ប្រជាពលរដ្ឋ និងសិស្សានុសិស្សប្រមាណ៥០០នាក់ នៅជនបទនៃឃុំត្បែង ស្រុកបន្ទាយស្រី ខេត្ដសៀមរាប បានទទួលការព្យាបាលជំងឺដោយមិនគិតថ្លៃពីក្រុមគ្រូពេទ្យមនុស្សធម៌ នៃប្រទេសកូរ៉េ និងកម្ពុជា ដែលដឹកនាំដោយអង្គការមិត្ដកម្ពុជា ខេត្ដសៀមរាប។
ប្រធានអង្គការមិត្ដកម្ពុជា លោក សាត មាស បានអោយដឹងថា ការពិនិត្យនិងព្យាបាលរោគនេះ ធ្វើឡើងរយៈពេលបួនថ្ងៃ ចាប់ពីថ្ងៃទី០៣ដល់ថ្ងៃទី០៦ខែវិច្ឆិកាឆ្នាំ២០១៩ នៅក្នុងសាលាអនុវិទ្យាល័យត្បែង និងមណ្ឌលសុខភាព ក្នុងឃុំត្បែង ស្រុកបន្ទាយស្រី ខេត្ដសៀមរាប ដែលមានប្រជាពលរដ្ឋនិងសិស្សានុសិស្សមកទទួលសេវាថែទាំសុខភាពនេះ ប្រមាណ៥០០នាក់។លោកបានបន្ដថា ក្រុមគ្រូពេទ្យស្ម័គ្រចិត្តមកពីមន្ទីពេទ្យNational Health Insurance Service Ilsan នៃប្រទេសកូរ៉េខាងត្បូងនិងគ្រូពេទ្យកម្ពុជាចំនួនពីរនាក់ ដោយមានការព្យាបាលមាត់ធ្មេញ បំពង់ក ត្រជៀក សម្ពាធឈាម និងពិគ្រោះជម្ងឺបឋមផងដែរ ។ការផ្ដល់នូវសេវាសុខភាពដល់មូលដ្ឋាននេះ ដោយសារពួកគាត់មិនសូវយល់ដឹងពីបញ្ហាសុខភាព ហើយម្យ៉ាងទៀតបាធ្វើអោយពួកគាត់ចំណេញទាំងថវិកានិងពេលវេលា ខណៈដែលពួកគាត់មានការមមាញឹកប្រកបរបរចិញ្ចឹមជីវិត្ដប្រចាំថ្ងៃ។
លោក សាត មាស បានបន្ដថា ក្រៅពីការផ្ដល់សេវាសុខភាព ក្រុមគ្រូពេទ្យស្ម័គ្រចិត្តក៏បានឧបត្ថម្ភកង់ចំនួន៣០គ្រឿង ដើមស្វាយចំនួន១០០ដើម និងសម្ភារៈសិក្សាជាច្រើនទៀតដល់សិស្សានុសិស្ស និងសង់ផ្ទះជូនប្រជាជនចំនួន១០ខ្នងថែមទៀតផងដែរ។
ព័ត៌មានជាតិ ថ្មីៗ
ក្រុមគ្រូពេទ្យមនុស្សធម៌ប្រទេសកូរ៉េ និងកម្ពុជា បានអោយដឹងថា ពួកគាត់មកផ្ដល់សេវាសុខភាពដល់ប្រជាពលរដ្ឋកម្ពុជានេះ ជាលើកទី២ហើយ ដោយសារពួកគាត់ស្រលាញ់ប្រជាពលរដ្ឋកម្ពុជានិងចង់អោយពលរដ្ឋខ្មែរមានសុខភាពល្អ ណៈដែលលពួកគាត់ខ្លះខ្វះការយល់ដឹងពីការថែទាំសុខភាព។ពួកគាត់បានបន្ដថាក្រុមគ្រូពេទ្យនឹងបន្ដជួយព្យាសុខភាពពលរដ្ឋខ្មែរបន្ដទៀតបើសិនមានឱកាសនៅពេលក្រោយ។
សូមបញ្ជាក់ថា អង្គការមិត្តកម្ពុជាបានដឹកនាំសប្បុរសជនពីប្រទេសកូរ៉េមកធ្វើសកម្មភាពតាំងពីឆ្នាំ២០១៣រហូតមកដល់សព្វថ្ងៃនេះរួមមាន កម្មវិធី ពាក់ព័ន្ធនិងវិស័យអប់រំ ។លើសពីនេះទៅទៀត អង្គការមិត្តកម្ពុជាបានជួយសាងសង់ផ្ទះចំនួន២០៧ខ្នង អណ្តូងចំនួន៥៥០ ទោងចំនួន០៨ឈុត ខ្លោងទ្វារសាលាចំនួន៥ របងសាលាចំនួន៥ ប្រវែង៣០០០ម៉ែត្រ អគារសិក្សា ១ខ្នងមាន៦បន្ទប់ចែកកង់ចំនួន ១០០០គ្រឿង និងមានសកម្មភាពជាច្រើនផ្សេងទៀត៕
