ថ្លែងក្នុងពិធីប្រគល់សញ្ញាបត្រថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ជូនដល់និស្សិតជិត២ពាន់នាក់ នៅសាកលវិទ្យាល័យសៅស៍អ៊ីសថ៍អេយសៀ(ខេត្តសៀមរាប) នាព្រឹកថ្ងៃទី១៨ ខែតុលា ឆ្នាំ២០១៩នេះ ឯកឧត្តម ទៀ សីហា អភិវបាលខេត្តសៀមរាប មានប្រសាសន៍ថា ៖ រាជរដ្ឋាភិបាលបានចាត់ទុកការអប់រំឧត្តមសិក្សា ជាអនុវិស័យមួយដ៏មានសារសំខាន់ ក្នុងការអភិវឌ្ឍមូលធនមនុស្ស ដើម្បីនាំកម្ពុជាឆ្ពោះទៅកាន់ប្រទេស ដែលមានចំណូលបធ្យមកម្រឹតខ្ពស់ និងជាប្រទេសអភិវឌ្ឍនាថ្ងៃអនាគត។ក្រសួងអប់រំ យុវជន និងកីឡា បានដាក់ចេញគោលនយោបាយ និងផែនការយុទ្ធសាស្ត្រដើម្បីធ្វើកំណែទម្រង់ស៊ីជម្រៅលើវិស័យអប់រំនៅគ្រប់ភូមិសិក្សា និងបណ្តុះបណ្តាលនៅគ្រប់កម្រឹតទាំងនៅគ្រឹះស្ថានសិក្សាសាធារណៈនិងឯកជន ដើម្បីផ្តល់ចំណេះដឹង បំណិន ជំនាញ និងឥរិយាបថដល់សិស្ស និងនិស្សិត ឲ្យឆ្លើយតបទៅនឹងបរិបទអប់រំអាស៊ាន និងអន្តរជាតិ ដែលធានាឲ្យពួកគេអាចធ្វើការងារ និងរស់ក្នុងយុគ្គសម័យសាកលភាវូបនីយកម្ម និង សង្គមពុទ្ធិ ។
ឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា លើកបង្ហាញថា ៖ កម្ពុជាមានការអភិវឌ្ឍរីកចម្រើនខ្លាំងលើវិស័យអប់រំ បន្ទាប់ពីបានអនុវត្តកំណែទម្រង់នៅរយៈពេលប៉ុន្មានឆ្នាំចុងក្រោយនេះ ហើយក្នុងជំហាននៃការអភិវឌ្ឍនេះ បានធ្វើឱ្យអន្តរជាតិមានការទទួលស្គាល់ពីគុណភាពនៃការអប់រំនៅកម្ពុជា ។
ឯកឧត្តមរំលឹកថា ៖ កាលពីមុន និស្សិតខ្មែរដែលចេញទៅបន្តការសិក្សានៅបរទេស ពិតជាមានបញ្ហាប្រឈមខ្លាំង ដោយការមិនទទួលស្គាល់សញ្ញាបត្រដែលមិនមានគុណតម្លៃរបស់កម្ពុជា និស្សិតទាំងនោះត្រូវបានគេតម្រូវ ឲ្យរៀនឡើងវិញផងដែរ។ ប៉ុន្តែសម្រាប់បច្ចុប្បន្ននេះ និស្សិតកម្ពុជាដែលបានទៅបន្តការសិក្សានៅបរទេស មិនមានជួបបញ្ហាប្រឈមដូចមុនទៀតឡើយ និស្សិតកម្ពុជាអាចបន្តការសិក្សានៅក្រៅប្រទេសបានដោយរលូន ដោយសារតែគុណភាពអប់រំរបស់កម្ពូជាត្រូវបានពង្រឹង ឆ្លើយតបបានទាំងស្តង់ដារជាតិ និងអន្តរជាតិ ។
សាកលវិទ្យាធិការនៃសាកលវិទ្យាល័យសៅស៍អ៊ីសថ៍អេយសៀ លោក សៀន សុវណ្ណា បានលើកបង្ហាញអំពីការឆ្លើយតបជូនចំពោះរាជរដ្ឋាភិបាល ដែលបានដាក់ចេញនូវគោលនយោបាល និងការលើកទឹកចិត្តសម្រាប់វិស័យឯកជន វិនិយោគលើវិស័យអប់រំបណ្តុះបណ្តាលធនធានមនុស្សប្រកបដោយគុណភាពនៅកម្ពុជា ចាប់ពីកម្រិតមតេយ្យសិក្សាដល់កម្រឹតថ្នាក់ឧត្តមសិក្សា ដើម្បីរួមចំណែកអភិវឌ្ឍប្រទេសជាតិ ។ លោកបញ្ជាក់ថា ៖ សាកលវិទ្យាល័យបានកំណត់ចក្ខុវិស័យ និងបេសកកម្មរបស់ខ្លួនយ៉ាងច្បាស់លាស់ ដើម្បីអភិវឌ្ឍធនធានមនុស្សប្រកបដោយសមត្ថភាព និងមានឥរិយាបថល្អ ឆ្លើយតបទៅនឹងតម្រូវការទីផ្សារការងារជាតិនិងអន្តរជាតិ ។
អត្ថបទ និងរូបភាព៖ ងិន គឹមឡេង
