សមាគមអតីតនិស្សិតខ្មែរមកពីប្រទេសជប៉ុន ធ្វើជាម្ចាស់ផ្ទះរៀបចំសន្និសីទក្រុមប្រឹក្សាអតីតនិស្សិតអាស៊ានមកពីប្រទេសជប៉ុន ( ASCOJA ) លើកទី២៤( ការរឹតចំណងមេត្រីភាពនៃក្រុមប្រឹក្សាអតីតនិស្សិតអាស៊ានមកពីប្រទេសជប៉ុន ( ASCOJA ) តាមរយៈវិស័យ ទេសចរណ៍ ) គឺជាប្រធានបទនៃសន្និសីទរបស់ក្រុមប្រឹក្សាអតីតនិស្សិតអាស៊ានមកពីប្រទេសជប៉ុនលើកទី២៤ ដែលបានរៀបចំឡើងនៅក្រុងសៀមរាប ដោយសមាគមអតីតនិស្សិតខ្មែរមកពីប្រទេសជប៉ុន ( JAC ) ។
នេះគឺជាលើកទី១ហើយ ដែលសមាគមអតិតនិស្សិតខ្មែរមកពីប្រទេសជប៉ុន ( JAC ) បានធ្វើជាម្ចាស់ផ្ទះនៃអង្គសន្និសិទនេះ ចាប់តាំងពីសមាគមអតីតនិស្សិតអាស៊ានមកពីប្រទេសជប៉ុន ( ASCOJA ) បានបង្កើតឡើងកាលពីឆ្នាំ១៩៧៧ កន្លងទៅ ។
លោក វុទ្ធី មុនីរ័ត្ន ប្រធានសមាគមអតីតនិស្សិតខ្មែរមកពីប្រទេសជប៉ុន ( JAC ) បានថ្លែងឲ្យដឹងយ៉ាងដូច្នេះ នៅក្នុងមតិស្វាគមន៍នាឱកាសបើកដំណើរការអង្គរសន្និសីទក្រុមប្រឹក្សាអតីតនិស្សិតអាស៊ានមកពីប្រទេសជប៉ុន ASCOJA លើកទី២៤ នាព្រឹកថ្ងៃទី២០ ខែតុលា ឆ្នាំ២០១៨ ចុងសប្តាហ៍កន្លងមកនេះ ដែលមានការចូលរួមពីសំណាក់អតីតនិស្សិតដែលបានបញ្ចប់ការសិក្សានៅសាកលវិទ្យាល័យនានាក្នុងប្រទេសជប៉ុន ប្រមាណជាង ៣០០នាក់ មកពីបណ្តាប្រទេសជាសមាជិកអាស៊ាន ដោយបច្ចុប្បន្ននេះ ពួកគេកំពុងបំរើការងារក្នុងជួររដ្ឋាភិបាល និង វិស័យឯកជននានា នៃប្រទេសកំណើតរបស់ខ្លួន ។
ឯកឧត្តម Hidechisa Horinouchi ឯកអគ្គរដ្ឋទូតជប៉ុនប្រចាំកម្ពុជា វាយតម្លៃថា ៖ គឺជាកត្តាដ៏ល្អប្រសើរបំផុត ដែលសមាគមអតីតនីស្សិតអាស៊ានមកពីប្រទេសជប៉ុនកំពុងស្ថិតក្នុងការខិតខំប្រឹងប្រែង រឹតចំណងសាមគ្គីភាពជាមួយគ្នា ។ តាមរយៈនៃការរៀបចំអង្គសន្នសីទនេះ វាគឺជាការបង្កឱកាសនៃការជួបជុំ ដកស្រង់បទពិសោធពីគ្នាទៅវិញទៅមក ស្វែងរកគន្លឹះល្អៗដើម្បីបានជួយដល់សង្គមជាតិនៃបណ្តាប្រទេសរៀងៗខ្លួន ។ ពិតណាស់ថា កិច្ចដំណើការរបស់អង្គសន្និសីទដ៏ធំបែបនេះ វាគឺជាសមិទ្ធផលដែលកើតចេញពីកិច្ចសហការរវាងសមាជិករបស់គណកម្មការសមាគម ជាមួយស្ថាប័ននានារបស់រដ្ឋាភិបាលជប៉ុន ស្ថានទូតប្រចាំកម្ពុជា ជាមួយនិងវិស័យឯកជនផងដែរ ដែលម្ចាស់ក្រុមហ៊ុនទាំងនោះ ក៏ជាអតីតនិស្សិតមកពីប្រទេសជប៉ុនដូចគ្នា ៕
