លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តសៀមរាប ទទួលផែនកណ្តាលព្រហ្មទ័ណ្ឌ បានឲ្យដឹងថា ជនសង្ស័យចំនួន០៣នាក់ ត្រូវបានប៉ូលិសខេត្តសៀមរាបចាប់ខ្លួន នៅវេលាម៉ោង៧ ព្រឹកទី២៣ ខែតុលា ឆ្នាំ២០១៨ម្សិលមិញនេះ ស្ថិតនៅភូមិកញ្ជោ ឃុំរលួស ស្រុកប្រាសាទបាគង ជាប់ពាក់ព័ន្ធករណីហិង្សាមានស្ថានទម្ងន់ទោស នៅពេលដែលពួកគេ ព្រួតគ្នាវាយសម្លាប់មេជាងសំណង់នៅឯខេត្តព្រះសីហនុ កាលពីថ្ងៃទី២២ ខែតុលា ឆ្នាំ២០១៨ វេលាម៉ោង២២ នៅក្រុមទី៣២ ភូមិ៥ សង្កាត់លេខ៤ ក្រុងព្រះសីហនុ ខេត្តព្រះសីហនុ រួចនាំគ្នារត់គេចខ្លួនមកស្រុកកំណើត នៅឯខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត បានឲ្យដឹងទៀតថា ជនរងគ្រោះមានឈ្មោះ តាំង បូរ៉ា ភេទប្រុស អាយុ៣៦ឆ្នាំ មុខរបរមេការសំណង់ ស្នាក់នៅតាមការដ្ឋានសំណង់ មានស្រុកកំណើតភូមិជីក្រែង ឃុំជីក្រែង ស្រុកជីក្រែង ខេត្តសៀមរាប បានទទួលរងរបួសក្បាល ថ្ងាស មុខជាទម្ងន់ ហើយបានស្លាប់ក្រោយពេលជួយសង្គ្រោះនៅមន្ទីរពេទ្យបង្អែកចំការចេកក្រុងព្រះសីហនុ ហើយជនសង្ស័យមានឈ្មោះ ៖
ទី១. ឈ្មោះ ភោគ សុផាត ភេទប្រុស អាយុ៣០ឆ្នាំ មានស្រុកកំណើតនៅភូមិស្រិញ ឃុំជីក្រែង ស្រុកជីក្រែង ខេត្តសៀមរាប ,
ទី២. ឈ្មោះ អុយ អឿន ភេទប្រុស អាយុ២៧ឆ្នាំ មុខរបរកម្មករសំណង់ មានស្រុកកំណើតនៅខេត្តបាត់ដំបង និង
ទី៣. ឈ្មោះ ឈយ ឃ្មុំ ភេទប្រុស អាយុប្រហែល៣០ឆ្នាំ មុខរបរកម្មករសំណង់ មានស្រុកំណើតនៅភូមិស្តៅ ឃុំអន្លង់សំណរ ស្រុកជីក្រែង ខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត បានបញ្ជាក់បន្ថែមទៀតថា តាមចម្លើយសារភាព ពួកគេពិតជាបានយកដំបង វាយសម្លាប់លើជនរងគ្រោះ ឈ្មោះតាំង បូរ៉ាហៅ ជីន ភេទប្រុស ជាមេការសំណង់នៅថ្ងៃទី ២២ខែតុលាឆ្នាំ ២០១៨ នៅចំណុចជិតសាលារៀន ហ៊ុនសែន អូរពី ខេត្តព្រះសីហនុមែន ដែលមូលហេតុដោយសារខឹងជនរងគ្រោះមិនបើកលុយឲ្យ និងមានទំនាស់គ្នាពេលផឹកស៊ី ខណៈបច្ចុប្បន្ននេះ កម្លាំងនគរបាលជំនាញនៃស្នងការដ្ឋានខេត្តសៀមរាប បានកំពុងផ្តល់ដំណឹងឲ្យខាងស្នងការនគរបាលខេត្តព្រះសីហនុ មកទទួលយកជនសង្ស័យទាំង៣នាក់ ទៅចាត់ការតាមនីតិវិធី ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ឃាតកម្ម
