កាលពីរសៀលថ្ងៃទី២១ ខែតុលា ឆ្នាំ២០១៩ ក្រុមកាកបាទក្រហមឃុំពួក និងអ្នកស្ម័គ្រចិត្ត សហការជាមួយសាខាកាកបាទក្រហមកម្ពុជាខេត្តសៀមរាប បានផ្សព្វផ្សាយស្ដីពីពិការភាព និងសុវត្ថិភាពចរាចរណ៍ នៅភូមិគោកថ្មី ឃុំពួក ស្រុកពួក ដល់ប្រជាពលរដ្ឋ និងកុមារក្នុងសហគមន៍ ដែលមានអ្នកចូលរួមសរុបចំនួនង៥១នាក់ ក្នុងនោះស្រីចំនួន២៣ នាក់ និងពិការភាពចំនួន២នាក់ ក្នុងគោលបំណងចូលរួមកាត់បន្ថយអត្រាស្លាប់ របួស ពិការដោយគ្រោះថ្នាក់ចរាចរណ៍ និងលើកកម្ពស់សិទ្ធជនពិការ ។
ក្នុងឱកាសនោះអ្នកស្ម័គ្រចិត្ត បានពន្យល់កុមារអំពីរបៀបឆ្លងផ្លូវដោយសុវត្ថិភាព ហើយមានចែកខិតប័ណ្ណសុវត្ថិភាពចរាចរណ៍ ផ្សព្វផ្សាយព័ត៌មានពីស្ថានភាពគ្រោះថ្នាក់ចរាចរណ៍ វិធីពាក់មួកសុវត្ថិភាព ឱ្យបានត្រឹមត្រូវចែកខិតប័ណ្ណស្តីពីស្លាកសញ្ញាចរាចរណ៍សំខាន់ៗ សារសុវត្ថិភាព ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍ និងស្ទិកខ័រចំណាំងផ្លាតជនពិការផងដែរ។
លោកស្រី សំ សាវ៉ាង មន្ត្រីគម្រោងសុវត្ថិភាពចរាចរណ៍ សាខាកាកបាទក្រហមកម្ពុជាខេត្តសៀមរាប បានឱ្យដឹងថា បច្ចុប្បន្នគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បន្សល់ទុកនូវកុមារកំព្រា ស្ត្រី មេម៉ាយ ជនពិការ ប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវ មិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរ ។
ក្នុងឱកាសនោះដែរលោកស្រី សំ សាវ៉ាង បានសំណូមពរដល់អ្នកបើកបរយាយន្តគ្រប់ប្រភេទ ពេលមកដល់ជិតសាលារៀន មន្ទីរពេទ្យ និងទីប្រជុំជននានា សូមមេត្តាបន្ថយល្បឿនផង ដើម្បីរួមគ្នាកាត់បន្ថយ ការស្លាប់និងរបួសដោយសារគ្រោះថ្នាក់ចរាចរណ៍ ព្រមទាំងបានជំរុញដល់ប្រជាពលរដ្ឋដែលបានចូលរួម សូមជួយណែនាំដល់កូនចៅក្នុងសមាជិគ្រួសារ និងអ្នកជិតខាង ឱ្យគាត់ពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវ ជាដើម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
