សិក្ខាសាលាពិគ្រោះយោបល់ថ្នាក់ខេត្តស្ដីអំពី “ការកំណត់ចក្ខុវិស័យ សេណារីយ៉ូ គោលដៅ និងយុទ្ធសាស្ត្រអភិវឌ្ឍន៍” ផែនការរៀបចំដែនដីខេត្តសៀមរាប នៅថ្ងៃទី២៤ ខែតុលា ឆ្នាំ២០១៩ ក្នុងក្រុងសៀមរាប បានបង្ហាញពីការកំណត់តំបន់ឧស្សហកម្ម អាកាសយាន្តដ្ឋានអន្តរជាតិថ្មី គោលដៅទេសចរណ៍ តំបន់ដីកសិកម្ម ទីប្រជុំជនសំខាន់ៗ និងតំបន់ជាច្រើនទៀត សម្រាប់ក្រុងស្រុកទាំង១២ ក្នុងខេត្តសៀមរាប ដើម្បីបង្កើតការងារ និងលើកកម្ពស់សេដ្ឋកិច្ច តំបន់ឆ្ងាយពីទីប្រជុំជនក្នុងក្រុងសៀមរាប។
ឯកឧត្តមបណ្ឌិត ម៉េង ប៊ុណ្ណារិទ្ធ អគ្គលេខាធិការរង នៃគណៈកម្មាធិការ រៀបចំដែនដី និងនគរូបនីយកម្មថ្នាក់ជាតិ នៃក្រសួងរៀបចំដែនដី នគរូបនីយកម្ម និងសំណង់ បញ្ជាក់ថា គោលនយោបាយស្ដីអំពី “ការរៀបចំដែនដីនៃព្រះរាជាណាចក្រកម្ពុជា” បានកំណត់ច្បាស់លាស់អំពីសមាហរណកម្ម នៃការអភិវឌ្ឍន៍សេដ្ឋកិច្ចក្នុងប្រទេស និងសេដ្ឋកិច្ចក្នុងតំបន់ ដូចជា ប៉ូលអភិវឌ្ឍន៍សេដ្ឋកិច្ចរាជធានីភ្នំពេញ ប៉ូលសេដ្ឋកិច្ចអភិវឌ្ឍន៍ព្រះសីហនុ និងប៉ូលអភិវឌ្ឍន៍សេដ្ឋកិច្ច សៀមរាប តំបន់អភិវឌ្ឍន៍តាមព្រំដែន និងតាមបណ្ដោយអ័ក្សអភិវឌ្ឍន៍សេដ្ឋកិច្ចផ្សេងទៀត។
ឯកឧត្តមបណ្ឌិត ម៉េង ប៊ុណ្ណារិទ្ធ បានបន្ថែមថា គោលនយោរៀបចំដែនដីនៃព្រះរាជាណាចក្រកម្ពុជា រាជរដ្ឋាភិបាលកម្ពុជា បានសម្រេច ដាក់ឲ្យប្រើប្រាស់នូវប្លង់គោលប្រើប្រាស់ដី រាជធានីភ្នំពេញផែនការប្រើប្រាស់ដីខេត្តបាត់ដំបង និងខេត្តព្រះសីហនុ ប្លង់គោលប្រើប្រាស់ដីក្រុង និងទីប្រជុំជនចំនួន ០៨ រួមមានក្រុងបាត់ដំបង ក្រុងតាខ្មៅ ក្រុងកំពត ក្រុងកែប ក្រុងសៀមរាប ទីប្រជុំជនទីរួមខេត្តត្បូងឃ្មុំ ទីប្រជុំជនស្រុកជ្រៃធំ ទីប្រជុំជនស្រុកស្វាយអន្ទោនិ ងផែនការប្រើប្រាស់ដីឃុំ សង្កាត់ ចំនួន ៨០។
ព័ត៌មានជាតិ ថ្មីៗ
មានវត្តមានក្នុងឱកាសនោះ ឯកឧត្តម សួស សុខចាន់ សមាជិកក្រុមប្រឹក្សាខេត្តសៀមរាប តំណាង ឯកឧត្តម ទៀ សីហា អភិបាលខេត្តសៀមរាប បានលើកឡើងថា ដោយសារខេត្តសៀមរាប ជាច្រករបៀងសេដ្ឋកិច្ចខាងត្បូង នៃមហាអនុតំបន់ទន្លេមេគង្គ (GMS) ដែលជាចំណុចពិសេសសម្រាប់ការតភ្ជាប់ទំនាក់ទំនងសេដ្ឋកិច្ច និងពាណិជ្ជកម្មក្នុងតំបន់។ ក្នុងនោះ ខេត្តមួយនេះ អាចជួយជំរុញដល់ការអភិវឌ្ឍ តំបន់ភូមិភាគឦសាន្ត (តំបន់កន្ទុយនាគ) ឲ្យក្លាយជាប៉ូលសេដ្ឋកិច្ចទី៤ នាពេលអនាគត។ ទន្ទឹមនោះ ដើម្បីឲ្យស័កិ្តសមជា ខេត្តទេសចរណ៍ វប្បធម៌ប្រវត្តិសាស្ត្រ និងធម្មជាតិ និងសេដ្ឋកិច្ចដ៏សំខាន់នេះ “ផែនការរៀបចំដែនដីខេត្តសៀមរាប” រដ្ឋបាលខេត្តសៀមរាប ចាំបាច់ត្រូវកំណត់ចក្ខុវិស័យ និងយុទ្ធសាស្ត្រតម្រង់ទិសនៃការប្រើប្រាស់ដី និងការអភិវឌ្ឍផ្នែករូបវ័ន្ត ដោយផ្អែកលើសក្ដានុពល នៃភូមិសាស្ត្រ និងតំបន់នីមួយច្បាស់លាស់។
អត្ថបទ៖ សេង ផល្លី
រូបភាព៖ ខេង ឧត្តម
