នាវាល្បាតមួយគ្រឿងរបស់ជប៉ុន និងទូកនេសាទមួយគ្រឿងរបស់កូរ៉េខាងជើង បានបុកគ្នានៅក្នុងដែនសមុទ្រជប៉ុន ជិតតំបន់មួយដែលពេញនិយមបំផុតក្នុងការនេសាទ ប៉ុន្តែពុំមានការបញ្ជាក់អំពីមនុស្សបាត់បង់ជីវិត ឬក៏រងរបួសនៅក្នុងហេតុការណ៍នោះនៅឡើយទេ។ នេះបើតាមការចេញផ្សាយព័ត៌មាន ដោយទូរទស្សន៍ជប៉ុន NHK នាព្រឹកថ្ងៃចន្ទ ទី០៧ ខែតុលា ឆ្នាំ២០១៩។
ព័ត៌មានបានឲ្យដឹងថាទៀតថា ក្រោយការបុកគ្នាខាងលើនេះ ទូកនេសាទកូរ៉េខាងជើងបានលិច ហើយមនុស្សយ៉ាងហោចណាស់ ២០នាក់ត្រូវធ្លាក់ទៅក្នុងទឹកសមុទ្រ។ ជប៉ុនបានអះអាងថា ឧប្បដិហេតុបានកើតឡើងនៅដែនទឹកស្ថិតនៅចម្ងាយជិត ៣០០គីឡូម៉ែត្រពីឧបទ្វីបណូតុ (Noto) ដែលនេះមានន័យថា ទូកនេសាទកូរ៉េខាងជើងដែលត្រូវបានបុកលិចខាងលើនេះ បានចូលមកធ្វើសកម្មភាពនេសាទដោយខុសច្បាប់ នៅក្នុងដែនទឹកសេដ្ឋកិច្ចផ្តាច់មុខរបស់ជប៉ុន។
គួរបញ្ជាក់ថា ឧប្បដិហេតុនេះបានកើតឡើង បន្ទាប់ពីជប៉ុនបានបញ្ចេញយុទ្ធនាការក្តៅ ដើម្បីបង្ក្រាបសកម្មភាពនេសាទខុសច្បាប់ នៅក្នុងដែនទឹកសេដ្ឋកិច្ចផ្តាច់មុខរបស់ខ្លួន ក្នុងតំបន់សមុទ្រជប៉ុន ខណៈកន្លងមកគឺទូកនេសាទកូរ៉េខាងជើងជាច្រើន តែងត្រូវបានគេរាយការណ៍ថា បានបំពានចូលមកកាន់តំបន់នេះ។ សម្រាប់ប្រទេសទាំងពីរជប៉ុន និងកូរ៉េខាងជើង គឺគ្មានទំនាក់ទំនងការទូតនោះឡើយ៕
