សាកលវិទ្យាល័យបៀលប្រាយសាខាខេត្តសៀមរាប សហការជាមួយផ្នែកឯកជន សហគ្រាស និងស្ថាប័នពាក់ព័ន្ឋនានាជុំវិញខេត្ត និងមួយចំនួនមកពីរាជធានីភ្នំពេញ សរុបចំនួន៣៣ក្រុមហ៊ុន សហគ្រាស បានរៀបចំការតាំងបង្ហាញពិព័រណ៍ការងារ ក្នុងរយៈពេលពេញមួយថ្ងៃទី១៨ ខែតុលា ឆ្នាំ២០១៩ នៅបរិវេណសាកលវិទ្យាល័យ ដើម្បីផ្តល់ឱ្យនិស្សិតបានស្វែងយល់ពីឱកាសការងារ និង ការដាក់ពាក្យធ្វើការងារ ទៅតាមតារាងពេលវេលាប្រចាំដែលអាចធ្វើបានក្រៅពីម៉ោងសិក្សា ។
លោកបណ្ឌិត ម៉ឹក គឹមស្រ៊ឿន នាយកសាកលវិទ្យាល័យបៀប្រាយសាខាខេត្តសៀមរាប មានប្រសាសន៍ថា នេះជាឆ្នាំទី៥ហើយ ដែលសាកលវិទ្យាល័យបានរៀបចំកម្មវិធីនេះឡើង ដើម្បីឱ្យស្ថាប័ន និងក្រុមហ៊ុននានា ផ្សព្វផ្សាយពីផលិតផល សេវាកម្មរបស់ខ្លួន និងផ្តល់ឱកាសដល់និស្សិតដែលកំពុងសិក្សាមានឱកាសសាកសួរព័ត៌មានស្តីពីការងារផ្ទាល់ជាមួយក្រុមហ៊ុន សហគ្រាសនានា និងបានស្វែងយល់ពីតម្រូវការងារនាពេលបច្ចប្បន្នផងដែរ ព្រោះថា កម្មវិធីនេះថាពិតជាផ្តល់នូវអត្ថប្រយោជន៍ និងភាពងាយស្រួលដល់និស្សិត ក្នុងការដាក់ពាក្យ និងស្វែងយល់ពីលក្ខខណ្ឌការងារផ្សេងៗដែលស្ថាប័ននីមួយៗត្រូវការ និងជួយកាត់បន្ថយនូវភាពស្មុគ្រស្មាញ និងក្តីបារម្ភពីបញ្ហារៀនហើយខ្លាចអត់ការងារធ្វើជាដើម និង ផ្តល់អត្ថប្រយោជន៍ដល់ក្រុមហ៊ុន សហគ្រាសនានាបានពិនិត្យវាយតម្លៃផ្ទាល់ជាមួយនិស្សិតដោយមានភាពងាយស្រួលជាងការប្រកាសផ្សព្វផ្សាយជូនដំណឹងស្វែងរកបុគ្គលិកធ្វើការ ដែលពេលខ្លះពុំទទួលបានប្រសិទ្ឋភាពឡើយ ។
លោក ម៉ឹក គឹមស្រ៊ឿន មានប្រសាសន៍បន្ថែមថា និស្សិតដែលរៀននៅសាកលវិទ្យាល័យបៀលប្រាយ ពួកគាត់សិក្សាធម្មតានៅឆ្នាំទី១និងទី២ ប៉ុន្តែចាប់ពីចុងឆ្នាំទី២ទៅ ពួកគាត់ខ្លះបានស្វែងរកការងារធ្វើ ដោយការជ្រើសរើស និងបែងចែកដាច់ស្រឡះរវាងម៉ោងការងារ និងម៉ោងសិក្សា ទៅតាមប្រក្រតីទិនរបស់សាលា ពោលគឺមិនមានប៉ះពាល់ម៉ោងសិក្សានិងការងាររបស់គាត់ទេ គាត់អាចសិក្សាផងនិងធ្វើការងារផង ខណៈដែលនិស្សិតកំពុងសិក្សានៅសាកលវិទ្យាល័យនេះ ប្រមាណជា៩០ភាគរយ ទទួលបានការងារធ្វើចាប់ពីឆ្នាំទី២ទៅ ហើយក្រុមហ៊ុនសហគ្រាសផ្សេងៗ ទទួលនិស្សិតស្វែងរកឱកាសការងារបានប្រហែលជា៦០ទៅ៧០ភាគរយក្នុងការរៀបចំពិព័រណ៍ការងារមួយលើកៗ ។
នៅក្នុងបទបង្ហាញ ស្តីពីឱកាសការងារ និង អាជីពការងារ លោក សៀង សុខុន ប្រធានមជ្ឈមណ្ឌលការងារខេត្តសៀមរាប បានឆ្លុះបញ្ចាំងអំពីបទពិសោធន៍ លើការស្វែងរកការងារធ្វើ ដែលក្នុងនោះ ទី១. គឺការស្វែងរកការងារធ្វើដោយចង់បានប្រាក់ខែខ្ពស់ និង ទី២. គឺការស្វែងរកការងារ ដែលមិនខ្វល់អំពីប្រាក់ខែតិចឬច្រើន តែជាការស្វែងរកការងារ ដែលអាចបង្រៀន និងចាប់យកចំណេះរួមទាំងបទពីសោធន៍ ដើម្បីអនាគតក្លាយជាគ្រប់គ្រង ឬ ក៏អាចក្លាយជាម្ចាស់អាជីវកម្ម ប៉ុន្តែបើទោះជាយ៉ាងណាក៏ដោយ គោលបំណងទាំង២នេះ គឺវាទាមទារ ឲ្យមានការខិតខំប្រឹងប្រែង អភិវឌ្ឍចំណេះជំនាញរបស់ខ្លួន ដើម្បីគោលដៅជោគជ័យមួយដែលខ្លួនចង់បាន ។
អ្នកស្រី កេត ស៊ីណាន នាយិកាផ្នែកសិក្សា នៃសាលាអន្តរជាតិស្មាតឃីតសាខាសៀមរាប មានប្រសាសន៍ថា នេះជាលើកដំបូងដែលសាលាចូលរួមក្នុងការតាំងពិព័រណ៍ការងារនៅទីនេះ ដើម្បីជ្រើសរើសគ្រូជំនួយសម្រាប់ជួយដល់គ្រូបង្គោល សម្រាប់ភាសាអង់គ្លេស និងគ្រូជំនួយផ្នែកភាសាខ្មែរ ពីកម្រិតបឋមដល់ថ្នាក់ទី១២ និងផ្នែកផ្សេងៗជាច្រើនទៀត ហើយសាលាក៏មិនកំណត់ឬទាមទាររកឯកសារពីនិស្សិត នូវការបញ្ជាក់ទទួលស្គាល់ពីក្រសួង ឬពីមន្ទីរអប់រំយុវជននិងកីឡាខេត្តនោះទេ និងមិនតម្រូវមាន ឬគ្មានបទពិសោធន៍ការងារអ្វីនោះដែរ ដោយសាលាមានកម្មវិធីបណ្តុះបណ្តាលបន្ថែម និងណែនាំគាត់អំពីរបៀបរបបធ្វើការងារ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
