ព្រឹកថ្ងៃទី១៩ ខែតុលា ឆ្នាំ២០១៨នេះ សាកលវិទ្យាល័យបៀលប្រាយសាខាខេត្តសៀមរាប បានរៀបចំពិធីអបអរសាទរទិវាការងារ ដែលជាព្រឹត្តិការណ៍វប្បធម៌ នៃការផ្តល់ឱកាសការងារសម្រាប់សិស្ស-និស្សិត ដោយមានការចូលរួម តាំងពិព័រណ៌ការងារ ពីបណ្តាក្រុមហ៊ុន សារជីវកម្មនានាចំនួន២៧ស្ថាប័ន ដែលផ្ដោតលើកម្មវិធីចំនួន៤ គឺទី១. ការធ្វើបទបង្ហាញ ស្តីពីឱកាសការងារនិងអាជីពការងារ , ទី២. ការផ្សព្វផ្សាយសេវាកម្ម ទំនិញនិងក្រុមហ៊ុន , ទី៣. ការបើកឱកាសឲ្យនិស្សិតទទួលបានការដាក់ពាក្យ សម្ភាសន៍ការងារនៅហ្នឹងកន្លែង និងទី៤. ការធ្វើបទបង្ហាញ ណែនាំល្អៗ អំពីតម្រូវការជំនាញក្នុងឧស្សាហកម្មនានា ។
លោក ម៉ឹក គឹមស្រឿន នាយករង សាខាសាកលវិទ្យាល័យ បៀលប្រាយ ខេត្តសៀមរាប បានឲ្យដឹងថា ការប្រារព្ធទិវាការងារ គឺពិតជាមានសារៈសំខាន់ខ្លាំងណាស់ ព្រោះជាទិវា នៃការជួបជុំគ្នារវាងភាគីធនធានមនុស្ស ដែលជាភាគីអ្នកលក់ពលកម្មបញ្ញា ជាមួយភាគីដែលមានតម្រូវការប្រើប្រាស់ធនធានមនុស្ស គឺបណ្តាអង្គភាព ក្រុមហ៊ុន រោងចក្រ សហគ្រាស ជាដើមនោះ ខណៈដែលសាកលវិទ្យាល័យបៀលប្រាយសាខាខេត្តសៀមរាប ធ្លាប់បានធ្វើឡើងជាប្រចាំឆ្នាំ ក្នុងគោលបំណង ចង់បានទិវានេះ ក្លាយជាព្រឹត្តិការណ៍វប្បធម៌ នៃការបង្ហាញផ្លូវ ចំពោះសិស្ស-និស្សិត បានត្រៀមខ្លួន និង ឈោងចាប់ឱកាសការងារ ស្របតាមគោលដៅដែលខ្លួនចង់បាន ។
លោក សៀង សុខុន ប្រធានមជ្ឈមណ្ឌលការងារខេត្តសៀមរាប បានបញ្ជាក់ថា តាមបទពិសោធន៍លើការស្វែងរកការងារធ្វើ កន្លងមកគឺទី១. ជាការស្វែងរកការងារធ្វើដោយចង់បានប្រាក់ខែខ្ពស់ និង ទី២. ជាការស្វែងរកការងារ ដែលមិនខ្វល់អំពីប្រាក់ខែតិចឬច្រើន តែជាការស្វែងរកការងារ ដែលអាចបង្រៀន និងចាប់យកចំណេះរួមទាំងបទពីសោធន៍ ដើម្បីអនាគតក្លាយជាគ្រប់គ្រង ឬ ក៏អាចក្លាយជាម្ចាស់អាជីវកម្ម ប៉ុន្តែទោះជាយ៉ាងណាក៏ដោយ គោលបំណងទាំង២នេះ គឺវាទាមទារ ឲ្យមានការខិតខំប្រឹងប្រែង អភិវឌ្ឍន៍ចំណេះជំនាញរបស់ខ្លួន ដើម្បីគោលដៅជោគជ័យមួយដែលខ្លួនចង់បាន ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទិវាការងារ
