នៅថ្ងៃទី១៥ ខែតុលា ឆ្នាំ២០១៩ អង្គការ អមរា បានសហការ និងគាំទ្រពីអាជ្ញាធរឃុំត្បែង រៀបចំ វេទិកាទិវាស្ត្រីជនបទ១៥ តុលាជាលើកដំបូង នៅក្នុងឃុំត្បែង ស្រុកបន្ទាយស្រី ខេត្តសៀមរាប ដែលមានអ្នកចូលរួមជាស្ត្រីចំនួន ៥០រូប។
គោលបំណងនេះ វេទិកានេះ ដើម្បីរម្លឹកដល់ការចងចាំជាប្រវត្តិសាស្ត្រ ដែលមានសំឡេងរបស់ស្ត្រីជនបទ ចូលរួមលើកកម្ពស់ និងគាំទ្រ លើគ្រប់វិស័យ និងបង្ហាញពីការជំរុញឱ្យស្ត្រីនៅតាមជនបទ។ ពិសេសការងារកសិកម្ម បានចូលរួមក្នុងភាពជាអ្នកដឹកនាំ និងធ្វើឱ្យមានភាពប្រសើរឡើងលើជីវភាព សន្តិសុខស្បៀងរបស់ស្ត្រីក្នុងជីវិតរស់នៅប្រចាំថ្ងៃ។
ក្នុងវេទិកានេះ បានលើកយកសារគន្លឺះមួយចំនួនក្នុងន័យជួយពញ្ញាក់ ដល់ស្ត្រីនៅតាមជនបទ ឱ្យយល់ច្បាស់ពីសិទ្ឋ តម្លៃការងារ ដូចជាឃ្លាថា “ចូរស្តាប់យោបល់របស់ស្ត្រីជនបទ” “យើងខ្លាំងនៅពេលយើងធ្វើការរួមគ្នា” “សូមរាប់បញ្ចូលស្ត្រីជនបទផង” “ស្ត្រីជនបទជាអ្នកចិញ្ចឹមប្រជាជាតិនេះ” “សូមស្តាប់ពួកយើងឥឡូវនេះ” ជាដើម។ល។
លោកស្រី នូ សារឹម គ្រូបណ្តុះបណ្តាលកម្មវិធី នៃអង្គការអមរា មានប្រសាសន៍ថា៖ អង្គការអមរា ទើបរៀបចំវេទិកាទិវាស្ត្រីជនបទជាលើកដំបូង ខណៈដែលអង្គការមួយចំនួន បានធ្វើរួចអាស្រ័យទៅតាមកម្មវិធីគម្រោង ទាក់ទងទៅនឹងស្ត្រីនៅតាមជនបទ ស្ត្រីនិងវិស័យកសិកម្ម ទាក់ទងទៅនឹងស្ត្រីនិងស្បៀងអាហារ ជាដើម។ល។
សម្រាប់ខេត្តសៀមរាប អង្គការអមរា នឹងរៀបចំកម្មវិធីនេះជារៀងរាល់ឆ្នាំ។ ដោយ ទិវាស្ត្រីជនបទ ១៥ តុលា នេះ គឺផ្សារភ្ជាប់ ទៅនឹងប្រធានបទ ទិវាបំពេញបន្ថែមទៅលើកិច្ចប្រជុំនៅទីក្រុងប៉េកាំង ប្រទេសចិន និងភ្ជាប់ជាមួយវេទិកាស្បៀងអាហារពិភពលោក ដែលវេទិកានេះចាប់ផ្តើមនៅឆ្នាំ១៩៩៥។
លោក ឆើយ ឆប សមាជិកក្រុមប្រឹក្សា ឃុំត្បែង ស្រុកបន្ទាយស្រី ខេត្តសៀមរាប បានថ្លែងគាំទ្រចំពោះកម្មវិធីនេះ ថាពិតជាមានសារៈសំខាន់ណាស់ ក្នុងការជួយដល់ស្ត្រីនៅជនបទ ឱ្យបានជ្រួតជ្រាបកាន់តែច្បាស់អំពី សមភាពរវាងស្ត្រីនិងបុរសទាំងក្នុងការងារគ្រួសារ ក៏ដូចជាការងារក្នុងសង្គម ពោលគឺស្ត្រី និងបុរសមានសិទ្ឋដូចគ្នា និងឈានទៅកាត់បន្ថយជាបណ្តើរៗ នូវវិសមភាព រវាងបុរស និងស្ត្រី នៅទីជនបទ ក្នុងគ្រប់ការងារ និងគ្រប់ស្ថានភាព។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
