កាលពីព្រឹកថ្ងៃទី១៤ ខែតុលា ឆ្នាំ២០១៩នេះ សាលាអន្តរជាតិភ្យូឆឺរប្រាយខេត្តសៀមរាប ហៅកាត់ជាភាសាបរទេស FBIS បានរៀបចំធ្វើសន្និសីទសារព័ត៌មានមួយ ស្តីពីជ័យលាភីសិស្សានុសិស្ស ប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៨-២០១៩ សម័យប្រឡងថ្ងៃទី១៩ ខែសីហា ឆ្នាំ២០១៩កន្លងទៅ ដែលនៅក្នុងសម័យប្រឡងនោះ សាលា FBIS មានសិស្សជាបេក្ខជន-បេក្ខនារីសារុបចំនួន ១២៦នាក់ ក្នុងនោះសិស្សប្រឡងជាប់មានចំនួន ១២៣នាក់ ស្មើនឹង ៩៨ភាគរយ ហើយសិស្សទទួលបាននិទ្ទេស A មានចំនួន ៨នាក់ , និទ្ទេស B មានចំនួន ១៨នាក់ , និទ្ទេស C មានចំនួន ៣៦នាក់ , និទ្ទេស D មានចំនួន ៤០នាក់ និង និទ្ទេស C មានចំនួន ២១នាក់ ។
លោក ហួត គង់យូរ នាយកប្រតិបត្តិសាលាអន្តរជាតិភ្យូឆឺរប្រាយ ( FBIS ) ខេត្តសៀមរាប បានមានប្រសាសន៍ថា ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដឹកនាំ និងយកចិត្តទុកដាក់ លើការងារពង្រឹងគុណភាពអប់រំ និងបណ្តុះបណ្តាលធនធានមនុស្ស នេះគឺជាហេតុផល ដែលអនុញ្ញាតឲ្យមានសាលាឯកជន បានចូលរួមតាមគោលដៅនៃការអភិវឌ្ឍធនធានមនុស្ស ហើយជាការពិត សមិទ្ធផលដែលកើតចេញដោយការចូលរួមនោះ វាពិតជាបានបង្ហាញឲ្យឃើញថា ការវិនិយោគក្នុងវិស័យអប់រំរបស់វិស័យឯកជន ពិតជាផលិតបាននូវធនធានមនុស្ស ស្របតាមគោលនយោបាយរបស់រាជរដ្ឋាភិបាល ប្រាកដមែន ។
លោក ហួត គង់យូរ មានប្រសាសន៍បន្ថែមថា ការរៀបចំឲ្យមានសន្និសីទសារព័ត៌មាននេះ គឺស្ថិតក្នុងបំណងផ្តល់ឱកាសសម្រាប់ឲ្យសិស្សទទួលជ័យលាភីនិទ្ទេស A បានចែករំលែកបទពិសោធន៍របស់ខ្លួនទៅដល់សិស្សប្អូនដែលត្រៀមប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០១៩-២០២០ ខាងមុខ ហើយក៏ជាបំណងដ៏សំខាន់ផងដែរនៃកម្មវិធីនេះ គឺដើម្បីលើកទឹកចិត្តសម្រាប់សិស្សជ័យលាភីទាំងនោះ រួមមានសិស្សនិទ្ទេស A ទាំង ៨រូប ទទួលបានរង្វាន់កុំព្យូទ័រ ម្នាក់១គ្រឿង និងប័ណ្ណសរសើរ១សន្លឹក ដោយឡែកសិស្សនិទ្ទេស B និង C ទទួលបានប័ណ្ណសរសើរម្នាក់១សន្លឹក ផងដែរ ។
សូមបញ្ជាក់ថា ក្នុងសម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៨-២០១៩នេះ មណ្ឌលសៀមរាប មានបេក្ខជនប្រឡងចំនួនសរុប ៨.៤២៨នាក់ ក្នុងនោះស្រីចំនួន ៤.៦៨៩នាក់ អវត្តមានមិនមកប្រឡងចំនួន៦៤នាក់ មាន១៣ មណ្ឌល ស្មើ ៣៨៤ បន្ទប់ សិស្សប្រឡងជាប់ចំនួន៦.៥១១នាក់ ក្នុងនោះស្រីចំនួន ៣.៧៦៣ នាក់ ស្មើនឹង៧៧,២៦ភាគរយ មានស្រីចំនួន ៨០,០៨ ភាគរយ ហើយសិស្សដែលប្រឡងជាប់និទ្ទេស A មានចំនួន៣៨នាក់ ក្នុងនោះស្រីចំនួន១៥នាក់ , និទ្ទេស B ចំនួន១៩០នាក់ ក្នុងនោះស្រីចំនួន១០៥នាក់ , និទ្ទេស C ចំនួន៤៧៤នាក់ ក្នុងនោះស្រីចំនួន ២៩៤នាក់ , និទ្ទេស D ចំនួន១.៣១៤នាក់ ក្នុងនោះស្រីចំនួន៨២៨ នាក់ និង និទ្ទេស E ចំនួន៤.៤៩៥នាក់ ក្នុងនោះស្រីចំនួន២.៥២១ នាក់ ។
គួររំលឹកថា កាលពីថ្ងៃទី០៧ ខែតុលា ឆ្នាំ២០១៩កន្លងទៅ សិស្សជ័យលាភីនិទ្ទេស A ទូទាំងប្រទេស នាសម័យប្រឡងមធ្យមសិក្សាទុតិយភូមិឆ្នាំសិក្សា២០១៨-២០១៩ មានកិត្តិយសបានជួបផ្ទាល់ជាមួយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីសំណេះសំណាលដ៏ធំមួយនៅរាជធានីភ្នំពេញ ជាសក្ខីភាពនៃការលើកទឹកចិត្តដ៏សំខាន់ សម្រាប់ការខិតខំរៀនសូត្ររបស់សិស្ស ដែលជាអនាគតធនធានមនុស្សប្រកបដោយគុណភាព លើមាគ៌ានៃការអភិវឌ្ឍប្រទេសជាតិ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
