នៅព្រឹកថ្ងៃទី១២ ខែតុលា ឆ្នាំ២០១៩នេះ សារមន្ទីរវាយនភណ្ឌប្រពៃណីអាស៊ី មានទីតាំងនៅផ្លូវ៦០ម៉ែត្រ ស្ថិតក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប សហការជាមួយអាជ្ញាធរជាតិអប្សរា ស្ថានទូតឥណ្ឌាប្រចាំនៅកម្ពុជា និងក្រុមហ៊ុនវិចិត្រាឥណ្ឌានាំចេញ បានរៀបចំការតាំងពិព័រណ៍ ខាឌី-ផលិតផលសិប្បកម្មក្រណាត់ឥណ្ឌា លើកទី១ ក្នុងរយៈពេល០៣ថ្ងៃ ចាប់ពីថ្ងៃទី១២ ដល់ថ្ងៃទី១៤ ខែតុលា ឆ្នាំ២០១៩ ដោយបើកជូនសាធារណជនចូលទស្សនា សិក្សាស្វែងយល់ពីវប្បធម៌ឥណ្ឌាដោយសេរី ចាប់ពីម៉ោង៩ព្រឹក រហូតដល់ម៉ោង៧យប់ ដើម្បីអបអរសាទរខួបកំណើតលើកទី១៥០ឆ្នាំ របស់ វីរៈបុរសឥណ្ឌា មហាត្មៈគន្ធី (Mohatma Gandhi) ។
ពិធីបើកការតាំងពិព័រណ៍នេះ បានប្រព្រឹត្តទៅក្រោមអធិបតីភាព លោកជំទាវ ម៉ានីកា ជេន ឯកអគ្គរាជទូតសាធារណរដ្ឋឥណ្ឌាប្រចាំកម្ពុជា , ឯកឧត្តម សុន សេងហួត អនុរដ្ឋលេខាធិការ ក្រសួងឧស្សាហកម្មនិងសិប្បកម្ម និង លោក នាក់ណេរ៉ុន អភិបាលរងខេត្តនិងជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប ដោយមានការចូលរួមពីសំណាក់តំណាងអាជ្ញាធរជាតិអប្សរា និងថ្នាក់ដឹកនាំអង្គភាពមន្ទីរមួយចំនួនក្នុងខេត្ត ។
លោកជំទាវ ម៉ានីកា ជេន មានប្រសាសន៍ថា ខាឌី ជាក្រណាត់ធ្វើដោយដៃចេញពីការរវៃ មិនត្រឹមតែជាវិធីសាស្ត្រទាមទារសិទ្ឋិសេរីភាពមកវិញប៉ុណ្ណោះទេ តែជាគោលដៅធ្វើឱ្យប្រទេសក្លាយជាប្រទេសដែលមានការផលិតក្នុងស្រុកច្រើន និងជាម្ចាស់ប្រទេសគ្រប់គ្រងប្រទេសដោយខ្លួនឯង មិនស្ថិតក្រោមចំណុះបរទេសណាឡើយ ហើយការនាំចូលផលិតផលខោអាវពីអង់គ្លេស ដើម្បីកំណើនសេដ្ឋកិច្ចរបស់ពួកគេផ្ទាល់ត្រូវបានទទួលបរាជ័យ ដោយសារបដិវត្តរបស់មហាត្មៈ គន្ឋី ក្រោមការចូលរួមរបស់ប្រជាជនដោយនាំគ្នារវៃអំបោះធ្វើសម្លៀកបំពាក់ដោយខ្លួនឯង និងមានការចែកចាយគ្រប់គ្រាន់សម្រាប់ប្រើប្រាស់ ហើយក្រណាត់ ខាឌី នេះ ក៏ត្រូវបានបង្ហាញខ្លួនលើឆាកអន្តរជាតិដែរ។
លោកជំទាវ ម៉ានីកា ជេន បានបញ្ជាក់បន្ថែមថា ក្រណាត់ខាឌីមិនគ្រាន់តែជាក្រណាត់ធម្មតានោះទេ តែបានផ្តល់នូវសារប្រយោជន៍ដ៍មានអត្ថន័យ បន្ថែមពីនេះ ក្រណាត់ខាឌីមិនប៉ះពាល់បរិស្ថាន ងាយស្រួល មានភាពស្និទ្ឋស្នាល ប្រកបដោយផាសុខភាពនៅពេលគ្របដណ្តប់លើដងខ្លួន ហើយសង្វាក់ផលិតកម្មរបស់វាបានផ្តល់ការងារយ៉ាងច្រើនដល់អ្នកទីទ័លក្រ ដែលក្នុងរយៈពេល៣ឆ្នាំចុងក្រោយនេះ ការផលិតក្រណាត់ខាឌីកើនឡើង២៨ភាគរយ ហើយរដ្ឋាភិបាលឥណ្ឌា កំពុងមានផែនការជំរុញបន្ថែម ដែលនិយាយជារួម ក្រណាត់ដែលផលិតដោយជនជាតិឥណ្ឌា គឺជាផ្នែកដ៏សំខាន់ក្នុងការបង្រួបបង្រួមប្រជាជនឥណ្ឌាឱ្យរក្សាបាននូវរបរប្រពៃណី វត្ថុធាតុដើមក្នុងការផលិតក្រណាត់ ការកសាងសេដ្ឋកិច្ចជាតិ និងបានធ្វើប្រជាជនឥណ្ឌាឈប់ឱ្យតម្លៃលើផលិតផលបរទេស (អង់គ្លេស) ហើយងាកមកឱ្យតម្លៃលើផលិតផលក្នុងស្រុកវិញ និងរក្សាបាននូវអត្តសញ្ញាណជាតិ ឆ្លុះបញ្ចាំងពីខ្លួនឯងតាមរយៈការស្លៀកពាក់សម្លៀកបំពាក់នេះតែម្តង ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
