នារសៀលថ្ងៃទី០៩ ខែតុលា ឆ្នាំ២០១៩ ឯកឧត្តម ង៉ាន់ ភិរុណ អភិបាលរងខេត្តសៀមរាប បានដឹកនាំកិច្ចប្រជុំពិនិត្យរបាយការណ៍ពាក់ព័ន្ធទៅនឹងការងារគ្រប់គ្រងគ្រោះមហន្តរាយតាមបណ្ដាស្រុក ក្រុងទាំង១២របស់ខេត្ត ដោយមានការចូលរួមពី លោក លោកស្រី ប្រធាន អនុប្រធានមន្ទីរ អង្គភាពនានា អភិបាលអភិបាលរង ក្រុង -ស្រុក ជាច្រើនផងដែរ។
កិច្ចប្រជុំនេះធ្វើឡើង ដើម្បីស្តាប់ របាយការណ៍ពីអាជ្ញាធរមូលដ្ឋាន និងមន្ទីរ អង្គភាពអំពីផលប៉ះពាល់ ដោយសារគ្រោះរាំងស្ងួត និងផលប៉ះពាល់ដោយគ្រោះទឹកជំនន់ទឹកភ្លៀងនាពេលកន្លងមក ដែលនាំឱ្យខូចខាតហេដ្ឋារចនាសម្ព័ន្ឋ ខូចខាតផលដំណាំ ងាប់ និងលិចលង់សន្ទូង របស់បងប្ងូនប្រជាពលរដ្ឋនៅតាមបណ្តាភូមិសាស្ត្រ ក្រុង-ស្រុក នៃខេត្តសៀមរាបចាប់ពីអំឡុងខែសីហា រហូតដល់ខែកញ្ញា ឆ្នាំ២០១៩ ដែលក្នុងរយៈពេលពីខែចុងក្រោយនេះស្រុកមួយចំនួននៅខេត្ត មានករណីគ្រោះមហន្តរាយកើតឡើងបន្តបន្ទាប់ដោយសារគ្រោះធម្មជាតិធ្វើឲ្យប៉ះពាល់ភាពរាំងស្ងួត គ្រោះទឹកជំនន់ ឧប្បទ្ទេវហេតុផ្សេងដល់ក្រុង-ស្រុកទាំងអស់របស់ខេត្តសៀមរាប ។
ឯកឧត្តម ង៉ាន់ ភិរុណ មានប្រសាសន៍ថា ស្នើសុំដល់អាជ្ញាធរក្រុង ស្រុកធ្វើរបាយការណ៍ឲ្យបានច្បាស់លាស់ផ្តល់មកលេខាធិការដ្ឋានគ្រប់គ្រងគ្រោះមហន្តរាយខេត្ត ឱ្យបានទៀងទាត់តាមប្រក្រតីទិនដែលបានកំណត់តាមខែនីមួយៗ ដើម្បីក្រុមការងារមានមូលដ្ឋានធ្វើរបាយការណ៍ ជូនទៅគណ:កម្មាធិការជាតិគ្រប់គ្រងគ្រោះមហន្តរាយបានជ្រាប ហើយមានវិធានឆ្លើយតប និងដោះស្រាយដល់បងប្អូនប្រជាពលរដ្ឋ ក្នុងស្ថានភាពកំពុង ខ្វះខាត ។ ពាក់ព័ន្ឋទៅនឹងផលប៉ះពាល់គ្រោះរាំងស្ងួត និងជំនន់ទឹកភ្លៀង ក្នុងរដូវវស្សានេះ ស្រុកខ្លះក៏ទទួលបានស្រូវពូជពីក្រសួងកសិកម្ម និងពីរាជរដ្ឋាភិបាល ។
ឯកឧត្តម ក៏បាបបញ្ជាក់ និងជំរុញដល់អាជ្ញាធរស្រុក ត្រូវចាត់វិធានការទប់ស្កាត់ចំពោះរថយន្តធុនធំដឹកលើសទម្ងន់ឆ្លងកាត់ភូមិសាស្ត្ររបស់ខ្លួន ដឹកខ្សាច់ ឬដឹកផលិតផលអ្វីក៍ដោយ ឆ្លងកាត់ក្នុងភូមិសាស្ត្ររបស់ខ្លួន ជៀសវាងការបាក់ស្រុតនាំឲ្យខូចខាតផ្លូវ និងខាតបង់ថវិកាជាតិ ។
សូមជំរាបថា ៖ បើតាមរបាយការណ៍របស់លេខាធិការដ្ឋានគ្រប់គ្រងគ្រោះមហន្តរាយខេត្ត ផលប៉ះពាល់ឆ្នាំ២០១៩នេះ បានបណ្តាលឱ្យមនុស្សស្លាប់ដោយសារលង់ទឹក ចំនួន ១១ នាក់ (ស្រី ចំនួន ១នាក់) ភាពរាំងស្ងួត បាននាំឱ្យខូចខាតប៉ះពាល់ ដល់ក្រុង-ស្រុក ចំនួន ១១ ឃុំចំនួន ៧៤ ភូមិចំនួន ៥៨៥ ក្នុងនោះគ្រួសារ ចំនួន ៤៣ ៨៩៣ គ្រួសារ,- ប៉ះពាល់ស្រូវពង្រោះ ចំនួន ៣៦ ០៨៩ ហិកតា ។ ដោយប៉ះពាល់ស្រូវសន្ទូងចំនួន ១៥៥ហិកតា ជាមួយគ្នានោះលិចលង់ទីធ្លាមន្ទីរពេទ្យបង្អែកស្រុក និងមណ្ឌលសុខភាព ២កន្លែង លិចទីធ្លាសាលារៀន ២១ កន្លែង លិចទីធ្លាផ្សារ ១ កន្លែង លិចផ្ទះប្រជាពលរដ្ឋកម្រិតធ្ងន់ ចំនួន ៥ ខ្នង លិចក្រោមផ្ទះប្រជាពលរដ្ឋកម្រិតស្រាល ចំនួន ៩១០ ខ្នង លិចផ្លូវ ៨៧ កន្លែង ស្មើនឹងប្រវែង ៤០ ៨០៦ ម៉ែត្រ ទឹកហូរច្រោះដាច់ផ្លូវ ២៨ កន្លែង ស្មើនឹងប្រវែង ៥៧៥ ម៉ែត្រ ដាច់ស្ពាន ២ កន្លែង ប្រវែង ២៧ ម៉ែត្រ ទឹកហូរដាច់ទំនប់ និងខ្នងប្រឡាយ ៣ខ្សែ ប្រវែង ២ ១៣៥ ម៉ែត្រ ។
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សុខុន
