នៅវេលាម៉ោងប្រមាណ៤រសៀល ថ្ងៃទី១៣ ខែតុលា ឆ្នាំ២០១៩ ស្ថិតនៅចំនុចលូរក្រប៉ៅ ទំនប់៧៨ ខាងលិចភ្នំក្រោម ក្នុងភូមិកន្ត្រក សង្កាត់ស្វាយដង្គំ ក្រុងសៀមរាប ខេត្តសៀមរាប មានករណីអំពើហិង្សាមួយកើតឡើង រវាងមនុស្សពីរក្រុម បណ្ដាលឲ្យមនុស្សម្នាក់ស្លាប់ និង២នាក់ទៀតរងរបួសធ្ងន់។
សមត្ថកិច្ចបានឲ្យដឹងថា អំពើហិង្សានោះកើតឡើងដោយសារ ក្រុមជងរងគ្រោះ មានគ្នាបីនាក់ បានផឹកស្រាបៀរនិយាយខ្លាំងៗ និងគប់សំបកកំប៉ុងមកលើក្រុមជនងសង្ស័យ បន្ទាប់មកក្រុមជនសង្ស័យ បានលើកគ្នាប្រហែលជាង១០នាក់ដេញវាយខាងជនរងគ្រោះ។
សមត្ថកិច្ចបន្តថា ក្រុមជងរងគ្រោះដែលត្រូវគេវាយនោះ ទី១ ឈ្មោះម៉ន វ៉ិត ភេទប្រុស អាយុ២២ឆ្នាំ មុខរបរបុគ្គលិកសណ្ឋាគារ ស្លាប់ដោយធ្លាក់ទឹក។ ទី២ ឈ្មោះប៉ៅ ប៊ុនហោ ភេទប្រុសអាយុ២៥ឆ្នាំ មុខរបរជាងភ្លើង របួសបាក់ស្មាស្តាំ សង្គ្រោះនៅមន្ទីពេទ្យខេត្តសៀមរាប ។ ទី៣ឈ្មោះ គី វាសនា ហៅង៉ា ភេទប្រុស អាយុ២៨ឆ្នាំ ជាអ្នកគប់សំបកកំប៉ុងលើក្រុមជនសង្ស័យ។
បន្ទាប់ពីទទួលបានពាក្យបណ្ដឹងរបស់ជនរងគ្រោះ កម្លាំងកងរាជអាវុធហត្ថខេត្តសៀមរាប កំពុងស្រាវជ្រាវតាមចាប់ខ្លួនជនបង្ក ដើម្បីចាត់ការទៅតាមផ្លូវច្បាប់។
អត្ថបទ និង រូបភាព៖ ខេង ឧត្តម
កែសម្រួល៖ សេង ផល្លី
