ក្នុងឱកាសចុះត្រួតពិនិត្យគុណភាពចំណីអាហារវេចខ្ចប់រួច និងគ្រឿងកំប៉ុង នៅតាមហាងលក់ទំនិញក្នុងក្រុងសៀមរាប កាលពីព្រឹកថ្ងៃទី១៨ខែតុលាឆ្នាំ២០១៨នេះ មន្ត្រីសាខាកាំកុងត្រូលខេត្តសៀមរាប ដែលបានសហការជាមួយមន្ត្រី នៃមន្ទីរពាណិជ្ជកម្មខេត្តសៀមរាប បានរកឃើញទំនិញហួសកាលកំណត់ប្រើប្រាស់មួយចំនួនតូច មានដូចជាភេសជ្ជៈកំប៉ុងចម្រុះចំនួន១៦កំប៉ុង , កាហ្វេចំនួន៦កញ្ចប់ , មីកំប៉ុងចំនួន៣កំប៉ុង និងសាច់ជ្រូកងៀតចំនួន២កញ្ចប់ ហើយទំនិញហួសកាលកំណត់ប្រើប្រាស់ទាំងនេះ ត្រូវបានដកហូតទៅរក្សាទុក ដើម្បីកម្ទេចចោលនៅពេលក្រោយ ។
លោក ព្រៅ ខេមរិន្ទ ប្រធានសាខាកាំកុងត្រូលខេត្តសៀមរាប បានឲ្យដឹងថា កន្លងមកមន្ត្រីជំនាញរបស់លោក តែងតែបានចុះទៅត្រួតពិនិត្យរកសារធាតុគីមីដែលត្រូវហាមឃាត់ ដាក់នៅក្នុងបន្លែ , សាច់ , ចំណីអាហារផ្សេងៗ និងគ្រឿងកំប៉ុងឬដបគ្រប់ប្រភេទ នៅតាមបណ្តាផ្សារនានានៅទូទាំងខេត្តជាច្រើនលើកច្រើនសារមកហើយ ក្នុងគោលបំណងធានាបាននូវសុវត្ថិភាព និងគុណភាពចំណីអាហារសម្រាប់ជូនប្រជាពលរដ្ឋជាអ្នកបរិភោគ ព្រោះថា ខេត្តសៀមរាប គឺជាតំបន់ប្រមូលផ្តុំអ្នកទេសចរ ហើយចំណីអាហារជាច្រើនត្រូវបានផ្គត់ផ្គង់សម្រាប់អ្នកទេសចរ ដូច្នេះការធានាឱ្យបាននូវសុវត្ថិភាពនិងគុណភាពអាហារ ជាកត្តាមួយដ៏សំខាន់ ប្រសិនបើមានប្រជាពលរដ្ឋ ឬអ្នកទេសចរ មានបញ្ហសុខភាពដោយសារចំណីអាហារនោះ នឹងធ្វើឱ្យប៉ះពាល់ដល់វិស័យទេសចរ និងកិត្តិយសរបស់ប្រទេសជាតិយើង។
ក្នុងឱកាសនោះដែរ លោកព្រៅ ខេមរិន្ទ បានណែនាំឱ្យអាជីវកទាំងអស់ ពេលដាក់លក់ផលិតផលផ្សេងៗ ត្រូវពិនិត្យមើលកាលកំណត់ប្រើប្រាស់ឱ្យបានត្រឹមត្រូវ ចៀសវាងការដាក់លក់ផលិតផលខូចគុណភាព ដែលធ្វើឱ្យប៉ះពាល់ដល់ប្រជាពលរដ្ឋជាអ្នកប្រើប្រាស់ ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#សាខាកាំកុងត្រូលខេត្តសៀមរាប
#ទំនិញខូចគុណភាព
