នៅរសៀលថ្ងៃទី១៨ ខែតុលា ឆ្នាំ២០១៩ នេះ ប្រតិភូអ្នកកាសែតវៀតណាម បានអញ្ជើញមកធ្វើទស្សនកិច្ចនៅមន្ទីរព័ត៌មានខេត្តសៀមរាប ដើម្បីសិក្សាស្វែងយល់អំពីការគ្រប់គ្រងលើវិស័យព័ត៌មានថ្នាក់ក្រោមជាតិ នៅក្នុងយុគសម័យឧស្សាហកម្ម៤.០ ជាពិសេសការគ្រប់គ្រងលើព័ត៌មានក្លែងក្លាយលើបណ្ដាញសង្គម។
ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បានលើកឡើងថា មន្ទីរព័ត៌មានខេត្តសៀមរាប ជាសេនាធិការរបស់ក្រសួងព័ត៌មាន រាល់លិខិតផ្លូវការ និងសារាចរណ៍ណែនាំ ដែលដាក់ចេញ មន្ទីរព័ត៌មានខេត្ត បានធ្វើការផ្សព្វផ្សាយយ៉ាងទូលំទូលាយ និងទាន់ពេលវេលា តាមរយៈប្រព័ន្ធផ្សព្វផ្សាយនានា ដើម្បីឲ្យអង្គភាពសារព័ត៌មាន និងប្រព័ន្ធផ្សព្វផ្សាយក្នុងខេត្តទាំងអស់ បានដឹងនិងអនុវត្តន៍។
ពាក់ព័ន្ធនឹងការផ្សព្វផ្សាយព័ត៌មានក្លែងក្លាយ ឯកឧត្តម លីវ សុខុន បានបញ្ជាក់ថា មន្ទីរព័ត៌មានរាជធានី-ខេត្តទូទាំងប្រទេស មានការលំបាក ក្នុងការគ្រប់គ្រង ដោយសារ ក្រសួងព័ត៌មាន មិនធ្វើការត្រួតពិនិត្យលើអត្ថបទមុនការចេញផ្សាយឡើយ ដែលនេះជាផ្ដល់សិទ្ធសេរីភាពរបស់សារព័ត៌មានឯកជន។
ឯកឧត្តម បានបន្ថែមថា ទោះបីជាយើងមិនអាចគ្រប់គ្រងការចេញផ្សាយព័ត៌មានក្លែងក្លាយបាន ជាអនុសាសន៍របស់ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានណែនាំដល់មន្ទីរព័ត៌មានរាជធានី-ខេត្តទាំងអស់ ត្រូវសហការជាមួយអាជ្ញាធរក្នុងមូលដ្ឋានរបស់ខ្លួន ដើម្បីប្រមូលព័ត៌មានពិតគ្រប់ជ្រុងជ្រោយ មកផ្សព្វផ្សាយ ដើម្បីបន្សាបព័ត៌មានក្លែងក្លាយនោះ ឲ្យបានទាន់ពេលវេលា។ ជាមួយនោះ ចំពោះព័ត៌មានក្លែងក្លាយ ដែលបានធ្វើឲ្យប៉ះពាល់ដល់បុគ្គលដទៃ អ្នកដែលផលិត និងផ្សព្វផ្សាយព័ត៌មាននោះ នឹងត្រូវប្រឈមមុខចំពោះមុខច្បាប់រដ្ឋប្បវេណី និងច្បាប់ព្រហ្មទណ្ឌ ដែលមានក្រសួងមហាផ្ទៃជាអ្នកអនុវត្តន៍ច្បាប់។
បន្ទាប់ពីបានពិភាក្សា ទៅលើបទពិសោធន៍លើការគ្រប់គ្រងវិស័យព័ត៌មាន នៅក្នុងខេត្តសៀមរាបរួច លោក សាង ខាក លូ (Dang Khac Lou) អគ្គនាយករង នៃអគ្គនាយកដ្ឋានសារព័ត៌មាន ក្រសួងព័ត៌មានវៀតណាម ទទួលស្គាល់ថា នៅកម្ពុជាការគ្រប់គ្រងព័ត៌មានក្លែងក្លាយមានការលំបាកជាងប្រទេសរបស់លោក។ ដោយលោកបានបញ្ជាក់ថា គ្រប់សារព័ត៌មាន និងប្រព័ន្ធផ្សព្វផ្សាយនានា នៅវៀតណាម គឺជាអង្គភាពរបស់រដ្ឋ។ ជាពិសេស នៅប្រទេសវៀតណាម មានតំណាងរបស់ក្រុមហ៊ុនហ្វេសប៊ុក ដើម្បីចូលរួមដោះស្រាយក្នុងបង្ហោះព័ត៌មានក្លែងក្លាយ។
ប៉ុន្តែលោក សាង ខាក លូ បានបញ្ជាក់ថា នៅប្រទេសវៀតណាម ការបង្កើត និងផ្សព្វផ្សាយព័ត៌មានក្លែងក្លាយ នៅលើប្រព័ន្ធអ៊ិនធើណិត នៅតែជាកង្វល់របស់រដ្ឋាភិបាលនៅឡើយ។
សូមជម្រាបថា ដំណើរទស្សនកិច្ចរបស់ប្រតិភូ នៃក្រសួងព័ត៌មានវៀតណាម មកកាន់កម្ពុជា ចាប់ពីថ្ងៃទី១៦ ដល់ទី២០ ខែតុលា ឆ្នាំ២០១៩ ក្នុងនោះ ក្រុមប្រតិភូនៃក្រសួងព័ត៌មានវៀតណាម ដែលមានការសម្របសម្រួលដោយក្រសួងព័ត៌មាន កម្ពុជា នឹងមកទស្សនកិច្ចរយៈពេល៣ថ្ងៃ នៅខេត្តសៀមរាប។
