លោកជំទាវ Tina Redshaw ឯកអគ្គរាជទូតចក្រភពអង់គ្លេសប្រចាំកម្ពុជា មានប្រសាសន៍ប្រកាសពីគំរោងថវិកាជាជំនួយចក្រភពអង់គ្លេស បន្តផ្តល់ជួយលើវិស័យកំចាត់មីននៅកម្ពុជា ក្នុងដំណាក់កាលទី២ ឆ្នាំ២០១៨ដល់២០២០ នូវទឹកប្រាក់ចំនួន៧លានផោន ស្មើនឹងជាង ៩លាន ៥សែនដុល្លារសហរដ្ឋអាមេរិក សម្រាប់សកម្មភាពបោសសម្អាតមីនមនុស្សធម៌នៅកម្ពុជា ហើយតាមរយៈថវិការនេះ នឹងជួយដល់កម្ពុជាលើវិស័យបោសសំអាតមីន នូវការបណ្តុះបណ្តាលជំនាញដល់ប្រតិបត្តិករបោសសំអាតមីន និងជួយរំដោះដីចេញពីគ្រាប់មីន និងយុទ្ឋភ័ណ្ឌមិនទាន់ផ្ទុះសល់ពីសង្គ្រាមបានជាច្រើនផងដែរ សំដៅជួយឱ្យសហគមន៍មូលដ្ឋានមានសុវត្ថិភាពនិងគ្មានបញ្ហាដោយសារគ្រាប់មីន ដែលជាចំណែកមួយចូលរួមក្នុងការអភិវឌ្ឍសង្គមជាតិផងដែរ ។
លោកជំទាវ Tina Redshaw មានប្រសាសន៍បែបនេះ នៅមជ្ឈមណ្ឌលចំចាត់មីនហេហូត្រាស់ ក្នុងខេត្តសៀមរាប កាលពីថ្ងៃទី២៤ ខែតុលា ឆ្នាំ២០១៨ម្សិលមិញនេះ ។
លោកជំទាវ បញ្ជាក់បន្ថែមថា ប្រតិបត្តិករយើងបើមានតែចំណេះនិងជំនាញ គឺមិនគ្រប់គ្រាន់ទេ វាទាមទារឱ្យមានកិច្ចសហការជិតស្និទ្ឋជាមួយអាជ្ញាធរមូលដ្ឋានគ្រប់ជាន់ថ្នាក់ ទើបយើងអាចសម្រេចបានជោគជ័យនូវសកម្មភាពបោសសំអាតមីន ហើយក្រៅពីការគាំទ្រសកម្មភាពបោសសំអាតមីន កន្លងមកយើងក៏តែងតែជួយគាំទ្រ ដល់ការអប់រំបញ្ជ្រាប ការយល់ដឹងដល់ប្រជាពលរដ្ឋនៅតាមមូលដ្ឋានដែលរស់នៅក្បែរតំបន់ដីនៅមានមីន ដែលវាមានសារៈសំខាន់ជួយដល់ពួកគាត់ បានជ្រាបពីបញ្ហាមីន អំពីផលប៉ះពាល់ និងភាពរងគ្រោះដោយសារមីន ជាពិសេសការអប់រំដល់ប្រជាពលរដ្ឋចំណូលថ្មីនិងបំលាស់ទីជាញឹកញាប់និងកុមារតូចៗ ជាដើម។
មានប្រសាសន៍ក្នុងឱកាសនេះ ឯកឧត្តមទេសរដ្ឋមន្ត្រី លី ធុជ អនុប្រធានទី១អាជ្ញាធរមីន ក្នុងនាមរាជរដ្ឋាភិបាលកម្ពុជា និងក្នុងនាមសម្តេចតេជោ នាយករដ្ឋមន្ត្រីនៃកម្ពុជា និងជាប្រធានអាជ្ញាធរមីន បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនអង់គ្លេស ចំពោះជំនួយដ៏ថ្លៃថ្លានៅក្នុងវិស័យសកម្មភាពមីន ដែលបានដើរតួនាទីយ៉ាងសំខាន់សម្រាប់ការបោសសម្អាតមីន ការជួយសង្គ្រោះអាយុជីវិតប្រជាជន និងការអភិវឌ្ឍន៍នៅកម្ពុជា ហើយចក្រភពអង់គ្លេសនេះ គឺជាប្រទេសម្ចាស់ជំនួយដ៏សំខាន់មួយក្នុងចំណោមម្ចាស់ជំនួយធំៗក្នុងវិស័យសកម្មភាពមីននៅកម្ពុជា ចាប់ពីឆ្នាំ១៩៩០មកម្ល៉េះ ខណៈដែលជំនួយរបស់ចក្រភពអង់គ្លេសនាពេលនេះ គឺជាជំនួយដ៏មានសារៈសំខាន់ ក្នុងការជំរុញកម្ពុជាឆ្ពោះទៅសម្រេចបំណង បោសសម្អាតមីនឱ្យអស់ពីក្នុងប្រទេសកម្ពុជា។
ឯកឧត្តម ទេសរដ្ឋមន្ត្រី លី ធុជ បញ្ជាក់ទៀតថា មកទល់បច្ចុប្បន្ននេះ ជំនួយរបស់ចក្រភពអង់គ្លេស បានបោសសម្អាតចម្ការមីនសរុបចំនួន ១.៦៤៩ ចម្ការមីន ដែលបានរំដោះផ្ទៃដីច្រើនជាង ១០៧.២៣៤.៨៨០ម៉ែត្រការ៉េ និង បានកំទេចមីន និងសំណល់ជាតិផ្ទុះនានា សរុបចំនួន ១សែន២ម៉ឺន៤២៥ គ្រាប់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#យុទ្ឋភ័ណ្ឌមិនទាន់ផ្ទុះ
