កាលពីព្រឹកថ្ងៃទី១៩ ខែតុលា ឆ្នាំ២០១៩ នេះ សិស្សពូកែចំនួន ១៥០ នាក់ សម្រាប់ឆ្នាំសិក្សា ២០១៨-២០១៩ ក្នុងចំណោមសិស្សសរុបជាង៥០០នាក់ មានសិស្សភាសាអង់គ្លេសជាង៤០០នាក់ និងសិស្សភាសាខ្មែរជិត១០០នាក់ បានទទួលប័ណ្ណសរសើរ នៃពីសាលាអន្តរជាតិ អេ.អេល.អេ ដែលជាសាលារបស់ខ្លួនកំពុងសិក្សា ។
លោក នង វុត្ថា នាយកស្ថាបនិក សាលាអន្តរជាតិ អេ.អេល.អេ បានមានប្រសាសន៍ថា កុមារគ្រប់រូបត្រូវទទួលបានការអប់រំ ដោយការយកចិត្តទុកដាក់បំផុត ហើយក៏ត្រូវទទួលបាននូវការគាំពារខ្ពស់ ក្នុងនោះ មូលដ្ឋានគ្រឹះនៃការអប់រំកុមារតូចនិងបឋមសិក្សា ចាំបាច់បំផុត គឺសាលាត្រូវតែមានធនធានមនុស្ស គឺគ្រូបង្រៀនដែលមានជំនាញនិងឆន្ទៈ ហើយនវានុវត្តន៌ និងការផ្លាស់ប្តូរថ្មី ដើម្បីធ្វើបច្ចុប្បន្នភាព លើការរៀនសូត្ររបស់សិស្សានុសិស្ស និងការបង្រៀនរបស់គ្រូ តាមបែបថ្មីដែលធានាបាននូវគុណភាព ប្រសិទ្ធិភាព និងប្រសិទ្ធិផលខ្ពស់ លើកម្មវិធីអប់រំកុមារតូចនិងបឋមសិក្សា គឺជាមូលដ្ឋានគ្រឹះនិងរឺងមាំ សម្រាប់កិច្ចដំណើរការអប់រំ ស្របតាមគោលនយោបាយនិងក្របខណ្ឌគតិយុត្តិ របស់ក្រសួងអប់រំ យុវជននិងកីឡា ។
លោក នង វុត្ថា មានប្រសាសន៍បន្ថែមថា មូលដ្ឋានគ្រឹះនៃការអប់រំកុមារតូច និងបឋមសិក្សា ចាំបាច់បំផុត សាលាត្រូវមានធនធានមនុស្ស សម្រាប់អភិវឌ្ឍន៍កម្មវិធីឲ្យបានល្អប្រសើរ ជាមួយនឹងការសិក្សាស្វែងយល់ផងដែរ អំពីវិធីសាស្ត្រថ្មីៗ ដើម្បីជួយដល់ការសិក្សារបស់សិស្ស ស្របតាមការអប់រំជំនាន់ថ្មី និងកម្មវិធីសិក្សាក្នុងសតវត្សន៌ទី២១ នេះ ដូច្នេះតាមរយៈនេះ សូមសំណូមពរដល់តាបិតា អាណាព្យាបាលសិស្ស សូមចែករំលែកនូវសេចក្តីស្រឡាញ់ចំពោះកូនៗ ចំពោះសាលាឲ្យបានច្រើន ព្រោះថាគ្រូបបង្រៀននៅសាលា អេ.អេល.អេ គឺជាគរុគ្រូ ស្ម័គ្រចិត្តចូលរួមអភិវឌ្ឍសាលាប្រកបដោយគុណភាព បង្ហាត់បង្រៀនសិស្សតាមនិយាមគរុកោសល្យ និងឆន្ទៈលះបង់ខ្ពស់ដើម្បីប្រយោជន៌ដល់សិស្សក្រីក្រី ដែលពុំមានលទ្ធភាពទៅរៀននៅសាលាដែលមានតម្លៃខ្ពស់នោះទេ ហើយសិស្សានុសិស្សទាំងអស់ ត្រូវបន្តប្រឹងប្រែងរៀនសូត្រ ដើម្បីក្លាយខ្លួនជាកូនល្អ ពលរដ្ឋល្អ និងទៅថ្ងៃអនាគត បានក្លាយជាធនធានមនុស្សប្រកបដោយគុណភាព និងសីលធម៌ខ្ពស់ ចូលរួមអភិវឌ្ឍន៌ប្រទេសជាតិ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
