លោក ហ៊ន់ ឬទ្ធិ ឋានន្តរសិក្ត័ វរៈមន្ត្រីថ្នាក់លេខ៤ ជាអភិបាលស្រុកស្ដីទី ត្រូវបានប្រកាសឱ្យចូលកាន់មុខតំណែង ជាអភិបាលស្រុកស្រីស្នំ តាមអនុក្រឹតលេខ១២០៣ អនក្រ.តត របស់រាជរដ្ឋាភិបាលកម្ពុជា កាលព្រឹកថ្ងៃទី០៩ ខែតុលា ឆ្នាំ២០១៩នេះ ក្រោមអធិបតីភាព ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់ លោកស្នងការនគរបាលខេត្ត កងកំលាំងប្រដាប់អាវុធទាំងបី លោកលោកស្រីជាប្រធាន អនុប្រធានមន្ទីរ លោកអភិបាលស្រុក មេឃុំ មេភូមិ និងប្រជាពលរដ្ឋចូលរួមជាច្រើននាក់ផងដែរ ។
មានប្រសាសន៍ក្នុងឱកាសនោះ ឯកឧត្តម ទៀ សីហា បានបញ្ជាក់ថា ការប្រកាសចូលកាន់តំណែងជាអភិបាលស្រុកនេះ អាស្រ័យដោយមានការជឿជាក់យ៉ាងច្បាស់ពីរាជរដ្ឋាភិបាល ក្រសួងមហាផ្ទៃ និង អាជ្ញាធរខេត្ត ចំពោះមន្ត្រី ថ្នាក់ដឹកនាំនៅរដ្ឋបាលថ្នាក់ក្រោមជាតិ ដែលជាការលើកទឹកចិត្តដល់មន្ត្រី ឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ហើយម្យ៉ាងទៀតក៏ជាគោលការណ៍របស់រាជរដ្ឋាភិបាល ក្នុងការរៀបចំនូវរចនាសម្ព័ន្ធ ក្បាលម៉ាស៊ីនដឹកនាំថ្នាក់ក្រោមជាតិ ដើម្បីឆ្ពោះទៅរកកិច្ចអភិវឌ្ឍន៍មូលដ្ឋានភូមិឃុំ ក្នុងការបម្រើដល់តម្រូវការផលប្រយោជន៍របស់ប្រជាជន ។
ឯកឧត្តម ទៀ សីហា បានថ្លែងនូវការកោតសរសើរដល់អាជ្ញាធរស្រុក នូវសមទ្ធិផលដែលស្រុកទទួលបានកន្លងមកនេះថា៖កត្តារីកចម្រើនរបស់ស្រុក កើតឡើងបានអាស្រ័យប្រទេសជាតិមានសន្តិភាព និងក្រោមការដឹកនាំដ៍ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននាំមកនូវសុខសន្តិភាព និងការអភិវឌ្ឍរីកចម្រើនលើគ្រប់វិស័យ ប៉ុន្តែសូមឱ្យមន្ត្រីទាំងអស់ ត្រូវពង្រឹងសមត្ថភាព និងគុណភាព តាមរយៈផ្តល់ការបណ្តុះបណ្តាលផ្ទាល់នៅថ្នាក់មូលដ្ឋាន ដើម្បីជាចំណេះដឹងបន្ថែមដល់មន្ត្រីរាជការ ងាយស្រួលដល់មន្ត្រីបំពេញការងាររដ្ឋបាលនៅមូលដ្ឋាន ជាពិសេស សូមឲ្យអភិបាលស្រុកថ្មី នៃស្រុកស្រីស្នំ ដែលទើបចូលកាន់តំណែង ធ្វើយ៉ាងណាត្រូវខិតខំប្រឹងប្រែងធ្វើការអភិវឌ្ឍន៍ស្រុក ឲ្យមានការរីកចម្រើនបន្ថែមទៀត គឺយកចិត្តទុកដាក់ដល់សុខទុក្ខប្រជាពលរដ្ឋជាចំបង និង យកចិត្តទុកដាក់លើការងារសន្តិសុខ និង ជំរុញការងារបង្កបង្កើនផល ។
ឯកឧត្តមអភិបាលខេត្ត មានប្រសាសន៍បន្ថែមថា លើសពីនេះ ត្រូវពង្រីង និងពង្រីកនូវសក្តានុពលទេសចរណ៍ដែលមានស្រាប់នៅក្នុងសហគមន៍ ដោយសហការជាមួយមន្ទីរជំនាញ ស្ថាប័នពាក់ព័ន្ធ ដើម្បីជាផលប្រយោជន៍ជូនដល់ប្រជាពលរដ្ឋក្នុងមូលដ្ឋានស្រុកស្រីស្នំទាំងមូល និង ត្រូវចេះសាមគ្គីភាពផ្ទៃរវាងគណៈអភិបាលស្រុក ជាមួយមន្ត្រីរាជការគ្រប់លំដាប់ថ្នាក់ លើការដឹកនាំ ការគ្រប់គ្រង និង ការពង្រឹងនូវរបៀបរបបការងាររដ្ឋបាល នៅក្នុងសាលាស្រុក ដើម្បីផ្តល់សេវាសាធារណៈជូនប្រជាពលរដ្ឋក្នុងមូលដ្ឋាន ប្រកបដោយតម្លាភាព គណនេយ្យភាពលឿនរហ័ស និងមានប្រសិទ្ឋភាព ពិសេសត្រូវសហការសាមគ្គីភាពជាមួយក្រុមប្រឹក្សាស្រុក អាជ្ញាធរមូលដ្ឋាន និង កងម្លាំងប្រដាប់ទាំង៣ប្រភេទ ចូលរួមទប់ស្កាត់នូវរាល់បទល្មើសផ្សេងៗដែលកើតឡើង នៅក្នុងដែនសមត្ថកិច្ចរបស់ខ្លួន ។
ក្នុងឱកាសនោះដែរ លោក ហ៊ន់ ឬទ្ធិ អភិបាលស្រុកស្រីស្នំ ដែលទើបតែងតាំងថ្មី បានប្ដេជ្ញាគោរព និង អនុវត្តន៍តាមគោលការណ៍ដឹកនាំចង្អុលបង្ហាញរបស់ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលខេត្ត ដោយសន្យាខិតខំទប់ស្កាត់ លុបបំបាត់រាល់បាតុភាពអសកម្មទាំងឡាយ ដែលធ្វើឲ្យប៉ះពាល់និងថ្នាំងថ្នាក់ដល់ប្រជាពលរដ្ឋ និង អនុវត្តន៍នូវវិធានការចាំបាច់ទាំងឡាយ សំដៅបង្កើនការងារទប់ស្កាត់ និង បង្ក្រាបនូវបទល្មើសគ្រប់ប្រភេទ ព្រមទាំងយកចិត្តទុកដាក់រៀបចំកសាង និង អភិវឌ្ឍន៍លើគ្រប់វិស័យនៅក្នុងស្រុកស្រីស្នំ ៕
អត្ថបទ និង រូបថត : លោក ស៊ាន សុផាត និង លោក ហាំ ម៉េងហួត
កែសម្រួលអត្ថបទ : លោក លីវ សាន្ត
