ក្នុងការបន្សាបព័ត៌មានក្លែងក្លាយ វាទាមទារមន្ត្រីព័ត៌មានប្រតិកម្មរហ័ស ដោយយកព័ត៌មានពិតមកផ្សព្វផ្សាយ និងសំបូបែប ប្រៀបដូចជាតន្ត្រី ដែលមានឧបករណ៍ច្រើនប្រភេទប្រគុំរួមគ្នា នេះបើតាមការលើកឡើងរបស់ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅថ្ងៃទី០៩ ខែតុលា ឆ្នាំ២០១៩ ក្នុងវគ្គពង្រឹងសមត្ថភាព សារព័ត៌មានឌីជីថល និងការទប់ស្កាត់ព័ត៌មានក្លែងក្លាយ។
វគ្គបណ្ដុះបណ្ដាលនេះ រៀបចំឡើងដោយអគ្គនាយកដ្ឋាន ព័ត៌មាន និងសោតទស្សន៍ នៃក្រសួងព័ត៌មាន និងមានការចូលរួមពីអ្នកសារព័ត៌មានមកពីស្ថាប័នឯកជន និងរដ្ឋ ជាច្រើនអ្នក។
សព្វថ្ងៃនេះ ព័ត៌មានឌីជីថល យើងអាចមើលវាបាន នៅលើទូរសព្ទដៃទំនើប កុំព្យូទ័រ និង ឧបករណ៍អេឡិចត្រូនិចដទៃទៀត ដែលបានភ្ជាប់ប្រព័ន្ធអ៊ិនធើណិត។
ព័ត៌មានជាតិ ថ្មីៗ
មានប្រសាសន៍ក្នុងពិធីបើកនោះ ឯកឧត្តម ខៀវ កាញារីទ្ធ បង្ហាញថា ព័ត៌មានឌីជីថល គឺជាបាតុភាពថ្មីសម្រាប់សតវត្សន៍ទី២១ ដែលជាសតវត្សន៍ពុទ្ធិ និងលំហូរព័ត៌មាន។ ដោយសារព័ត៌មានបច្ចុប្បន្ន មានច្រើនហូរហៀរ ដូច្នេះ អ្នកអាន និងទស្សនា មើលមិនអស់ទេ។ វាប្រៀបបានមុខម្ហូបដ៏ច្រើននៅលើតុ ចឹងអ្នកចូលចិត្តរសជាតិណា គឺចាប់យកតែមួយប្រភេទនោះ។ បានន័យថា មនុស្សបច្ចុប្បន្ន ជ្រើសរើសយកព័ត៌មានណា ដែលស្របទៅនឹងគំនិតខ្លួនឯង គឺមិនបានយកមកថ្លឹងថ្លែងឡើយ។ កត្តានេះ បានបង្កឲ្យកើតមានព័ត៌មានក្លែងក្លាយ។
ឯកឧត្តមរដ្ឋមន្ត្រី បានបញ្ជាក់ថា នៅក្នុងសង្គមប្រជាធិបតេយ្យ ការបោះឆ្នោត គឺត្រូវការដណ្ដើមយកដួងចិត្ត និងការគិតរបស់ប្រជាជន ដូច្នេះការទប់ស្កាត់ដំណឹងក្លែងក្លាយនេះ គឺជាការសំខាន់បំផុត។ ក្នុងនោះ ដើម្បីបន្សាបព័ត៌មានមិនពិតនេះ មន្ត្រីព័ត៌មានត្រូវស្វែងរកព័ត៌មានពិត និងប្រភពច្បាស់លាស់ ព្រមទាំងយកមកផ្សព្វផ្សាយឲ្យបានទាន់ពេលវេលា និងសហការគ្នាផ្សព្វផ្សាយឲ្យបានសំបូរបែប។
សូមបញ្ជាក់ថា ក្រៅពីវគ្គបណ្ដុះបណ្ដាលពង្រឹងសមត្ថភាពអ្នកសារព័ត៌មាននាថ្ងៃនេះ កាលពីពេលកន្លងក្រសួងព័ត៌មានក៏បានបើកវគ្គបណ្ដុះបណ្ដាលជាច្រើន ជូនដល់អ្នកសារព័ត៌មានឯកជន និងរដ្ឋ ហើយក៏បានបញ្ជូនសិក្ខាកាមទៅសិក្សានៅក្រៅប្រទេសផងដែរ។ នាពេលអនាគត ក្រសួងក៏នឹងមានវគ្គបណ្ដុះបណ្ដាលអ្នកសារព័ត៌មានវ័យក្មេង ទៅសិក្សានៅតាមបណ្ដាប្រទេសក្នុងតំបន់អាស៊ានផងដែរ។
អត្ថបទ៖ សេង ផល្លី
រូបភាព៖ អ៊ុន ណារាជ្យ
