លោកវរៈសេនីយ៏ឯក ណុប សារៈ អធិការនគរបាលក្រុងសៀមរាប បានឲ្យដឹងថា កាលពីវេលាម៉ោង ១៥ នឹង ១០នាទី ថ្ងៃទី០៩ ខែតុលា ឆ្នាំ២០១៩ កម្លាំងនគរបាលក្រុងសៀមរាប បានធ្វើការចាប់ឃាត់ខ្លួនជនសង្ស័យចំនួនពីរនាក់ សង្ស័យជាប់ពាក់ព័ន្ធករណីឆកកាបូបស្ត្រីម្នាក់ នៅចំណុចខាងត្បូងការ៉ាសសាំង ភូមិខ្នារ សង្កាតជ្រាវ ក្រុង/ខេត្តសៀមរាប ។
លោកអធិការ បានឲ្យដឹងទៀតថា ជនសង្ស័យទាំងពីរនាក់ រួមមាន ទី១ ឈ្មោះ ហេង ភៈរុណ ភេទប្រុស អាយុ ១៨ឆ្នាំ មុខរបរសិស្ស ទីលំនៅបច្ចុប្បន្ន ភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ទី២. ឈ្មោះ គីម លឿង ភេទប្រុស អាយុ ១៩ឆ្នាំ មុខរបរកម្មករសំណង់ មានទីលំនៅ ស្នាក់នៅបណ្ដោះអាសន្នភូមិតាភុល សង្កាត់ស្វាយដង្គុំ ក្រុង/ខេត្តសៀមរាប ។
លោកបន្តថា មុនពេលកើតហេតុ ជនសង្ស័យទាំង០២នាក់ខាងលើ បានជិះម៉ូតូមួយគ្រឿងម៉ាកហុងដាឌ្រីម c១២៥ ពណ៌ខ្មៅ ផលិតឆ្នាំ២០១៨ បិទតែម ២០១៥ គ្មានស្លាកលេខ បានធ្វើសកម្មភាពឆក់កាបូបប្រាក់ពណ៌ផ្កាឈូក ពីជនរងគ្រោះឈ្មោះ យី ចន្ថា ភេទស្រី អាយុ ២៩ឆ្នាំ រស់នៅភូមិតាចេក សង្កាត់ជ្រាវ ក្រុង/ខេត្តសៀមរាប ។
បន្ទាប់ពីជនសង្ស័យទាំងពីរបានធ្វើសកម្មភាពឆក់កាបូបបានសម្រេច ក៏ជិះគេចខ្លួនសំដៅទៅផ្លូវកុងស៊ី ក្នុងភូមិខាងលើហើយ ជនរងគ្រោះក៏បានជិះម៉ូតូដេញតាមពីក្រោយ ហើយស្រែកឆោឡោឲ្យជួយចាប់ចោរ លុះដល់ចំណុចក្រុមទី១០ ភូមិខ្នារ សង្កាត់ជ្រាវ ក្រុង/ខេត្តសៀមរាប ត្រូវបានកម្លាំងប៉ុស្តិ៍ នឹងប្រជាការពារភូមិខ្នារដែលកំពុងល្បាត រួមទាំង ប្រជាពលរដ្ឋនៅក្បែរនោះ បានចាប់ខ្លួនជនសង្ស័យខាងលើ ហើយនាំយកមកសួរនាំនៅប៉ុស្តិ៍នគរបាលរដ្ឋបាល សង្កាត់ជ្រាវតែម្ដង ។
ព័ត៌មានជាតិ ថ្មីៗ
ក្រោយពីកម្លាំងនគរបាលសួរនាំរួច ជនសង្ស័យទាំង ០២ខាងលើបានសារភាពថា ខ្លួននឹងបក្ខពួកពិតជាបានធ្វើសកម្មភាពឆក់កាបូបរបស់ជនរងគ្រោះពិតមែន រីឯជនសង្ស័យឈ្មោះហេង ភៈរុណ ហៅយក់ ក៏បានសារភាពផងដែរថា កាលពីថ្ងៃទី១៣ ខែកញ្ញា ឆ្នាំ២០១៩កន្លងទៅ ខ្លួនក៏បានធ្វើសកម្មភាព
ឆក់កាបូបប្រជាពលរដ្ឋ នៅភូមិបុស្សក្រឡាញ់ សង្កាត់ជ្រាវ ដែលកម្លាំងនគរបាលយើងបានទទួលបណ្តឹងពីជនរងគ្រោះរួចផងដែរ។ ហើយបច្ចុប្បន្នជនសង្ស័យត្រូវបានសមត្ថកិច្ចនគរបាល បញ្ជូនខ្លួនទៅសាលាដំបូងខេត្ត ដើម្បីអនុវត្តទៅតាមផ្លូវច្បាប់ ៕
អត្ថបទ និងរូបភាព ៖ ខេង ឧត្តម
កែសម្រួល ៖ អ៊ុន ណារាជ្យ
