ជនសង្ស័យចំនួន ១១នាក់ ត្រូវសមត្ថកិច្ចឃាត់ខ្លួនជាបន្តបន្ទាប់ ពាក់ព័ន្ធនឹងករណីគាស់តូបលក់ទូរស័ព្ទមួយកន្លែងស្ថិតនៅចំណុចផ្សាររលួស ក្នុងភូមិដូនទាវ ឃុំរលួស ស្រុកប្រាសាទបាគង ខេត្តសៀមរាប កាលពីថ្ងៃទី ១៩ ខែតុលាឆ្នាំ២០១៩។
តាមការឲ្យដឹងពី លោកវរសេនីយ៍ឯក មិន ចន្ថា អធិការនគរបាលស្រុកប្រាសាទបាគង បានបញ្ជាក់ថា ក្រុមជនសង្ស័យមានគ្នា១១នាក់ អាយុចាប់ពី ១៤ឆ្នាំ ដល់ ១៧ឆ្នាំ បានធ្វើសកម្មគាស់តូបលក់ទូរសព្ទ កាលពីថ្ងៃទី ១៧ ខែតុលា ឆ្នាំ២០១៩ និងលួចយកបានដូចជា៖ ទូរសព្ទ SAMSUNG ០៥គ្រឿង ទូរសព្ទ OPPO ០៥គ្រឿងទូរសព្ទ HUAWEI ០៥គ្រឿង ទូរសព្ទ NOKIA (ចុចពិល) ៥០គ្រឿង POWER BANK 0៥គ្រឿង កាសប្លូធូ ១០ខ្សែ។
លោកវរសេនីយ៍ឯក មិន ចន្ថា បានបន្តថា តាមរយៈកាមេរ៉ាសុវត្ថិភាពរបស់ម្ចាស់់តូប សមត្ថកិច្ចបានកំណត់មុខសញ្ញា និងតាមស្វែងរកឃាត់ខ្លួនជនសង្ស័យទាំង១១នាក់ បានជាបន្តបន្ទាប់។
ក្រោយធ្វើការឃាត់ខ្លួនជនសង្ស័យទាំង ១១នាក់ ពួកគេបានសារភាពថា ពិតជាបានធ្វើសកម្មភាពគាស់តូប និងលួចទូរសព្ទ ព្រមទាំងឧបករណ៍ដទៃទាំងនោះពិតប្រាកដមែន ។
បច្ចុប្បន្ន សមត្ថកិច្ចកំពុងកសាងសំណុំរឿងបញ្ជូនជនសង្ស័យ ទៅសាលាដំបូងខេត្តសៀមរាប ដើម្បីអនុវត្តតាមនីតិវិធីបន្ត៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក សេង ផល្លី
