នាព្រឹកថ្ងៃទី១៤ ខែតុលា ឆ្នាំ២០១៩ ឯកឧត្តម អ្នកឧកញ៉ាបណ្ឌិត សៀង ណាំ ឯកឧត្តម អ្នកឧកញ៉ាបណ្ឌិត សៀង ណាំនិងលោកជំទាវព្រមទាំងបុត្រ រួមនិងពុទ្ធបរិស័ទ ដង្ហែរអង្គកឋិនទៅវេរប្រគេនព្រះសង្ឃដែលគង់ចាំព្រះវស្សាអស់ត្រីមាសក្នុង វត្ត បទុមរតនញ្ញាណ ហៅវត្តស្រណាល ឃុំស្រណាល ស្រុកក្រឡាញ់ ខេត្តសៀមរាប។
ឯកឧត្តម អ្នកឧកញ៉ាបណ្ឌិត សៀង ណាំ បានលើកឡើងថា តាំងពីក្រោយថ្ងៃរំដោះ៧មករានោះមក កម្ពុជាបានខិតខំកសាងប្រទេសជាតិ និងសាសនារបស់ខ្លួនដោយបាតដៃទទេ រាជរដ្ឋាភិបាលកម្ពុជា ដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រី បានខិតខំស្វែងរក និងថែរក្សាការពារសុខសន្តិភាព ពង្រឹងស្ថិរភាពនយោបាយ ព្រមទាំងខិតខំអភិវឌ្ឍន៍ស្រុកទេសដ៏កម្សត់មួយនេះ ឱ្យមានការរីកចម្រើនទៅមុខ។ នៅប្រទេសកម្ពុជា ព្រះពុទ្ធសាសនា និងសាសនាដទៃទៀតសុទ្ធតែមានកំណើតពីរ ពោលគឺកំណើតទី២ កើតក្រោយថ្ងៃរំដោះប្រទេស និងប្រជាជនកម្ពុជា នៅថ្ងៃ៧ មករា ១៩៧៩ ក្រោយត្រូវបានបំផ្លិចបំផ្លាញខ្ទេចខ្ទីគ្មានសល់ដោយរបបខ្មែរក្រហម ប៉ុល ពត ដ៏ខ្មៅងងឹតយង់ឃ្នង។
ឯកឧត្តម គូសបញ្ជាក់ថា «នេះជាសច្ចធម៌ប្រវត្តិសាស្ត្ររបស់កម្ពុជា ដែលគ្មានបុគ្គលណាម្នាក់ ឬក្រុមណាមួយអាចបំភ្លៃ និងបំផ្លើសបានឡើយ។ ឯកឧត្តម បានបន្តទៀតថា ថ្វីដ្បិតក្នុងរដ្ឋធម្មនុញ្ញានៃព្រះរាជាណាចក្រកម្ពុជា បានចែងថាព្រះពុទ្ធសាសនាជាសាសនរបស់រដ្ឋក៏ពិតមែន ប៉ុន្តែប្រជាពលរដ្ឋក៏អាចគោរពប្រតិបត្តិតាមសាសនាដទៃទៀតបានដែរ ដូចជា គ្រិស្តសាសនា ឥស្លាមសាសនាជាដើម ពីព្រោះវាជាសិទ្ធិសេរីភាពរបស់ប្រជាពលរដ្ឋ ពីព្រោះគោលនយោបាយរបស់រាជរដ្ឋាភិបាល គឺធ្វើយ៉ាងណាងឱ្យសាសនាទាំងអស់នៅកម្ពុជាមានសុខដុមរមនាជាមួយគ្នា ក្រោមម្លប់សុខសន្តិភាព និងការរួបរួមជាតិតែមួយ។
ឯកឧត្តម អ្នកឧកញ៉ាបណ្ឌិត សៀង ណាំ ក៏បានផ្ដាំផ្ញើដល់ប្រជាពលរដ្ឋសូមចូលរួមធ្វើអំពើល្អ ថែរក្សាការពារសុខសន្តិភាព ពិសេសកុំចូលរួមជាមួយចលនាណាដែលទៅដល់ការបង្កបញ្ហាក្នុងសង្គម ចលាចលសង្គម បំផ្លាញសុខសន្តិភាពដែលរកបានដោយលំបាក ឬនាំទៅដល់សង្គ្រាមជាដើម។
អត្ថបទ និង រូបភាព៖ អ៊ិន សីហរិទ្ធ
កែសម្រួល៖ សេង ផល្លី
