នៅថ្ងៃទី១២ ខែតុលា ឆ្នាំ២០១៩ ក្នុងពិធីចុះជួបសួរសុខទុក្ខ និងផ្ដល់ពូជស្រូវដល់ប្រជាពលរដ្ឋ ក្នុងស្រុកសូទ្រនិគម ខេត្តសៀមរាប ឯកឧត្តម អ្នកឧកញ៉ាបណ្ឌិត សៀង ណាំ អ្នកតំណាងរាស្ត្រ មណ្ឌលសៀមរាប ឯកឧត្តម ប៊ូ ផាន់សារី ប្រធានក្រុមការងារថ្នាក់កណ្តាលចុះជួយស្រុកសូទ្រនិគម រួមនឹងឯកឧត្តម ង៉ាន់ ភិរុណ ក្រុមការងារថ្នាក់ខេត្តសៀមរាប បានអំពាវនាវដល់ប្រជាពលរដ្ឋ រួមគ្នាគាំពារសន្តិភាព និងការអភិវឌ្ឍប្រទេស ព្រមទាំងថែរក្សានូវសមិទ្ធផលនានា របស់រាជរដ្ឋាភិបាល ដែលបានផ្តល់ជូនឲ្យបានគង់វង្ស សម្រាប់ទុកដល់កូនចៅជំនាន់ក្រោយៗទៀត។
ឯកឧត្តម អ្នកឧកញ៉ាបណ្ឌិត សៀង ណាំ មានប្រសាសន៍ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តែងតែគិតគូរ និងដោះស្រាយពីសុខទុក្ខរបស់ប្រជាពលរដ្ឋកម្ពុជាទូទាំងប្រទេស ព្រមទាំងបង្ហាញអំពីសាមគ្គីភាព ការពារព្រះមហាក្សត្រ និង ជាតិសាសនា។ ដូច្នេះ សូមប្រជាពលរដ្ឋកម្ពុជាទាំងអស់ រួមគ្នាកសាង និង អភិវឌ្ឍន៍ ភូមិ ឃុំ ឲ្យមានភាពរីកចម្រើន ទប់ស្កាត់រាល់ឧបាយកលដែលក្រុមអគតិមានបំណងអាក្រក់ចង់បង្ករ ចលាចល អសន្តិសុខ អនាធិបតេយ្យ។ ជាពិសេស យុវជន គ្រប់រូប ត្រូវជៀសចេញឲ្យឆ្ងាយពីក្រុមមានគោលបំណង ចង់ផ្តូលរំលំរាជរដ្ឋាភិបាលស្របច្បាប់ កើតចេញ ពីការបោះឆ្នោតគាំទ្ររបស់ប្រជាពលរដ្ឋ និង កុំជឿនូវពាក្យឃោសនាអកុសល របស់ជនក្បត់ជាតិ ក្បត់ព្រះមហាក្សត្រ។
ឯកឧត្តម អ្នកឧកញ៉ាបណ្ឌិត សៀង ណាំ ក៏បានក្រើនរំលឹកដល់ កម្លាំងសមត្ថកិច្ច ប្រជាការពារ ត្រូវពង្រឹងសុវត្ថិភាពនៅក្នុងមូលដ្ឋាន។ ក្នុងនោះអាជ្ញាធរគ្រប់លំដាប់ថ្នាក់ត្រូវខិតខំដោះស្រាយសេវាសាធារណៈជូនប្រជាពលរដ្ឋឲ្យបានទាន់ពេលវេលាទាំងសេវាសំណូមពរ និងសេវាតម្រូវការ ។
ឆ្លៀតក្នុងឱកាសនោះដែរ ក្រុមការងារថ្នាក់កណ្តាលចុះជួយស្រុកសូទ្រនិគម ក៏បាននាំយកអំណោយសម្តេចពិជ័យសេនា ទៀ បាញ់ និង លោក ជំទាវ ចែកជូនបងប្អូន ម្នាក់ៗ ក្រម៉ា១ សារុង១ និងថវិកាមួយចំនួន ព្រមទាំងរៀបចំពិសារអាហារ នំបញ្ចុក សន្តិភាព ក្នុង ស្មារតីសាមគ្គីភាព នៃមហាគ្រួសារខ្មែរតែមួយផងដែរ ៕
អត្ថបទ និង រូបភាព៖ ម៉ី សុខារិទ្ធ
កែសម្រួល៖ សេង ផល្លី
