នៅល្ងាចថ្ងៃ០៨ ខែតុលា ឆ្នាំ២០១៩នេះ កម្ពុជាក្នុងនាមជាម្ចាស់ផ្ទះនៃកិច្ចប្រជុំលើកទី១៥ រដ្ឋមន្ត្រីបរិស្ថានអាស៊ានបានទទួលរៀបចំពិធីប្រគល់ពានរង្វាន់សាលាមេត្រីភាពបរិស្ថានអាស៊ានលើកទី៣ និងយុវជនឆ្នើមមេត្រីភាពអាស៊ានលើកទី១ នៅសណ្ឋាគារសុខាល័យអង្គរ ក្រោមអធិបតីភាព ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន លោកជំទាវ ទន់ សាអីម រដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម Dato Limjackhoi អគ្គលេខាធិការអាស៊ាន។
បន្ទាប់ពីមតិស្វាគមន៍របស់ឯកឧត្តម អគ្គលេខាធិការអាស៊ាន ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា ការប្រគល់ពានរង្វាន់នៅរាត្រីនេះ គឺជាការទទួលស្គាល់សាលា និ យុវជនឆ្នើមរបស់យើងកំរិតតំបន់។ កន្លងមកការប្រគល់ពានរង្វាន់នេះ យើងហាក់បីដូចជាដាច់ឆ្ងាយបន្តិច ដោយសារការប្រគល់ពានរង្វាន់អាស៊ានបរិស្ថានលើកដំបូងនៅខែកក្កដា ឆ្នាំ២០១២ នៅប្រទេសម៉ាឡេស៊ី និងការប្រគល់ពានរង្វាន់លើកទី២ នៅខែកក្កដា ឆ្នាំ២០១៥ ដូចនេះការប្រគល់ពាន់រង្វាន់នៅឆ្នាំនេះ ថ្វីត្បិតតែយូរបន្តិច ប៉ុន្តែជាការឆ្លុះបញ្ចាំងពីឆន្ទៈសាលារបស់ប្រទេសនីមួយៗ ក្នុងយន្តការអភិវឌ្ឍន៍ដោយចីរភាព។ នៅក្នុងឱកាសនោះ បណ្តារដ្ឋមន្ត្រីប្រទេសអាស៊ានទាំង១០ និងអគ្គលេខាធិការអាស៊ាន បានអញ្ជើញចុចប៊ូតុង ជានិមិត្តសញ្ញាបើកកម្មវិធីនៃពិធីប្រគល់ពានរង្វាន់។ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន លោកជំទាវ ទន់ សាអីម អនុរដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្តម អគ្គលេខាធិការអាស៊ាន លោកជំទាវYukari Sato អនុរដ្ឋមន្ត្រីជាន់ខ្ពស់នៃប្រទេសជប៉ុន បានអញ្ជើញប្រគល់ពានរង្វាន់ ដល់សាលាមេត្រីភាពបរិស្ថានអាស៊ានលើកទី៣ ដល់សាលាវិទ្យាល័យ និងអនុវិទ្យាល័យ ចំនួន២០ និងពានរង្វាន់យុវជនឆ្នើមមេត្រីភាពអាស៊ានលើកទី១ ចំនួន២០នាក់មកពីប្រទេសអាស៊ានទាំង១០៕
អត្ថបទ និងរូបភាព ៖ បូ សាវី
