តម្រូវការអំបុកក្នុងខេត្តសៀមរាប កំពុងមានការកើនឡើងជាបន្តបន្ទាប់ ក្រោយពេលប្រមុខរាជរដ្ឋាភិបាល បានប្រកាសយកថ្ងៃទី០៩វិច្ឆិកា ជាថ្ងៃទិវាហូបអំបុកទូទាំងប្រទេស ជាពិសេសប្រជាពលរដ្ឋផលិតអំបុក នៅស្រុកពួក ខេត្ដសៀមរាប រំពឹងថានឹងទទួលតម្លៃកាន់តែល្អប្រសើរ ដើម្បីផ្គត់ផ្គង់ជីវភាព។
តាមការឲ្យដឹងពី លោក រិច គ្រីន អ្នកផលិតអំបុក នៅភូមិរការ ឃុំល្វាស្រុកពួក បាននិយាយថា នាពេលបច្ចុប្បន្ននេះ ការផលិតអំបុករបស់ប្រជាពលរដ្ឋនៅភូមិរបស់លោកប្រមាណជាង២០០គ្រួសារ កំពុងមានទីផ្សារជាបណ្ដើរហើយ និងមានអ្នកបញ្ជាទិញជាបន្ដបន្ទាប់។
លោកបន្តថា ក្នុងមួយថ្ងៃលោកបានធ្វើអំបុកបោះអោយក្រុមឈ្មួញកណ្ដាលបានប្រមាណ១០០គីឡូក្រាម ដោយមួយគីមានតម្លៃ៤៥០០រៀល។ បើតាមការប៉ាន់ស្មានរបស់លោក រយៈពេលបីថ្ងៃ ពលរដ្ឋនៅក្នុងភូមិរបស់លោកធ្វើអំបុក អស់ប្រមាណជិត១តោន។
ព័ត៌មានជាតិ ថ្មីៗ
អ្នកផលិតអំបុកមួយរូបទៀត លោក ឆន ណូ បានលើកឡើងថា ការធ្វើអំបុក ត្រូវការចំណាយដើមទុនមួយចំនួន ដូចជា ការរៀបចំបច្ចេកទេសគ្រឿងចក្រផលិតអំបុក ដើម្បីឲ្យផលិតបានទាន់ពេលវេលា និងទិញស្រូវជាដើម។ លោក ឆន ណូ បានបញ្ជាក់ថា អំបុកដែលផលិតនៅទីនេះ គឺជាអំបុកស្រូវថ្មីពិតៗ មិនមានដាក់បន្ថែមសារធាតុអ្វីឡើយ។
លោកក៏បានគាំទ្រដល់ប្រមុខរាជរដ្ឋាភិបាល ដែលបានលើកកម្ពស់របរ ក៏ដូចជាអាហារប្រពៃណីមួយនេះ នៅក្នុងថ្ងៃទី៩ខែវិច្ឆិកាឆ្នាំ២០១៩ខាងមុខ ដែលវាបានជួយដល់ប្រជាពលរដ្ឋ ឲ្យទទួលបានប្រាក់ចំណូលបន្ថែមក្រៅពីមុខរបរកសិកម្ម។
សូមជម្រាបថា ភូមិរការ ស្ថិតនៅក្នុងឃុំល្វា ដែលមានចំង៉ាយប្រមាណជាង១០គីឡូម៉ែត្រ ពីទីរួមស្រុកពួក តាមផ្លូវឆ្ពោះទៅស្រុកអង្គរជុំ ខេត្ដសៀមរាប៕
ពលរដ្ឋផលិតអំបុកខេត្តសៀមរាប សាទរដល់ប្រមុខរាជរដ្ឋាភិបាលចំពោះការប្រកាស……………..
ពលរដ្ឋផលិតអំបុកខេត្តសៀមរាប សាទរដល់ប្រមុខរាជរដ្ឋាភិបាលចំពោះការប្រកាស ទិវាហូបអំបុកទូទាំងប្រទេស ៩វិច្ឋិកា#ព័ត៌មានខេត្តសៀមរាប#អំបុក
Posted by ទូរទស្សន៍ជាតិខេត្តសៀមរាប – TV Siem Reap on Monday, October 14, 2019
អត្ថបទ និង រូបភាព៖ បូ សាវី និង ខេង ឧត្តម
កែសម្រួល៖ សេង ផល្លី
