តាមការលើកឡើង របស់ឯកឧត្តម ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន នៅថ្ងៃទី០៩ ខែតុលា ឆ្នាំ២០១៩ បានលើកឡើងថា ក្រសួងមហាផ្ទៃ ជាបុគ្គលផ្ទាល់ មានសមត្ថកិច្ចចាត់ការតាមនីតិវិធីទៅលើអ្នកបង្កើតព័ត៌មានក្លែងក្លាយ ដែលធ្វើឲ្យប៉ះពាល់ដល់ប្រយោជន៍សាធារណៈ ឬមហន្តរាយដល់បុគ្គលដទៃ រីឯក្រសួងព័ត៌មាន មានតួនាទីជាអ្នកបន្សាបព័ត៌មានមិនពិត តែគ្មានសិទ្ធទៅចាប់ចង ឬឃាត់ឃាំងបុគ្គលទាំងនោះឡើយ។
ការលើកឡើងនេះ ស្របពេល ដែលអគ្គនាយកដ្ឋាន ព័ត៌មាន និងសោតទស្សន៍ បានរៀបចំ វគ្គពង្រឹងសមត្ថភាព ស្ដីអំពី សារព័ត៌មានឌីជីថល និងការទប់ស្កាត់ព័ត៌មានក្លែងក្លាយ ដើម្បីផ្សព្វផ្សាយអំពី ផលប៉ះពាល់ដែលបង្កដោយព័ត៌មានក្លែងក្លាយ នៅតាមប្រព័ន្ធអ៊ិនធើណិត និងការបន្សាបព័ត៌មានក្លែងក្លាយទាំងអស់នោះ។
ក្នុងកិច្ចសម្ភាសន៍ផ្ដាច់មុខ ជាមួយទស្សន៍ជាតិខេត្តសៀមរាប ឯកឧត្តម ផុស សុវណ្ណ បានលើកឡើងថា នៅកម្ពុជា នៅក្នុងច្បាប់ស្ដីពីរបបសារព័ត៌មានកម្ពុជា មានលក្ខណៈពិសេស គឺមិនត្រួតពិនិត្យទៅលើកាផ្សាយ មានសិទ្ធលាក់ប្រភព ដូច្នេះក្រសួងព័ត៌មាន ឬមន្ទីរព័ត៌មានមិនអាចដឹងមុន មុនការចុះផ្សាយទាំងនោះទេ។ ដូច្នេះ មន្ទីរព័ត៌មានរាជធានី-ខេត្ត ត្រូវមានកិច្ចសហការល្អជាមួយ មន្ទីរ ស្ថាប័ន ឬអង្គភាពនៅជុំវិញរាជធានី-ខេត្តរបស់ខ្លួន ដើម្បីដឹងពីព័ត៌មានក្លែងក្លាយទាំងនោះបានឆាប់រហ័ស។
ឯកឧត្តម អគ្គនាយក ក៏បានបន្ថែមថា ប្រសិនបើមានការផ្សាយព័ត៌មានមិនពិតអំពីអង្គភាព ឬស្ថាប័នសាម៉ី សូមឲ្យប្រធានអង្គភាព ឬស្ថាប័ន ធ្វើប្រតិកម្មរហ័សខ្លួនឯងផងដែរ ហើយក្រសួងព័ត៌មាននឹងចូលរួមដោះស្រាយ ប្រសិនបើមានការស្នើសុំ។
ឯកឧត្តម ផុស សុវណ្ណ បញ្ជាក់ថា ក្នុងប្រកាសអន្តរក្រសួងកាលពីឆ្នាំ២០១៧ ដែលមានក្រសួងមហាផ្ទៃ ក្រសួងប្រៃសេណីយ៍ និងទូរគមនាគមន៍ និងក្រសួងព័ត៌មានចូលរួម បានចែកភារកិច្ចគ្នាច្បាស់ ដោយអ្នកអនុវត្តន៍ច្បាប់គឺក្រសួងមហាផ្ទៃ ចំពោះគេហទំព័រព័ត៌មាន ឬប្រព័ន្ធផ្សព្វផ្សាយតាមប្រព័ន្ធអ៊ិនធើណិត ដែលបានចុះបញ្ជីត្រឹមត្រូវជាមួយក្រសួងព័ត៌មាន គឺក្រសួងជាព័ត៌មានជាអ្នកអនុវត្តន៍បិទប្រព័ន្ធផ្សព្វផ្សាយទាំងនោះ។ ដោយឡែក គេហទំព័រព័ត៌មាន ឬប្រព័ន្ធផ្សព្វផ្សាយតាមប្រព័ន្ធអ៊ិនធើណិត ដែលមិនមានចុះបញ្ជី ហើយក្រសួងមហាផ្ទៃស្រាវជ្រាវមិនឃើញ ក្រសួងប្រៃសេណីយ៍ និងទូរគមនាគមន៍ មានសិទ្ធបិទប្រព័ន្ធទាំងនោះ។
សូមជម្រាបថា បច្ចុប្បន្នប្រទេសកម្ពុជា កំពុងប្រើច្បាប់ស្ដី របបសារព័ត៌មាន តាំងពីឆ្នាំ១៩៩៥មកម្ល៉េះ ដូច្នេះឆ្លើយតបទៅនឹងការវិវឌ្ឍតាមស្ថានភាពសង្គមកម្ពុជានាពេលបច្ចុប្បន្ន រាជរដ្ឋាភិបាលកម្ពុជា បាននិងកំពុងធ្វើវិសោធនកម្មលើច្បាប់នេះជាបន្តបន្ទាប់។
អត្ថបទ៖ សេង ផល្លី
រូបភាព៖ អ៊ុន ណារាជ្យ
