ព្រឹត្តិការណ៍ពិព័រណ៌ ANGKOR FOOD HOTEL និង ANGKOR BUILD 2019 EXPO ជាឱកាសសម្រាប់កម្ពុជា បង្ហាញឱ្យពិភពលោក បានឃើញនូវផលិតផលទេសចរណ៍ថ្មីៗ ដ៍សម្បូរបែប និងការបញ្ចេញស្នាដៃធ្វើម្ហូបអាហារបែបប្រពៃណីខ្មែរ នេះបើតាមការលើកឡើងរបស់ ឯកឧត្តម ប៉ាក់ សុខុម រដ្ឋលេខាធិការ ក្រសួងទេសចរណ៍ នៅសណ្ឋាគារសុខាសៀមរាប នាព្រឹកថ្ងៃទី១០ខែតុលា ឆ្នាំ២០១៩។
ព្រឹត្តិការពិព័រណ៌ពាណិជ្ជកម្មផ្នែកម្ហូបអាហារ ភេសជ្ជ: សណ្ឋាគារ និងបដិសណ្ឋារកិច្ចខ្នាតអន្តរជាតិលំដាប់អន្តរជាតិចំណាត់ថ្នាក់លេខមួយនេះ ត្រូវបានរៀបចំដោយ សមាគមចុងភៅកម្ពុជា និងសហព័ន្ធទេសចរណ៍កម្ពុជាសហការជាមួយក្រុមហ៊ុនAMB។ ក្នុងនោះ មានចូលរួមក្រុមហ៊ុនចំនួន១៥០ មកពីជាង១០ប្រទេស រួមមាន ប្រទេសកូរ៉េ ម៉ាឡេស៊ី អ៊ីតាលី សិង្ហបុរី ថៃ អាមេរិច និងតៃវ៉ាន់ ជាដើម ដែលជាបណ្តាញ និងប្រភពសំរាប់ផ្គត់ផ្គង់ផលិតផល សម្ភារ: និងសេវាកម្មថ្មីបំផុត
ឯកឧត្តម ប៉ាក់ សុខុម បញ្ជាក់ថា ខេត្តសៀមរាបទីក្រុងវប្បធម៌ នៃព្រះរាជាណាចក្រកម្ពុជា ត្រូវបានជាប់ចំណាត់ថ្នាក់លេខ១ ក្នុងចំណោមគោលដៅទេសចរណ៍កំពូលទាំង១៥ នៅតំបន់អាស៊ីអាគ្នេយ៍ប្រចាំឆ្នាំ២០១៩។ ទន្ទឹមនេះ ព្រឹត្តិការពិព័រណ៌ពាណិជ្ជកម្មផ្នែកម្ហូបអាហារ ភេសជ្ជ: សណ្ឋាគារ និងបដិសណ្ឋារកិច្ចខ្នាតអន្តរជាតិលំដាប់អន្តរជាតិចំណាត់ថ្នាក់លេខមួយនេះ ក៏ស្ថិតនៅក្នុងចក្ខវិស័យ របស់អង្គការទេសចរណ៍ពិភពលោក ហៅកាត់ថា UNWTO លើការចូលរួមទ្រទ្រង់ ការសម្រេចឱ្យបាននូវគោលដៅអភិវឌ្ឍន៍ នៃផលិតផលទេសចរណ៍ថ្មីៗ និងលើកកម្ពស់ឱ្យមានទេសចរណ៍ម្ហូបអាហារ ជាម្ហូបប្រពៃណីដ៍សម្បូរបែបនៅក្នុងតំបន់ សម្រាប់ភ្ញៀវទេសចរណ៍អន្តរជាតិផងដែរ។
សូមរំលឹកថា ពិព័រណ៌ម្ហូបអាហារ និងសណ្ឋាគារលើទី១ នៅខេត្តសៀមរាប មានអ្នកចូលរួមត្រឹមតែជាង៤,០០០នាក់ ដែលមកពី ៦ប្រទេសប៉ុណ្ណោះ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ សេង ផល្លី
