កាលពីយប់ថ្ងៃទី១៤ ខែតុលា ឆ្នាំ២០១៩ ព្រះសង្ឃ គណៈកម្មការអាចារ្យវត្តអារញ្ញសាគរ ក្នុងក្រុងសៀមរាប និងប្រជាពុទ្ឋបរិស័ទចំណុះជើងវត្ត បានមូលមតិគ្នារៀបចំពិធីដង្ហែប្រទីប បណ្តែតកន្ទោង អុជកាំជ្រួញ រួមជាមួយដូរ្យតន្ត្រីប្រពៃណីជាតិ នាំគ្នាពពាក់ពពូនដង្ហែអង្គប្រទីបជ្វាលា ឆ្ពោះទៅកាន់ប៉ែកខាងក្រោម ដើម្បីនាំយកប្រទីប ផ្កាភ្ញីទៀនធូបបណ្តែតពីកន្ទុយស្ទឹងសៀមរាបទៅកាន់ទន្លេសាប ។
នេះជាប្រពៃណីមួយដែលមានតាំងពីបុរមបុរាណ ហើយអ្នកស្រុកនៅក្នុងមូលដ្ឋានម្តុំវត្តនេះ តែងតែប្រារព្ឋធ្វើតៗគ្នាមិនដែលអាក់ខានឡើយ លើកលែងតែសម័យកាលរបបខ្មែរក្រហម។
បើតាមការប៉ាន់ប្រមាណពីអាជ្ញាធរមូលដ្ឋានថា ទាំងបងប្អូនប្រជាពលរដ្ឋជិតឆ្ងាយនិងព្រះសង្ឃបានចូលរួមសប្បាយក្នុងពិធីប្រពៃណីទំនៀមទំលាប់ឆ្នាំនេះប្រហែលជាង១ម៉ឺននាក់ ច្រើនជាងឆ្នាំមុនៗ ដែលពិធីនេះបានប្រព្រឹត្តទៅក្រោមព្រះអធិបតីថ្វាយភ្លើងដល់អង្គប្រទីបពីសំណាក់ព្រះគ្រូវិជ័យរង្សី សាសនធរោ ឡាច លាច ព្រះគ្រូអនុគណក្រុងសៀមរាប និងជាព្រះចៅអធិការវត្តទេពពោធិវង្សហៅវត្តថ្មី លោក ម៉ៃ សាមេត ចៅសង្កាត់សៀមរាប ព្រមទាំងបានការចូលរួមសហការអស់ពីចិត្តពីថ្លើមសម្រួលសន្តិសុខសណ្តាប់ធ្នាប់ សុវត្ថិភាពចរាចរណ៍ពីកំលាំងនគរបាលរដ្ឋបាលប៉ុស្តិ៍សៀមរាប និងប្រជាការពារផងដែរ។
លោក កង ជឿន ប្រធានគណៈកម្មការវត្ត ដែលមានដើមកំណើតនិងមានជីដូនជីតាសាច់សន្តានសុទ្ឋតែជាអ្នកភូមិវត្តអារញ្ញា បានមានប្រសាសន៍ថា៖តាំងពីដឹងក្តីពីតូចៗមក ឃើញតែចាស់ៗគាត់តែងតែនាំគ្នាធ្វើប្រទីបយកទៅបណ្តែតនៅឯចុងខាងក្រោមស្ទឺងសៀមរាប ហើយក្មេងៗយុវជនកម្លោះក្រមុំតែងតែនាំគ្នាសប្បាយជារៀងរាល់ឆ្នាំ ហើយមកដល់សម័យនេះ ពិធីបណ្តែតប្រទីបពេលចេញវស្សារួចនៅតែមានអ្នកចូលរួមយ៉ាងពពាក់ពពូន ជាពិសេសកូនចៅនៅក្នុងភូមិឃុំក្បែរៗនេះតែម្តង ពួកគេមិនភ្លេចប្រពៃណីទំនៀមទំលាប់ឡើយ។
ព្រះគ្រូសុធីវរបញ្ញាវិសារទោ ហ៊ាក់ គឹមហ៊ត់ ហៅហំ ព្រះគ្រូចៅអធិការវត្តអារញ្ញសាគរ មានថេរដិកាថា៖មួយឆ្នាំម្តងនៅថ្ងៃចេញវស្សា ចាស់ទុំក្បែរវត្ត នាំគ្នាធ្វើពិធីនេះគឺដើម្បីសម្តែងការដឹងគុណដល់ម្ចាស់ទឹកម្ចាស់ដីដែលយើងប្រើប្រាស់ទឹកដីអស់រយៈពេលមួយឆ្នាំ និងដើម្បីបង្ហាញដល់ក្មេងៗស្រករក្រោយឱ្យបានដឹងបានយល់អំពីវប្បធម៌ប្រពៃណីទំនៀមទម្លាប់ដែលបុព្វបុរសរបស់ខ្មែរបានបន្សល់ទុកមក ហើយនាំគ្នាគោរពនិងថែរក្សាកុំឱ្យសាបរលាបនិងបាត់បង់ និងទុកជាកេរ្តិ៍ដំណែលតកូនចៅគ្រប់ៗជំនាន់ទៅថ្ងៃក្រោយរបស់យើងឱ្យពួគគាត់បានស្គាល់ផង។
ព្រះអង្គមានថេរដីកាបន្ថែមថា៖ពិធីបុណ្យចេញព្រះវស្សា ជាពិធីតាមបែបព្រះពុទ្ឋសាសនាមួយ ក្នុងចំណោមពិធីបុណ្យព្រះពុទ្ឋសាសនាជាច្រើនទៀត ដែលប្រជាពុទ្ឋបរិស័ទក្នុងមូលដ្ឋានចំណុះជើងវត្តនេះ ស្រឡាញ់ គោរពនិងជឿជាក់លើព្រះពុទ្ឋសាសនា និងដើរតាមលំអានប្រពៃណីទំនៀមទម្លាប់ដែលមានតាំងពីដូនតមកដល់សព្វថ្ងៃ ហេតុនេះដើម្បីរួមគ្នាអភិរក្សប្រពៃណីទំនៀមទម្លាប់ខ្មែរតាមតំបន់ភូមិស្រុក ព្រះសង្ឃនិងគណៈកម្មការវត្ត សហការជាមួយអាជ្ញាធរមូលដ្ឋានមិនខ្លាចហត់នឿយនោះទេ គឺតែងតែរៀបចំជារៀងរាល់ឆ្នាំទោះតូចក្តីធំក្តី ឬអ្នកចូលរួមសប្បាយតិចក្តីច្រើនក្តី ក៏ត្រូវតែធ្វើដើម្បីរក្សាកេរតំណែលដូនតាយើងទាំងអស់គ្នា។
សូមបញ្ជាក់ថា៖ពិធីបុណ្យចេញព្រះវស្សា ជាពិធីបុណ្យតាមកាលក្រោយពីព្រះសង្ឃគង់ចាំវស្សាអស់រយៈពេលបីខែ លុះផុតកំណត់ចាំវស្សា៣ខែហើយ នៅថ្ងៃ១៥កើត ពេញបូណ៌មីខែ អស្សុជ ភិក្ខុសង្ឃត្រូវធ្វើកិច្ចចេញវស្សារបស់ ខ្លួនវិញដែលហៅថា “បុណ្យចេញវស្សា ” ឬ “ បុណ្យបវរណា ” ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
