បើតាមប្រសាសន៍ ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា CMAC បានលើកឡើងថា ក្នុងរយៈពេល២៥ឆ្នាំកន្លងមកនេះ មជ្ឈមណ្ឌលសកម្មភាពកំចាត់មីនកម្ពុជា បានកម្ទេច គ្រាប់មីន និងយុទ្ធភ័ណ្ឌមិនទាន់ផ្ទុះបានចំនួនជាង២លាន៧សែនគ្រាប់ នៅលើផ្ទៃដីជាង១ពាន់គីឡូម៉ែត្រក្រឡា។
ឯកឧត្ដម ហេង រតនា បានបញ្ជាក់ថា កម្ពុជាបានបែងចែកស្ថានភាពគ្រាប់មីន និងយុទ្ធភ័ណ្ឌមិនទាន់ផ្ទុះជា៤ផ្នែក ទី១ គ្រាប់មីនគ្រប់ប្រភេទ ភាគច្រើនមានច្រើននៅតាមបណ្ដាស្រុកតាមបណ្ដោយព្រំដែនកម្ពុជា និងថៃ ។ ទី២ គ្រាប់បែកទម្លាក់ពីលើយន្ដហោះមាននៅសល់ច្រើននៅព្រំដែនភាគខាងកើត ដូចជាខេត្ដរតនគីរី និងមណ្ឌលគីរី ស្វាយរៀងព្រៃវែង ជាដើម ។ ទី៣ គ្រាប់បែកដៃ គ្រាប់កាំភ្លើង ផ្សេងៗមាននៅគ្រប់ទីកន្លែង និងទី៤ គឺគ្រាប់បែកគីមីដែលទម្លាក់ដោយសហរដ្ឋអាមេរិក។
ដោយឡែក ផ្ទៃដីមានគ្រាប់មីន និងយុទ្ធភ័ណ្ឌមិនទាន់ផ្ទុះ នៅសល់៦០% ដែលកម្ពុជាគ្រោងនឹងមានផែនការបោសសំអាត រហូតដល់ឆ្នាំ២០២៥បន្ថែមទៀត។
តាមរយៈការខិតខំប្រឹងប្រែរបស់មជ្ឈមណ្ឌលសកម្មភាពកំចាត់មីនកម្ពុជាកន្លងមក សារមន្ទីសន្តិភាពសកម្មភាពមីនសៀមរាបនេះ អាចក្លាយជាមណ្ឌលអប់រំប្រវតិ្តសាស្ត្រសកម្មភាពបោសសំអាតគ្រាប់មីន និង សំណល់ជាតិផ្ទុះពីសង្គ្រាម សំដៅចូលរួមកសាងសន្តិភាពបានពេញលេញសំរាប់ព្រះរាជាណាចក្រដ៍កំសត់របស់យើង ដែលជាមណ្ឌលផ្តល់ចំណេះដឹង និង បទពិសោធន៍ជាក់ស្តែងជូនយុវជនកម្ពុជាជំនាន់ក្រោយៗទៀត។
ក្នុងឱកាសដែលអញ្ជើញទស្សនកិច្ច នៅសារមន្ទីរសន្តិភាពសកម្មកំចាត់មីន ក្នុងស្រុកប្រាសាទបាគង ខេត្តសៀមរាប នៅថ្ងៃទី២៥ ខែតុលា ឆ្នាំ២០១៨ ឯកឧត្តម នាយឧត្តមសេនីយ៍ មាស សុភា ទេសរដ្ឋមន្ត្រី ទទួលបន្ទុកកិច្ចការមីន និងយុទ្ធភ័ណ្ឌមិនទាន់ផ្ទុះ និងការងារវិស្វកម្ម កងយោធពលខេមរភូមិន្ទ បានសាទរ និងសម្តែងនូវការកោតសរសើរចំពោះ ថ្នាក់ដឹកនាំ និងមន្ត្រី មជ្ឈមណ្ឌលសកម្មភាពកំចាត់មីនកម្ពុជាគ្រប់ជាន់ថ្នាក់ ដែលបានខិតខំប្រឹងប្រែងអស់កម្លាំងកាយចិត្ត ដើម្បីធ្វើយ៉ាងណាឲ្យប្រជាពលរដ្ឋកម្ពុជា រួចផុតពីការរងគ្រោះដោយសារគ្រាប់មីន និងយុទ្ធភណ្ឌមិនទាន់ផ្ទុះ ហើយកិច្ចខិតខំប្រឹងប្រែងនេះ វាក៏ជាការរួមចំណែក ក្នុងការកាត់បន្ថយភាពក្រីក្រជាមួយរាជរដ្ឋាភិបាលកម្ពុជា។
អត្ថបទ និង រូបថត ៖ លោក ជា ស្រស់ និង លោក ស៊ាន សុផាត
កែសម្រួលអត្ថបទ ៖ លោក សេង ផល្លី
