លោក ពិន ប្រាកដ អភិបាលរងខេត្តសៀមរាប មានប្រសាសន៍ថា ដោយមើលឃើញច្បាស់ពីផលប៉ះពាល់អវិជ្ជមាន នៃកង្វះខាតការផ្គត់ផ្គង់ទឹកស្អាត និងការលើកកម្ពស់អនាម័យល្អនៅជនបទសម្រាប់ប្រទេសកម្ពុជា រាជរដ្ឋាភិបាលកម្ពុជា និងបណ្តាដៃគូអភិវឌ្ឍន៍ អង្គការជាតិ និងអន្តរជាតិទាំងអស់ បានប្រមើលមើលនូវយុទ្ធសាស្ត្រគន្លឹះនានា វិភាគអំពីលទ្ធភាពនៃធនធាន ក្នុងការអនុវត្តនូវផែនការយុទ្ធសាស្ត្រនេះ ហើយតាមរយៈការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ សំដៅសម្រេចឲ្យបាននូវទស្សនវិស័យ នៅឆ្នាំ ២០២៥ ប្រជាជនគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមាន អនាម័យប្រកបដោយនិរន្តរភាព ។
លោក ពិន ប្រាកដ មានប្រសាសន៍ទៀតថា តាមរយៈការអង្កេតជារួម ពីស្ថានភាពទឹកស្អាត និង អនាម័យក្នុងខេត្តសៀមរាប បានបង្ហាញពីភាពប្រែប្រួលគួរឲ្យកត់សំគាល់ ជាពិសេសនៅតំបន់ជនបទ ពោលគឺប្រជាពលរដ្ឋមានការយល់ដឹងច្រើនពីការធ្វើអនាម័យ ការលាងដៃនឹងសាប៊ូ ការផឹកទឹកស្អាត ក៏ដូចជាសារៈសំខាន់នៃការប្រើប្រាស់បង្គន់អនាម័យជាដើម ហើយចំពោះស្ថានភាពទឹកស្អាត និង អនាម័យនៅតាមសាលាបឋមសិក្សា ក៏ដូចជាអនុវិទ្យាល័យ ក៏មានភាពប្រែប្រួលយ៉ាងខ្លាំងផងដែរ ពោលគឺសិស្សានុសិស្សភាគច្រើន មានការយល់ដឹងពីសារៈសំខាន់នៃការធ្វើអនាម័យ ព្រមទាំងអនុវត្តន៍បានយ៉ាងល្អនូវ ការផឹកទឹក ស្អាត ការប្រើប្រាស់បង្គន់ ក៏ដូចជាការធ្វើអនាម័យនៅតាមថ្នាក់ និងសាលារៀន ។
លោក ពិន ប្រាកដ មានប្រសាសន៍យ៉ាងនេះ ក្នុងឱកាសអញ្ផើញជាអធិបតីក្នុងសិក្ខាសាលារៀបចំផែនការសកម្មភាពខេត្តស្តីពី ការផ្គត់ផ្គង់ទឹកស្អាត និង ការលើកកម្ពស់អនាម័យនៅជនបទ ជំហានទី២ (២០១៩-២០២៣) ដែលបានរៀបចំឡើងនៅមន្ទីរអភិវឌ្ឍន៍ជនបទខេត្តសៀមរាប នាព្រឹកថ្ងៃទីថ្ងៃទី២៥ ខែតុលា ឆ្នាំ២០១៨ ។
លោក ខេង ញ៉ុល ប្រធានមន្ទីរអភិវឌ្ឍន៍ជនបទខេត្តសៀមរាប បានបង្ហាញថា ការអនុវត្តផែនការសកម្មភាពខេត្ត ស្តីពី ការផ្គត់ផ្គង់ទឹក និង ការលើកកម្ពស់អនាម័យជនបទ ជំហានទី១ ឆ្នាំ ២០១៤-២០១៨ ទទួលបានលទ្ធផលជោគជ័យភាគច្រើន ពោលគឺផ្នែកអនាម័យ គឺយើងបានធ្វើសម្រេចទៅតាមទិសដៅដែលបានគ្រោងទុក ដោយឡែកផ្នែកទឹកស្អាតគឺនៅមិនទាន់បានឆ្លើយតបទាំងស្រុង ទៅនឹងទិសដៅដែលបានកំណត់ ដោយឃើញថា បញ្ហាប្រឈមនានា គឺពិតជាបានកើតមានក្នុងកំឡុងពេលអនុវត្តន៍គម្រោង ដែលទាំងនេះទាមទារឲ្យសិក្ខាកាមទាំងអស់ ត្រូវតែខិតខំរួមគ្នាស្វែងរកវិធីសាស្ត្រ ដំណោះស្រាយផ្សេងៗ ដើម្បីកាត់បន្ថយបញ្ហា ប្រឈមទាំងនេះកុំឲ្យកើតមានក្នុងការអនុវត្ត ផែនការសកម្មភាពខេត្ត ជំហានទី២ ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#ទឹកស្អាត
