ក្រុមហ៊ុនធានារ៉ាប់រងអាយុជីវិត AIA ខេមបូឌា បានបើកសម្ពោធដាក់ឲ្យដំណើរការជាផ្លូវការនូវសាខាប្រចាំខេត្តសៀមរាប ក្រោមប្រធានបទ សុខភាព និងជីវិតកាន់តែប្រសើរ លើទឹកដីអច្ឆរិយ នាព្រឹកថ្ងៃទី១៩ ខែតុលា ឆ្នាំ២០១៩នេះ ក្រោមអធិបតីលោក អ៊ិន មាត្រា ប្រធាននាយកដ្ឋានធានារ៉ាប់រង និងសោធន និងជាតំណាងដ៏ខ្ពង់ខ្ពស់របស់លោកជំទាវ ងួន សុខា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ , លោក Ng Keng Hooi នាយកប្រតិបត្តិ និងប្រធាននៃសម្ព័ន្ធ AIA និង លោក Tan Hak Leh ដែលជានាយកប្រតិបត្តិប្រចាំតំបន់ ដោយមានការចូលរួមពីសំណាក់ ភ្ញៀវជាតិ អន្តរជាតិ តំណាងមកពីដៃគូអាជីវកម្មរបស់ AIA ខេមបូឌា ធនាគារកម្ពុជាសាធារណៈ និងគ្រឹះស្ថានមីក្រូហិរញ្ញវត្ថុអម្រឹត ។
មានប្រសាសន៍ក្នុងឱកាសនោះ លោក អ៊ិន មាត្រា ប្រធាននាយកដ្ឋានធានារ៉ាប់រង និងសោធន នៃក្រសួងសេដ្ឋកិច្ច និងហិរញ្ញវត្ថុ បានឆ្លុះបញ្ចាំងអំពីតថភាពជាក់ស្តែងនៃកំណើតអភិវឌ្ឍន៍យ៉ាងខ្លាំងក្លារបស់កម្ពុជាទាំងមូល និងភាពប្រសើរឡើងស្របគ្នា នៃជីវភាពក្នុងការរស់នៅរបស់ប្រជាពលរដ្ឋខ្មែរ ក្រោមគោលនយោ បាយ និងការដឹកនាំរបស់រាជរដ្ឋាភិបាលកម្ពុជា ដែលមានសម្តេច តេជោ ហ៊ុន សែន ជាប្រមុខ ជាពិសេសការអភិវឌ្ឍយ៉ាងលឿនរបស់ក្រុមហ៊ុនធានារ៉ាប់រងអាយុជីវិត AIA ខេមបូឌា ដែលជាក្រុមហ៊ុនធានារ៉ាប់រងអាយុជីវិតនៅកម្ពុជា ស្របពេលនឹងទីផ្សារធានារ៉ាប់រងនៅកម្ពុជា កំពុងមានការកើនឡើងយ៉ាងឆាប់រហ័ស ។
លោក អ៊ិន មាត្រា មានប្រសាសន៍ទៀតថា យើងសង្កេតឃើញថា ចាប់តាំងពីឆ្នាំ ២០១៨ មកបុព្វលាភធានារ៉ាប់រងអាយុជីវិត មានការកើនឡើងយ៉ាងសម្បើម ដែលកំណើននេះ បានបង្ហាញពីការចាប់ផ្តើមយល់ដឹង និងតម្រូវការរបស់ប្រជាពលរដ្ឋ អំពីសារៈប្រយោជន៍នៃការធានារ៉ាប់រងជីវិត ព្រោះដោយសារតែការធានារ៉ាប់រងជីវិត គឺជាវិស័យមួយថ្មីសម្រាប់ប្រទេសកម្ពុជា បងប្អូនប្រជាពលរដ្ឋយើងមួយចំនួនមិនទាន់បានជ្រាបនៅឡើយ។
លោក Ng Keng Hooi នាយកប្រតិបត្តិ និងប្រធាននៃសម្ព័ន្ធ AIA បានមានប្រសាសន៍ថា ថ្ងៃនេះ គឺជាដំណើរឆ្ពោះទៅមុខយ៉ាងសំខាន់មួយ នៃភាពរីកចម្រើន និងភាពជោគជ័យរបស់ AIA នៅកម្ពុជា និងជាមួយគ្នានេះ យើងក៏កំពុងតែជួយរាជរដ្ឋាភិបាលកម្ពុជា ក្នុងការជំរុញរបៀបវារៈនៃការអភិវឌ្ឍសង្គម សេដ្ឋកិច្ចជាតិ ឲ្យបានកាន់តែខ្លាំងថែមទៀត ហើយការបើកសាខាខេត្តសៀមរាបរបស់យើង គឺជាព្រឹត្តិការណ៍ដ៏មានអត្ថន័យមួយទៀតនៅក្នុងបេសកកម្មរបស់យើង ដើម្បីជួយប្រជាជនកម្ពុជាទាំងអស់ ឲ្យមានសុខភាព និងជីវិតកាន់តែប្រសើរ ខណៈសាខាថ្មីនេះ នឹងជួយឲ្យយើងផ្តល់ការការពារឈានមុខគេលើទីផ្សារ ដោយផ្តោតលើសុខភាពនិងសុខុមាលភាពរបស់ប្រជាជនកាន់តែច្រើន និងបង្កើតការងារថ្មីៗជាច្រើននៅក្នុងខេត្តសៀមរាប និងតំបន់ជុំវិញ ហើយយើងជឿជាក់ថា ការឈានជើងចូលខេត្តសៀមរាបរបស់យើង នឹងប្រែក្លាយទៅជាឥទ្ធិពលវិជ្ជមានជាច្រើន សម្រាប់ប្រជាជនលើដែនដីអច្ឆរិយនេះ ។
សូមបញ្ជាក់ថា សម្ព័ន្ធ AIA មានវត្តមាននៅក្នុងទីផ្សារចំនួន១៨នៅអាស៊ីប៉ាស៊ីហ្វិក ដែលក្នុងនោះមានសាខា និងបុត្រសម្ព័ន្ធដែលជាកម្មសិទ្ធិទាំងស្រុង នៅហុងកុង ថៃ សិង្ហបុរី ម៉ាឡេស៊ី ចិន កូរ៉េ ហ្វីលីពីន អូស្ត្រាលី ឥណ្ឌូនេស៊ី តៃវ៉ាន់ វៀតណាម ណូវែលហ្សេឡង់ ម៉ាកាវ ប្រ៊ុយណេ កម្ពុជា ព្រមទាំងបុត្រសម្ព័ន្ធដែលជាកម្មសិទ្ធិ ៩៧ភាគរយនៅសិរីលង្កា និងការវិនិយោគរួមគ្នា៤៩ភាគរយនៅឥណ្ឌា៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
