វគ្គពង្រឹងសមត្ថភាពស្ដីពីសារព័ត៌មានឌីជីថល និងការទប់ស្កាត់ព័ត៌មានក្លែងក្លាយដែលរៀបចំដោយអគ្គនាយកដ្ឋានព័ត៌មាននិងសោតទស្សន៍នៃក្រសួងព័ត៌មានបានធ្វើឡើងនាព្រឹកថ្ងៃទី០៩ ខែតុលា ឆ្នាំ២០១៩ ក្រោមវត្តមានអញ្ជើញជាអធិបតីភាព ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននិងមានគ្រូឧទ្ទេសនាមដោយ ឯកឧត្តម មឿន ឈានណារិទ្ធ ទីប្រឹក្សាក្រសួងព័ត៌មាននិងជាសាស្ត្រាចារ្យផ្នែកសារព័ត៌មាននៅសាកលវិទ្យាល័យកម្ពុជា និងសាកលវិទ្យាល័យបញ្ញាសាស្ត្រ។
តាមការបញ្ជាក់របស់ ឯកឧត្តម យ៉ែម ណយ ទីប្រឹក្សាក្រសួងព័ត៌មាន និង ប្រធាននាយកដ្ឋានព័ត៌មាន បានអោយដឹងថា វគ្គពង្រឹងសមត្ថភាពនេះ រៀបចំឡើង ដើម្បីផ្តល់ចំណេះដឹង និងជំនាញដល់មន្ត្រីព័ត៌មាននៃក្រសួងព័ត៌មាន ទាក់ទងនឹងសារព័ត៌មានឌីជីថល ស្ថានភាពនៃសារព័ត៌មាននៅក្នុងប្រទេសកម្ពុជា ដោយផ្តោតជាក់លាក់ទៅលើរបៀបយកព័ត៌មាន និងការសរសេរព័ត៌មានឌីជីថល ព្រមទាំងវិធីសាស្ត្រ មួយចំនួនក្នុងការទប់ស្កាត់ព័ត៌មានក្លែងក្លាយ។ មន្ត្រីព័ត៌មាននៃក្រសួងព័ត៌មាន នឹងបានយល់នូវភាពខុសគ្នារវាងរបៀបសរសេរ ព័ត៌មានបែបប្រពៃណី ដែលចុះផ្សាយក្នុងកាសែត វិទ្យុ ទូរទស្សន៍ និងព័ត៌មានឌីជីថល ដែលផ្សាយតាមប្រព័ន្ធអ៊ីនថឺណិត និងប្រព័ន្ធផ្សព្វផ្សាយសង្គម។ បន្ទាប់ពីបញ្ចប់ វគ្គពង្រឹងសមត្ថភាពនេះ សិក្ខាកាមទាំងអស់ នឹងបានយល់អំពីអ្វីទៅជា សារព័ត៌មានឌីជីថល របៀបសរសេរព័ត៌មានឌីជីថលដែលទាក់ទាញ ព្រមទាំង រចនាសម្ព័ន្ធអត្ថបទព័ត៌មានឌីជីថលទាំងមូល។
មានប្រសាសន៏បើកវគ្គនាឱកាសនោះ ឯកឧត្តមរដ្ឋមន្ត្រី ខៀវ កាញារីទ្ធ បាន ចាត់ទុកវគ្គបណ្តុះបណ្តាលនេះថា ជាវគ្គបណ្តុះបណ្តាលមានសារះសំខាន់សម្រាប់មន្ត្រី ព័ត៌មាន ឲ្យបានយល់ដឹងពីការសរសេរព័ត៌មានឌីជីថល និងការទប់ស្កាត់ព័ត៌មាន ក្លែងក្លាយ។ តាមរយនេះដែរ ក្រសួងព័ត៌មាន គ្រោងរៀបចំបើកវគ្គបណ្តុះបណ្តាល ដល់ អ្នកសារព័ត៌មាន អោយបានយល់ដឹងពី គណៈកម្មាធិការវប្បធម៏ អាស៊ាន វគ្គបណ្តុះ បណ្តាលការយកព័ត៌មានតាមរយះទូរសព្ទ័ដៃស្មាតហ្វូត ដើម្បីថតផ្សាយបាន ដោយងាយស្រួល។ ជាមួយនេះដែរក៏នឹងធ្វើការបណ្តុះបណ្តាលផ្នែកច្បាប់ ដើម្បី ឲ្យមន្ត្រីព័ត៌មាន បានយល់ដឹងនូវអ្វីដែលនៅជុំវិញខ្លួន ក៏ដូចជាកិច្ចការងារ និងច្បាប់ផ្សេងៗ។
ទាក់ទងទៅនឹងការងារព័ត៌មាន ឯកឧត្តមរដ្ឋមន្ត្រី ខៀវ កាញារីទ្ធ បាន លើកឡើងថា កាលពីចុងសតវត្សទី ២០ នៅមានប្រពន្ធ័អ៊ិនថ័រណិតកើតមានឡើង ហើយបានប្រើប្រាស់ ធ្វើឲ្យមនុស្សមានការរីកចំរើន ដោយទទួលបានព័ត៌មាន គ្រប់គ្រាន់ ដើម្បីតាមដានពិនិត្យ និងសម្រេចកិច្ចការងារផ្សេងៗ ។ ប៉ុន្តែនៅក្នុងសតវត្សទី២១នេះ ជាសតវត្សនៃលំហូរព័ត៌មាន គឺមានព័ត៌មានច្រើនណាស់ ធ្វើឲ្យមនុស្សមើលមិនអស់នោះទេ ដោយជ្រើសរើសយកតែព័ត៌មានណាដែលស្របទៅនឹងគំនិត និងអ្វីដែលខ្លួនពេញចិត្តដោយមិនបានយកព័ត៌មានទាំងអស់នោះ មកធ្វើការថ្លឹងថ្លែងនោះទេ ដែលជាមូលហេតុបង្កទៅជាបាតុភាពព័ត៌មានក្លែងក្លាយ។ ឯកឧត្តមរដ្ឋមន្ត្រីបានលើកនូវប្រសាសន៍របស់លោក ដូណាល់ ត្រាំ ប្រធានាធិបតីអាមេរិក ដែលបានលើកឡើងថា សម័យក្រោយសច្ចធម៌ គឺព័ត៌មានខ្លះពិត ប៉ុន្តែគេបានបន្ថែមបន្តិចបន្ទួច ឲ្យក្លាយទៅជាការបំផុសកំហឹងរបស់មហាជន និងការរើសអើងជាតិសាសន៍ជាដើម។ បានន័យថាការពិតនៃ ព្រឹត្តការណ៍ មិនសំខាន់នោះទេ ការសំខាន់គឺផ្តោតទៅលើបេះដូងរបស់មនុស្ស។ ដូច្នេះ នាពេល បច្ចុប្បន្ននេះ រាល់ដំណឹងទាំងអស់ មិនត្រឹមតែជាមូលដ្ឋាននៃចំណេះ និងការពិចារណានោះទេ ប៉ុន្តែនឹងក្លាយទៅជាគ្រប់បែក១ បើសិនជាមិនមានការប្រុងប្រយ្ន័តនោះទេ។ កាលពីមុន មានរឿងអ្វីមួយដែលបានផ្សព្វផ្សាយនៅក្នុងប្រពន្ធ័ផ្សព្វផ្សាយសង្គម FACEBOOK ត្រូវបានគេគេជឿជាក់ តែឥឡូវនេះ ការជឿជាក់ មានការថយចុះច្រើន ប៉ុន្តែពេលនេះគេផ្តោតលើប្រពន្ធ័YouTube គេជឿដោយសារ មានរូប ហើយអ្នកមិន ចេះអក្សរ ក៏អាចមើលយល់បានដែរ។ ដូច្នេះការងារដែលសំខាន់របស់មន្ត្រីព័ត៌មាន គឺការស្វែងយល់ពីដំណឹង និងការស្រាវជ្រាវស្វែងរកប្រភពដំណឹង ព្រោះការបន្សាបព័ត៌មានក្លែងក្លាយ គឺនៅពេលណាដែលយកព័ត៌មានពិត និងតួលេខច្បាស់លាស់ មកផ្សព្វផ្សាយវិញ កុំនៅចាំយូរនាំតែមានបញ្ហាកើតឡើង។ ដើម្បីអាចធ្វើកិច្ចការងារនេះបានគឺទាមទារឲ្យមន្ត្រីព័ត៌មាន មានកិច្ចសហការល្អជាមួយគ្រប់ផ្នែកពាក់ពន្ធ័ទាំងអស់ ព្រោះមិនអាចធ្វើ កិច្ចការព័ត៌មានបានជោគជ័យតែម្នាក់ឯងបាននោះទេ សំខាន់គឺការរួមគ្នា និងការធ្វើដោយ ប្រទាក់ក្រឡាគ្នា៕
ដោយនៅព្រឹកថ្ងៃដដែលនេះដែរ ឯកឧត្តមរដ្ឋមន្ត្រី ខៀវ កាញារីទ្ធ បានប្រគល់ នូវរថយន្ត Mazda Pick Up ១គ្រឿងជូនដល់ក្រុមការងារ ផលិតបទយកការណ៏ ជាភាសាបាំង នៃអគ្គនាយកដ្ឋានទូរទស្សន៍ជាតិកម្ពុជា។
ឯកឧត្តម ខៀវ កាញារីទ្ធ បានបញ្ជាក់ថា ការផ្តល់ជូននូវរថយន្ត ១ គ្រឿងនេះ រួមទាំងសំភារៈបច្ចេសទេស និងកាំមេរ៉ាថតដល់ក្រុមការងារភាសាបារាំងនៅទូរទស្សន៍ជាតិកម្ពុជា គឺចង់ពង្រឹងគុណភាពការងារ និងជម្រុញឲ្យមានការ ផលិតបទយកការណ៏ ឲ្យបានទៀតទាត់ ប្រចាំសប្តាហ៍ ដើម្បីយកមកចាក់ផ្សាយជាភាសាបារាំង និងបកជាភាសាខ្មែរផងដែរ។ ទន្ទឹមនេះ ឯកឧត្តម ក៏នឹងនៅបន្តជម្រុញលើកទឹកចិត្ត ដល់ក្រុមការងារផលិតបទយកការណ៍ជាភាសាបារាំង នៅទូរទស្សន៍ជាតិកម្ពុជា កាន់តែមានគុណភាព និងទទួលបានការគាំទ្រច្រើនពីទស្សនិកជន ទាំងក្នុង និងក្រៅប្រទេស។
នៅក្នុងឱកាសនោះ ឯកឧត្តម ឃឹម វុទ្ធី អគ្គនាយកទូរទស្សន៍ជាតិកម្ពុជា ក្នុង នាមក្រុមការងារផលិតបទយកការណ៍ជាភាសាបារាំង បានសំដែងនូវអំណរគុណ យ៉ាងជ្រាលជ្រៅចំពោះ ឯកឧត្តមរដ្ឋមន្ត្រី ខៀវ កាញារីទ្ធ ដែលជានិច្ចកាលតែងតែ គាំទ្រទាំងស្មារតី និងសំភារៈ ដើម្បីអាចអោយក្រុមការងារ ចេញទៅផលិតបទយកការណ៍បានងាយស្រួល និងប្រកបដោយគុណភាព ។ តាមរយៈនេះ ក្រុមការងារភាសាបារាំង នៃទូរទស្សន៍ជាតិកម្ពុជា បានសន្យាថានឹងប្រឹងប្រែងក្នុងការ បំពេញកិច្ចការងារឲ្យបានកាន់តែល្អបន្ថែមទៀត ពិសេសការផលិតបទយកការណ៍ ដែលមានសារប្រយោជន៍សម្រាប់សង្គម និងអ្នកទស្សនាទាំងអស់គ្នា៕
អត្ថបទ និងរូបភាព ៖ ក្រសួងព័ត៌មាន
