លោក ម៉ូវ ជា ឋានន្តរស័ក្តិឧត្តមមន្ត្រី ថ្នាក់លេខ៦ ជាប្រធានការិយាល័យវិនិយោគ នៃទីចាត់ការផែនការនិងវិនិយោគ នៃ សាលាខេត្តសៀមរាប និង លោក ធូ ចន្ថុល ឋានន្តរស័ក្តិអនុមន្ត្រីថ្នាក់លេខ១ ត្រូវបានប្រកាសឲ្យកាន់មុខតំណែងជាអភិបាលរងស្រុកជីក្រែង តាមប្រកាសលេខ៨៨៦១ ប្រក របស់ក្រសួងមហាផ្ទៃ ដែលការប្រកាសនេះ បានប្រព្រឹត្តទៅនៅព្រឹកថ្ងៃទី១០ ខែតុលា ឆ្នាំ២០១៩នេះ នៅសាលាស្រុកជីក្រែង ក្រោមអធិបតីភាពលោក នាក់ ណេរ៉ុន អភិបាលរង ខេត្ត និង ជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ។
លោក ម៉ូវ ជា អភិបាលរងស្រុកជីក្រែង ដែលទើបនឹងតែងតាំងថ្មី បានសម្ដែងនូវការដឹងយ៉ាងជ្រាលជ្រៅចំពោះប្រមុខរាជរដ្ឋាភិបាលកម្ពុជា ថ្នាក់ដឹកនាំក្រសួងមហាផ្ទៃ ប្រធានក្រុមប្រឹក្សាខេត្ត និង អភិបាលខេត្តសៀមរាប ដែលបានផ្ដល់ការទុកចិត្តមកលើរូបលោកទាំង២នាក់ ឲ្យធ្វើជាអភិបាលរងស្រុកជីក្រែង ហើយបានប្ដេជ្ញាចិត្តអនុវត្តន៍ឲ្យបានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តជាធរមាន , គាំទ្រនិងអនុវត្តន៍នូវកម្មវិធីនយោបាយ និង យុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា , គោលការណ៍ដឹកនាំចង្អុលបង្ហាញរបស់ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលខេត្ត គណៈអភិបាលស្រុកជីក្រែង និង ប្ដេជ្ញាខិតខំចូលរួមទប់ស្កាត់ លុបបំបាត់រាល់បាតុភាពអសកម្មទាំងឡាយ ដែលធ្វើឲ្យប៉ះពាល់ដល់ប្រជាពលរដ្ឋ ព្រមទាំងយកចិត្តទុកដាក់រៀបចំ កសាង និង អភិវឌ្ឍន៍លើគ្រប់វិស័យនៅក្នុងស្រុកជីក្រែង ជាពិសេសសហការ សាមគ្គីភាពផ្ទៃក្នុងឲ្យបានល្អប្រសើរបំផុត ។
មានប្រសាសន៍ក្នុងឱកាសនោះ លោក នាក់ ណេរ៉ុន បានបញ្ជាក់ថា ការប្រកាសចូលកាន់តំណែងជាអភិបាលរងស្រុកនេះ ក៏មានការជឿជាក់យ៉ាងច្បាស់ពីរាជរដ្ឋាភិបាលកម្ពុជា ក្រសួងមហាផ្ទៃ និង អាជ្ញាធរខេត្តចំពោះមន្ត្រី ថ្នាក់ដឹកនាំនៅរដ្ឋបាលថ្នាក់ក្រោមជាតិ ដែលជាការលើកទឹកចិត្តដល់មន្ត្រី ឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ព្រោះថាលោកទាំងពីរនាក់នេះ ពិតជាមានចំណេះដឹង និង បទពិសោធន៍យូរឆ្នាំ អាចជួយដល់អភិបាលស្រុកក្នុងការអភិវឌ្ឍស្រុក ពិសេសត្រូវប្រមូលផ្ដុំកម្លាំងសរុប និង វិធានការសរុប ស្របតាមតម្រូវការជាក់ស្តែងរបស់ស្រុក ។
លោក នាក់ ណេរ៉ុន មានប្រសាសន៍បន្ថែមថា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសជាតិទាំងមូលមានសុខសន្តិភាព និង មានការអភិវឌ្ឍយ៉ាងឆាប់រហ័ស ដូច្នេះក្នុងឱកាសដែលលោកទាំងពីរ ទទួលបានការតែងតាំងជាអភិបាលរងស្រុកជីក្រែងនេះ ត្រូវរក្សានូវចំណងស្មារតីសាមគ្គី និង ឯកភាពផ្ទៃក្នុងក្នុងជួរគណៈអភិបាលស្រុក ក្រុមប្រឹក្សាស្រុក មន្ត្រីរាជការគ្រប់លំដាប់ថ្នាក់ក្នុងស្រុក កងកម្លាំងប្រដាប់អាវុធទាំង៣ប្រភេទ និង ក្រុមប្រឹក្សាឃុំឲ្យបានល្អប្រសើរឡើង ដើម្បីរួមគ្នាអភិវឌ្ឍន៍នូវសមិទ្ធផលថ្មីៗបន្ថែមទៀត សំដៅលើកកម្ពស់ជីវភាពរបស់នៅប្រចាំថ្ងៃរបស់បងប្អូនប្រជាពលរដ្ឋឲ្យកាន់តែប្រសើរឡើង ហើយត្រូវរួមគ្នាការពារនូវសេចក្ដីសុខក្សេមក្សាន្តរបស់បងប្អូនប្រជាពលរដ្ឋយើង ។
ព័ត៌មានជាតិ ថ្មីៗ
លោកអភិបាលរងខេត្តសៀមរាប មានប្រសាសន៍បន្ថែមទៀតថា ជាមួយគ្នានេះដែរ ត្រូវរួមគ្នាបង្កើននូវការយកចិត្តទុកដាក់ក្នុងការបម្រើសេវាសាធារណៈជូនដល់បងប្អូនប្រជាពលរដ្ឋ ក្នុងតម្រូវការចាំបាច់សម្រាប់ជីវភាពរស់នៅប្រចាំថ្ងៃរបស់ពួកគាត់ ៕
អត្ថបទ : លោក លីវ សាន្ត
រូបថត : លោក ខេង ឧត្តម
