ផ្លូវ ៦០ម៉ែត្រ ឬហៅម្យ៉ាងទៀតថាផ្លូវអង្គរឃ្យូងយូរ ចាប់ពីចំណុចកែងមុខមន្ទីរពេទ្យគន្ធបុប្ផា ដល់ទីស្នាក់ការអាជ្ញាធរជាតិអប្សរា ចាប់ពីពេលនេះតទៅ នឹងត្រូវបានដូរឈ្មោះជា «វិថីសម្ដេចវិបុលបញ្ញា សុខ អាន»។ នេះបើតាមសេចក្ដីសម្រេចរបស់រដ្ឋបាលខេត្តសៀមរាប ស្របតាមសំណើររបស់អាជ្ញាធរជាតិអប្សរា ។
មូលហេតុនៃការដូរឈ្មោះនេះ គឺដើម្បីតបស្នងសងគុណដ៏ថ្លៃថ្លារបស់សម្ដេចវិបុលបញ្ញា សុខ អាន ក្នុងបុព្វហេតុលើវិស័យបេតិកភណ្ឌ។
វិថីសម្ដេចវិបុលបញ្ញា សុខ អាន ដែលកន្លងមកពលរដ្ឋនិយមហៅផ្លូវ ៦០ម៉ែត្រ ព្រោះយោងតាមទំហំផ្លូវនេះដែលមានទទឺងប្រវែង ៦០ម៉ែត្រ តែឈ្មោះនេះមិនផ្លូវការទេ ទើបតែថ្មីៗនេះអាជ្ញាធរជាតិអប្សរា បានដាក់សំណើរទៅរដ្ឋបាលខេត្តសៀមរាប សុំឱ្យដាក់ឈ្មោះផ្លូវនេះជា វិថីសម្ដេចវិបុលបញ្ញា សុខ អាន។
គួររម្លឹកថា វិថីសម្ដេចវិបុលបញ្ញា សុខ អាន ត្រូវបានស្ថាបនាឡើងកាលពីឆ្នាំ២០០២ ក្រោមជំនួយឧបត្ថម្ភរបស់ទីភ្នាក់ងារបារាំង (ADF) ហើយនៅឆ្នាំ២០០៦ អាជ្ញាធរជាតិអប្សរាក៏បានចំណាយថវិកាមួយចំនួន ដើម្បីធ្វើផ្លូវគ្រួសក្រហមសងខាងផ្លូវ និងបន្តសង់ផ្លូវមកខាងកើតហួសរង្វង់មូលចំនួន៤គីឡូម៉ែត្របន្ថែមទៀត ដើម្បីអបអរសាទរព្រឹត្តិការណ៍វប្បធម៌អង្គរឃ្យុងយូ ដែលជាកិច្ចសហប្រតិបត្តិការរវាងតំបន់បេតិកភណ្ឌចំនួន២ គឺអង្គរ និងឃ្យុងយូ។ ក្រោយមកនៅឆ្នាំ២០១០ អាជ្ញាធរជាតិអប្សរាក៏បានស្ថាបនានេះ ចំនួន៩.៦៧៩ម៉ែត្រ ចាប់ពីផ្លូវបំបែកត្រាំនាគ រហូតដល់បុរីរដ្ឋបាលខេត្តសៀមរាប បច្ចុប្បន្នជាទីស្នាក់ការអាជ្ញាធរជាតិអប្សរា។ បើគិតមកដល់ពេលនេះ រយៈពេល១៦ឆ្នាំហើយដែលវិថីសម្ដេចវិបុលបញ្ញា សុខ អាន បានបម្រើផលប្រយោជន៍ដល់ប្រជាជន និងទេសចរទាំងឆ្លងកាត់និងដឹកជញ្ជូនទំនិញ៕
អត្ថបទ និងរូបភាព ÷ ម៉ាត់ អារីហ្វីន
កែសម្រួល ÷ សេង ផល្លី
