចក់ដ៏ច្រើនលើសលុប ជាពិសេសការបញ្ចេញឧស្ម័នកាបូនិក តាមរយៈវិស័យថាមពល ដឹកជញ្ជូន កសិកម្ម ការកាប់បំផ្លាញព្រៃឈើ សំរាម និងសំណល់ បានបញ្ចេញនូវឧស្ម័នផ្ទះកញ្ចក់ដែលបង្កឱ្យកើនឡើងកម្ដៅពិភពលោក និងបណ្ដាលឱ្យមានការប្រែប្រួលអាកាសធាតុ ដូចជាការកើនឡើងនូវសីតុណ្ហភាព កើនឡើងនូវកម្ពស់ទឹកសមុទ្រ និងការប្រែប្រួលមិនទៀងទាត់នៃរបបទឹកភ្លៀង ដែលបង្កនូវផលប៉ះពាល់ធ្ងន់ធ្ងរដល់ជីវិតមនុស្ស បង្កការខូចខាតដល់សេដ្ឋកិច្ច និងបរិស្ថានផងដែរ។
ឯកឧត្តម ទិន ពន្លក មានប្រសាសន៍បន្ថែមថា កម្ពុជាជាប្រទេសដែលងាយរងគ្រោះដោយសារផលប៉ះពាល់ពីការប្រែប្រួលអាកាសធាតុនេះ ដោយសារសេដ្ឋកិច្ចពឹងផ្អែកលើផ្នែកកសិកម្ម ហេដ្ឋារចនាសម្ព័ន្ធ ធនធានមនុស្សនៅមានកម្រិត កង្វះនូវធនធានថវិកា និងបច្ចេកវិទ្យាសម្រាប់ការឆ្លើយតបនឹងការប្រែប្រួលអាកាសធាតុ ខណៈដែលរាជរដ្ឋាភិបាលកម្ពុជា បានខិតខំប្រឹងប្រែងក្នុងការឆ្លើយតបនឹងការប្រែប្រួលអាកាសធាតុទាំងនៅក្នុងប្រទេស និងទាំងការចូលរួមជាមួយសហគមន៍អន្តរជាតិ ហើយនៅកម្រិតជាតិ រាជរដ្ឋាភិបាលបានរៀបចំ និងអនុម័តនូវផែនការយុទ្ធសាស្ត្រប្រែប្រួលអាកាសធាតុកម្ពុជា ២០១៤-២០២៣ ផែនការយុទ្ធសាស្ត្រ និងផែនការសកម្មភាពប្រែប្រួលអាកាសតាមវិស័យ បានវិភាជន៍ថវិកា បានសហការជាមួយដៃគូអភិវឌ្ឍន៍ និងវិស័យឯកជន ក្នុងការអនុវត្តការងារប្រែប្រួលអាកាសធាតុ ដូចជាការកសាងសមត្ថភាពថ្នាក់ជាតិ សម្រាប់ការឆ្លើយតបនឹងការប្រែប្រួលអាកាសធាតុនេះ ។
ឯកឧត្តម ទិន ពន្លក មានប្រសាសន៍បន្ថែមទៀតថា កម្ពុជាបានផ្ដល់សច្ចាប័នដល់កិច្ចព្រមព្រៀងទីក្រុងប៉ារីស និងបានដាក់ជូននូវរបាយការណ៍រួមចំណែករបស់ម្ពុជាក្នុងការអនុវត្តអនុសញ្ញាក្របខ័ណ្ឌសហប្រជាជាតិ ស្ដីពីការប្រែប្រួលអាកាសធាតុ ដូចនេះក្នុងនាមជាប្រទេសសមាជិកអនុសញ្ញា កម្ពុជាត្រូវផ្ដល់នូវព័ត៌មានស្ដីពីការបញ្ចេញឧស្ម័នផ្ទះកញ្ចក់ និងសកម្មភាពក្នុងការកាត់បន្ថយឧស្ម័នផ្ទះកញ្ចក់ ក៏ដូចជាសកម្មភាពបន្ស៊ាំ មធ្យោបាយអនុវត្ត ដូចជាធនធានហិរញ្ញវត្ថុ ការផ្ទេរបច្ចេកវិទ្យា និងការកសាងសមត្ថភាព ហើយកម្ពុជា ត្រូវដាក់ជូនទៅលេខាធិការដ្ឋានអនុសញ្ញានូវរបាយការណ៍សារពើភ័ណ្ឌឧស្ម័នផ្ទះកញ្ចក់មួយ ដែលមានលក្ខណៈគ្រប់ជ្រុងជ្រោយ និងមានព័ត៌មានជាក់លាក់។
ការវាស់វែង របាយការណ៍ ផ្ទៀងផ្ទាត់ និងតម្លាភាពនៃសកម្មភាពកាត់បន្ថយឧស្ម័នផ្ទះកញ្ចក់ កាន់តែមានសារសំខាន់ខ្លាំងឡើង ហេតុដូចនេះ សារពើភ័ណ្ឌឧស្ម័នផ្ទះកញ្ចក់មានតួនាទីសំខាន់ក្នុងការផ្ដល់ជាមូលដ្ឋានសម្រាប់អ្នកធ្វើការសម្រេចចិត្តក្នុងការរៀបចំនិងអនុវត្តផែនការយុទ្ធសាស្ត្រក្នុងប្រទេសនីមួយៗក្នុងការកាត់បន្ថយឧស្ម័នផ្ទះកញ្ចក់ ហើយសិក្ខាសាលានេះ ជាវេទិកាសំខាន់សម្រាប់ឱ្យសមាជិកចូលរួម បានចែករំលែកនូវបញ្ហា ក៏ដូចជាបទពិសោធន៍ក្នុងការគ្រប់គ្រង និងរៀបចំសារពើភ័ណ្ឌឧស្ម័នផ្ទះកញ្ចក់ ក៏ដូចជាស្វែងរកដំណោះស្រាយនូវបញ្ហាទាំងនោះតាមរយៈការជួយពីអ្នកជំនាញ។
សូមជម្រាបថា នេះគឺជាលើកទី២ហើយ ដែលកម្ពុជាបានធ្វើជាម្ចាស់ផ្ទះសម្រាប់កិច្ចប្រជុំ និងសិក្ខាសាលានេះ ដែលលើកទី១ បានប្រព្រឹត្តទៅនៅឆ្នាំ២០១៧ នាក្រុងសៀមរាបដូចគ្នានេះដែរ ៕
អត្ថបទ និង រូបថត : លោក បូ សាវី
កែសម្រួលអត្ថបទ : លោក លីវ សាន្ត
