ក្នុងឱកាសដែលសមាគមចុងភៅកម្ពុជា ក្រោមកិច្ចសហការជាមួយសហព័ន្ធទេសចរណ៍កម្ពុជា បានរៀបចំព្រឹត្តិការណ៍នៃការតាំងពិព័រណ៌ ANGKORFOOD+HOTEL ឆ្នាំ២០១៩ ក្នុងរយៈពេល៣ថ្ងៃ ចាប់ពីថ្ងៃទី១០ ដល់ថ្ងៃទី១២ ខែតុលា ឆ្នាំ២០១៩នេះ ក៏បានរៀបចំនូវការប្រកួតប្រជែងចំអិនម្ហូបអាហារផងដែរ ( Angkor Culinary Challeng 2019 ) ក្នុងគោលបំណងជំរុញឲ្យវិស័យម្ហូបអាហារមានការរីកចម្រើន អភិវឌ្ឍកាន់តែប្រសើរឡើង ដោយត្រូវផ្សព្វផ្សាយចូលទៅក្នុងវិស័យទេសចរណ៍ បន្ថែមនូវជំនឿទុកចិត្តចំពោះសេវាកម្មដ៏ចាំបាច់មួយនេះ ដល់ភ្ញៀវទេសចរជាតិ-អន្តរជាតិ ដែលមិនត្រឹមតែជាការធានាចំពោះរសជាតិប៉ុណ្ណោះទេ តែត្រូវធានាបានទាំងអនាម័យ និងសុខុមាលភាពផងដែរ ។
ការប្រកួតប្រជែងចំអិនម្ហូបអាហារនេះ មានចុងភៅចំណានៗចំនួន៧៨ក្រុម បានចូលរួម មាន១១វិញ្ញាសារ ដែលបានកំណត់ដោយគណៈកម្មការរៀបចំការប្រកួត ហើយពួកគេត្រូវបានជ្រើសរើសយកវិញ្ញាសារណាមួយ តាមការព្រមព្រៀងរបស់ក្រុមនីមួយៗ ដោយមានមេចុងភៅល្បីៗចំនួន៨រូប មកពីប្រទេសមីយ៉ាន់ម៉ា ១រូប , ប្រទេសសឹង្ហបូរី ១រូប , ប្រទេសថៃ ៣រូប , ប្រទេសម៉ាឡេស៊ី ១រូប , ចុងភៅបរទេសមកពីភ្នំពេញ ១រូប និងចុងភៅកម្ពុជា ១រូប បានចូលរួមដាក់ពិន្ទុសម្រាប់ការប្រកួតនេះ ហើយបានប្រកាសលទ្ធផលជ័យលាភី កាលពីរសៀលថ្ងៃទី១២ ខែតុលា ឆ្នាំ២០១៩ ។
លោក វិញ សាន សហស្ថាបនិកសមាគមចុងភៅកម្ពុជា បានឲ្យដឹងថា ៖ សម្រាប់ការប្រកួតប្រជែងចំអិនម្ហូបអាហារនេះ មានចុងភៅ៧៨ក្រុម ស្មើនឹងជាង៩០នាក់ ដែលជាអ្នកជំនាញចំអិនម្ហូប មកពីបណ្តាសណ្ឋាគារ ភោជនីយ៍ដ្ឋាននានាក្នុងខេត្តសៀមរាប ហើយនៅក្នុង១១វិញ្ញាសារនៃការប្រកួតនេះ ត្រូវបានបែងចែកជា២ផ្នែក ៖ គឺទី១. ការប្រកួតប្រជែងចំអិតម្ហូបអាហារបែបបរទេស មានសាច់គោ មាន់ ទា និងគ្រឿងសមុទ្រ និងការដាក់តាំងនំប៉័ង និង ទី២. គឺការប្រកួតប្រជែងចំអិនម្ហូបខ្មែរ មានសាច់គោ មាន់ ទា គ្រឿងសមុទ្រ និងម្ហូបខ្មែរប្រពៃណី មានអាម៉ុក និង នំបញ្ចុក ព្រមទាំងចម្លាក់ផ្លែឈើ និងបង្អែម ។
លោក ឡុង ប៊ុនហោ ប្រធានសមាគមចុងភៅកម្ពុជា បានឲ្យដឹងថា នៅក្នុងបណ្តាប្រទេសមួយចំនួនក្នុងតំបន់អាស៊ាន ការរៀបចំប្រឡងប្រជែងធ្វើម្ហូប ត្រូវបានរៀបចំឡើងជារៀងរាល់ឆ្នាំ ហើយសមាគមចុងភៅកម្ពុជា មិនដែលអាក់ខានទេក្នុងការចូលរួមប្រកួតនោះ ដែលនោះហើយគឺជាបទពិសោធន៍ ដែលសមាគមចុងភៅកម្ពុជាបានរៀបចំការប្រកួតនេះ ដោយសារតែការប្រកួតនេះ វាបានផ្តល់នូវការរីកចម្រើនសម្រាប់ថ្ងៃអនាគត ហើយក៏ជាគោលដៅរបស់សមាគមចុងភៅកម្ពុជាផងដែរ ក្នុងការលើកកម្ពស់អានាម័យ បង្ហាញម្ហូបខ្មែរឲ្យបានទូលំទូលាយទៅកាន់ភ្ញៀវទេសចរអន្តរជាតិ ហើយអ្វីដែលសំខាន់ជាងនេះ គឺការអភិរក្សម្ហូបខ្មែរបូរាណនាសម័យកាលមុនៗ ។
លោក ពិនប្រាកដ អភិបាលរងខេត្តសៀមរាបរាប មានប្រសាសន៍ថា ព្រឹត្តិការណ៍នេះ ជាមួយនឹងការចូលរួមដោយភ្ញៀវជាតិ-អន្តរជាតិ រសជាតិម្ហូបខ្មែរ នឹងត្រូវបានផ្សព្វផ្សាយទៅកាន់ពិភពលោក ហើយសង្ឃឹមថា រសជាតិម្ហូបខ្មែរក៏ជាឥទ្ធិពលនៃការទាក់ទាញភ្ញៀវទេសចរផងដែរ ។
សូមបញ្ជាក់ថា មេដាយជ័យលាភីលើការប្រឡងធ្វើម្ហូបទាំង១១វិញ្ញាសារ លើ៧៨ក្រុម ត្រូវបានជ្រើសយក១១ក្រុម ក្នុងនោះក្រុមនីមួយៗមានចំណាត់ជ័យលាភីលេខ៣ ទទួលបានមេដាយសំរឹទ្ធ លេខ២ មេដាយប្រាក់ និងលេខ១ ទទួលបានមេដាយមាស អមដោយរង្វាន់ ៦០ម៉ឺនរៀល ។
ដោយឡែកសម្រាប់ជ័យលាភីពានរង្វាន់ធំ អមដោយរង្វាន់ថវិកា៥០០ដុល្លារ ត្រូវបានរៀបចំឲ្យមានការប្រកួតចំអិនម្ហូបខ្មែរតែប៉ុណ្ណោះ ដោយមានក្រុមចុងភៅចំនួន៩ក្រុមបានចូលរួម ដោយក្នុងមួយក្រុមៗត្រូវបានចំអិនម្ហូបចំនួន៨មុខ ក្នុង១មុខ មាន៦ចាន ដើម្បីគណៈកម្មការដាក់ពិន្ទុ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
