ក្រសួងរៀបចំដែនដី នគរូបនីយកម្មនិងសំណង់ បានរៀបចំសិក្ខាសាលាមួយ កាលពីព្រឹកថ្ងៃទី១៨ ព្រឹកមិញនេះ នៅសណ្ឋាគារអង្គរដាវ័ណ្ណ ក្នុងក្រុងសៀមរាប ស្តីពីការយល់ដឹងទូទៅនៃឥទ្ឋិពលគ្រឿងញៀន នឹងការរីករាលដាលនៃការឆ្លងមេរោគអេដស៍ ជម្ងឺអេដស៍ សម្រាប់មន្ត្រីក្រោមឱវាទរបស់ក្រសួងនិងមន្ត្រីនៃគណៈកម្មាធិការប្រយុទ្ឋប្រឆាំងនឹងជម្ងឺអេដស៍ ប្រមាណ ១០០នាក់ មកពីខេត្តកំពង់ធំ , សៀមរាប , ឧត្តរមានជ័យ , បន្ទាយមានជ័យ , ព្រះវិហារ និង រាជធានីភ្នំពេញ។
ក្នុងគោលបំណង ផ្តល់ការយល់ដឹងបន្ថែមទៀត លើបញ្ហាគ្រឿងញៀន នៅទីជនបទ ការហាមឃាត់ការដាំដុះរុក្ខជាតិញៀននិងការរីករាលដាលនៃការឆ្លងមេរោគអេដស៍ ជម្ងឺអេដស៍ ដែលកំពុងរីករាលដាលនៅលើពិភពលោក ក៏ដូចជានៅក្នុងព្រះរាជាណាចក្រកម្ពុជា ក្រោមប្រធានបទចំនួនពីរ ៖ ទី១. ស្តីអំពីការយល់ដឹងទូទៅនៃឥទ្ឋិពលគ្រឿងញៀន និង ទី២. ស្តីអំពីការរីករាលដាលនៃការឆ្លងមេរោគអេដស៍ ជម្ងឺអេដស៍ ដែលមានរយៈពេលពីរថ្ងៃចាប់ពីថ្ងៃទី១៨ដល់ថ្ងៃទី១៩ ខែតុលា ឆ្នាំ២០១៨ ។
លោកជំទាវ ទិត្យ ច័ន្ទតារីន អនុរដ្ឋលេខាធិការក្រសួងរៀបចំដែនដី នគរូបនីយកម្មនិងសំណង់ បានមានប្រសាសន៍ សិក្ខាសាលានៅពេលនេះ ពិតជានាំមកនូវចំណេះដឹងថ្មីៗបន្ថែមទៀត និងបានជាសារចែករំលែក និងផ្សព្វផ្សាយ ដើម្បីរួមគ្នាទប់ស្កាត់ចំពោះបញ្ហាគ្រឿងញៀន និងការរីករាលដាលនៃមេរោគអេដស៍ ជម្ងឺអេដស៍ដល់សហការី កម្មករ កម្មការីនី នៅតាមសហគ្រាសសំណង់នានា ឱ្យកាន់តែមានប្រសិទ្ឋភាព និងផ្សព្វផ្សាយដល់ប្រជាពលរដ្ឋតាមមូលដ្ឋានមិនឱ្យដាំដុះរុក្ខជាតិញៀន ដោយប្រែក្លាយដីទៅជាដីដាំដំណាំកសិកម្ម ។
លោកជំទាវ ទិត្យ ច័ន្ទតារីន បានមានប្រសាសន៍ទៀតថា កន្លងមក គ្រប់ក្រសួង អង្គភាព និងស្ថាប័នពាក់ព័ន្ឋនានា ពិតជាមានឆន្ទៈយ៉ាងមោះមុតក្នុងការផ្សព្វផ្សាយ ដឹកនាំ ចូលរួមគ្រប់សកម្មភាពក្នុងការប្រយុទ្ឋប្រឆាំងជម្ងឺដ៏កាចសាហាវនេះ បានរួមចំណែកជួយដល់រាជរដ្ឋាភិបាល ស្របតាមទស្សនវិស័យរបស់រាជរដ្ឋាភិបាល ក្នុងការកសាងសង្គមជាតិមួយដែលគ្មានការគំរាមកំហែង និង ដើម្បីឈានទៅសម្រេចគោលដៅដែលបានកំណត់ដោយអាជ្ញាធរជាតិ និង អង្គការសហប្រជាជាតិបាយ៉ាងពិតប្រាកដ ដោយកម្ពុជាបានផ្តល់ការព្យាបាលដោយឱសថប្រឆាំងមេរោគអេដស៍ទៅដល់អ្នកផ្ទុកបានរហូតដល់៩៧ភាគរយ បានធ្វើឱ្យអត្រាមរណៈធ្លាក់ចុះជារៀងរាល់ឆ្នាំ ហើយបានរួមគ្នាទប់ស្កាត់ ការពារប្រយុទ្ឋប្រឆាំងគ្រឿងញៀនទទួលបានលទ្ឋផលល្អជារៀងរាល់ថ្ងៃផងដែរ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#គ្រឿងញៀន
#អេដស៍
