តាមការឲ្យដឹងពីលោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានឲ្យដឹងថា នៅវេលាម៉ោង ១៨ និង៥០នាទី ថ្ងៃទី០៩ ខែតុលា ឆ្នាំ២០១៩នេះ មានករណីគ្រោះថ្នាក់ចរាចរណ៍កើតឡើង រវារថយន្ត និងម៉ូតូ បានបណ្ដាលឲ្យនគរបាលម្នាក់ជាអ្នកបើកម៉ូតូ បានស្លាប់ភ្លាមៗនៅនឹងកន្លែង ស្ថិននៅលើផ្លូវជាតិលេខ ៦ ក្នុងភូមិគំរូ ឃុំស្រណាល ស្រុកក្រឡាញ់ ខេត្តសៀមរាប ។
លោកវរសេនីយ៍ឯក បានឲ្យដឹងទៀតថា មុនពេលកើតហេតុគេឃើញមានរថយន្តមួយគ្រឿង ម៉ាកលុចស៊ីស ពណ៍ទឹកមាស ពាក់ផ្លាកលេខ ភ្នំពេញ២AS.៤៧៣១ បើកបរដោយជនមិនស្គាល់អត្តសញ្ញាណ បានរត់គេចខ្លួនបាត់ បានបើកបរក្នុងទិសដៅពីកើតទៅលិច លុះមកដល់កន្លែងកើតហេតុបានបុកជាមួយម៉ូតូមួយគ្រឿង ម៉ាកហុងដាឌ្រីម ពណ៍ ខ្មៅ ពាក់ផ្លាកលេខ សៀមរាប១S.១២១៥ បើកបរដោយឈ្មោះ មិត្ត សាំ ភេទប្រុស ជានគរស្រុកអង្គរជុំ ខេត្តសៀមរាប ដែលកំពុងបើកបរក្នុងទិសដៅបញ្ច្រាស់គ្នា (ទិសដៅពីលិចទៅកើត) បណ្តាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ។
លោកអធិការបញ្ជាក់បន្ថែមថា មូលហេតុដែលបណ្ដាលឲ្យមានគ្រោះថ្នាក់នេះកើតឡើង គឺមកពីអ្នកបើកបរម៉ូតូ បើកបរដោយមិនប្រកាន់ស្តាំ និងអ្នកបើកបររថយន្ត បើកបរមានល្បឿនលឿនខ្វះការប្រុងប្រយ័ត្ន ទើបបណ្ដាលឲ្យមានគ្រោះថ្នាក់នេះ ។ ក្រោយកើតហេតុកម្លាំងនគរបាលជំនាញបានចុះដល់កន្លែងកើតហេតុ ធ្វើការពិនិត្យ និងការវាស់វែង ហើយបានដកហូតម៉ុតូ និងរថយន្តបង្កទាំងពីរ ទៅកាន់អធិការស្រុកបណ្ដោះអាសន្ន ដើម្បីរង់ចាំការដោះស្រាយនៅពេលក្រោយ រីឯសពជនរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
អត្ថបទ និងរូបភាព ៖ ថាច់ ពិសុទ្ធ
កែសម្រួល ៖ អ៊ុន ណារាជ្យ
